Joo̱b 9 - Xo̱jo̱n eén Néná

Xi ma joó ndi̱yà nga tsíchji̱a̱ Joo̱b

¹ Nga tsintꞌié kuí nii̱ Joo̱b, bi̱ katsó:

² «¡Jè be nda nda an nga bo̱a̱ kjiꞌi kui eén! Kó ti̱ jè be an nga ngindyi̱ko̱n Néná jmíjín xi kixi̱ kꞌo̱xié yojoo̱,

³ ti̱nde mejénjínna nga kui kuichjiátijo̱ an, ngatꞌa̱ nde ka̱májínna nga ku̱i̱chji̱a̱ꞌa ngo ni, kjo̱a̱a̱ ngo mi̱ ni xi maa̱ kui.

⁴ Achichí tsie kjo̱a̱kjíntakón ko̱jo ngaꞌniú xí tjiín, ꞌyá xí ka̱maa̱ nga ku̱i̱ꞌítikjájo̱ Néná, sꞌe̱ skoyaá nga kui xi sa̱ꞌín.

⁵ Kjiꞌanga tsꞌénxchán Néná, bosíkjo ngi̱ndie nínga síndo na̱xi̱i̱, kó nde ngojín xi be kui nii̱,

⁶ ti̱ bo̱a̱ ti̱ tsꞌén bosíkjo ngi̱ndie nínga tikón tꞌanangii̱, kó tsꞌénkjátsié má ngi̱ndie nínga tikónsón tꞌanangii̱.

⁷ Botixómaá tsꞌueé, kó tsꞌueé ngiti̱ fotjojín, ti̱ bo̱a̱ ti̱ tsꞌén, kuí boá xi tsꞌenkꞌó ndiꞌií ńñoo nga.

⁸ Kuí boá xi yejéntie soboá nkꞌajmii̱, kó ki̱a̱ fotsoꞌbásón nga̱soón ngaꞌniuú ndáchíkoón.

⁹ Néná boá xi katsꞌénda ngayeje ńñoo, kó xki̱ ngo tjín índo: kui xi ꞌmí Osa̱ xi je ngasee̱, ko̱jo kro xi chji̱a̱ni xtji̱e̱e̱n na̱ngi, ko̱jo Orioo̱n, ko̱jo nga yito xi ndí ndí ínchjiín tindso̱ ꞌmií.

¹⁰ »Achichí yiꞌi ko̱jo ꞌniú fíndikónná ni xi tsꞌénda Néná, nga ngaskande jmíjín xi ka̱makjiín, ti̱nde jmíjín xi ka̱maxki̱i̱.

¹¹ Tsi kꞌi̱e̱ kjo̱a̱ꞌatꞌana Néná, nde ka̱májínra̱ skuie an, tsi sa̱ꞌínkjinna yojoo̱, nde skuiejínra̱ an.

¹² Tsi tjín ni xi mejeén skjíbé kuí, ꞌyá xí ka̱maa̱ ku̱i̱ꞌíchjaá, ꞌyá xí ka̱maa̱ bo̱a̱ ka̱tso̱o̱ nga skjíbéjín.

¹³ Kjiꞌanga tsꞌénxchán Néná, ngiti̱ fíjínni nga̱xto̱n, kó ngindyi̱ko̱n kui, ngaskande xota̱ xi nkꞌakoo̱n, ni̱ma̱kjo̱a̱ ꞌbíndo.

¹⁴ »Kó akja̱ꞌmíra̱ an ka̱ma kuichjiáꞌa an, nde ngo én sa̱kójínna ni xi xiáa̱n kondra̱ tsi̱ꞌe̱.

¹⁵ Ndatsi xota̱ xi kixi̱ an, nde ka̱májín kuichjiáꞌa an, ta̱sá ta̱ ꞌniú tsí kuíꞌáa̱ nga ngatamani̱ma̱a̱ an.

¹⁶ Tsi kui kuichjiáa̱, kó tsi sa̱ꞌínsénna, nde sꞌi̱jinjínna nga kui ku̱i̱ntꞌièna.

¹⁷ ¡Ngora̱ tjo̱ꞌniú sa̱ꞌínkjién nga sa̱ꞌínxi̱na, kó nde jmí kjo̱a̱jínraa̱ nga ꞌniú ngase sa̱ꞌínꞌoón nínga onna!

¹⁸ ¡Ku̱i̱ꞌíkitsiemárana kjo̱a̱xtinda, kó nde tsja̱ndièjínra̱ nga skjiendá an!

¹⁹ Tsi stsitsíjee̱n ꞌyání xi tjín ngasee̱ ngaꞌniú, ¡Néná boá xi tjín ngasee̱ ngaꞌniú! Kó tsi kjo̱a̱a̱ nga xcha̱ ꞌyání xi konnii̱, kótsꞌèn si̱ꞌaa̱n kjo̱a̱ꞌniú Néná tsi̱ꞌe̱ nga kjo̱chó kui ngi̱ndiee̱.

²⁰ ¡Ndatsi jmí tsi ni xi ndajín je katsꞌen an, ndso̱ꞌba án boá xi botíjéna, kó tsi kixi̱ án tsi xián án, kuí nii̱ xi ko̱kó nga tjínna jé!

²¹ »Jmí jéjínna, ta̱nga jmí ndasénjín kui nii̱, ngatꞌa̱ jè ngiti̱ tjójínna yojona.

²² Ta̱ ingo tsí ni xi chaja ngasena xi xián án: nga Néná ta̱ ngo ndséje̱n tsꞌenkjié tsi xota̱ xi nda, ko̱jo tsi xota̱ xi ndajín.

²³ Tsi ngo chiꞌin xi ta̱niján má tsꞌenkꞌién xota̱ xi jmí jéjiín, Néná mojnókie kjo̱a̱ni̱ma̱ xi foaꞌatio.

²⁴ Tsi ngo xota̱ xi ꞌniú ndajín kjíbé kjo̱a̱ꞌniú ngo xoꞌba, Néná boá xi bójñoó ndyi̱ko̱n xota̱ xi botíjeé. Kó tsi Nénájín xi bo̱a̱ tsꞌeén, ja̱ ꞌyání tsobo̱a̱.

²⁵ »Achichí tsá kjifí ni̱xtjinna, xikó maá ngo nda̱ xi tsá monga. Ni̱xtjinna achichí tsá kjifoaꞌa kó nde kamábejín an ni xi ndaa̱.

²⁶ Ni̱xtjinna jaꞌa xikó maá tjotso je xi tsá ꞌbímaá, xikó maá ngo ja̱ xi tsá tsoboá cho̱ xi kjinie.

²⁷ Tsi an bi̱ xián án: sa̱ꞌinchíyá an ngayeje kjo̱a̱ni̱ma̱na, kó ta̱sá kosikjo an kje̱n án nga kojnò an,

²⁸ ta̱nga achichí tsakjon an kjo̱a̱a̱ kui kjo̱a̱ni̱ma̱ xi ta̱nisién tsiee̱, ngatꞌa̱ jè be cha̱n cha̱n an nga ji xi bo̱a̱ se ji nga tjínna jé.

²⁹ Kó tsi tjínrií jé tsí ka̱tso̱na Néná, mítsjà nga ta̱kjo̱a̱ndaní nga sa̱ꞌin ngaꞌniú ngase an.

³⁰ Ndatsi ndo̱jò konijón an ndsa̱ án ko̱jo ngayeje yojona,

³¹ Néná to̱kó ki̱a̱ kꞌo̱jmina ki̱a̱ ti̱xa̱ nínga bichijmi xtjieé, ¡kó ngaskande ńjñona xikoó tsi tsꞌe̱ ka̱maa̱ an!

³² »Ngatꞌa̱ Néná jmí tsi xota̱ nga̱sondie xikoó án, tsi̱ꞌe̱ nga an kuichjiáꞌa an, ko̱jo nga nijan kongínjne̱ ngindyi̱ko̱n xota̱ xi botíjeé.

³³ Ti̱nde jmíjín xota̱ xi botíjé xi chji̱a̱ni kui nga̱sondiee̱, xi ka̱maa̱ sa̱ꞌíndajin kjo̱a̱xtijne̱.

³⁴ Tsi tjín xí ka̱maa̱ kjo̱a̱ꞌáxínna kui ndikoón kjo̱a̱a̱ kui kjo̱a̱ni̱ma̱ xi tsꞌénfoaꞌajin an nga tsꞌénbotíjéna Néná,

³⁵ ka̱mara̱ stsakjonjín an nga kuichjiá an, ta̱nga nga ja̱koxi̱, tikónndajín an nga bo̱a̱ sa̱ꞌin an.