Joo̱b 8 - Xo̱jo̱n eén Néná

Ni xi tjón katsó Bilndaa̱nd

¹ Kósꞌe̱ Bilndaa̱nd, xi chji̱a̱ni nangi Súaa̱j, bi̱ katsoó Joo̱b:

² «¡Ngaskande kjiꞌání nga to̱kó bo̱a̱ tsꞌén ko̱ndókjo̱e̱ ji, achichí ꞌniú ndókjo̱e̱ ji, xikó maá ngo tjo̱ꞌniú!

³ Néná xí tsi̱ꞌe̱ ngayeje ngaꞌniuú, sa̱ꞌínkꞌájinjiín kjo̱a̱ndaa̱ ko̱jo kjo̱a̱kixi̱i̱.

⁴ Tsi katsꞌénjé ndíi̱ kondraa̱ Néná, kuí boá xi katsjaá kjo̱a̱botíjé xí tsoboaá kui.

⁵ Ta̱nga tsi nga ta̱jño̱ó ku̱i̱ndyi̱sé ji Néná, kó tsi ꞌniú ko̱ndókjoée̱ kui xi tsi̱ꞌe̱ ngayeje ngaꞌniuú,

⁶ tsi tsjie ji, ko̱jo tsi kixi̱ ji, kuí boá xi skoón, kó kuí boá xi tsja̱á nginií ngayeje ni xi kisꞌiee̱ ngasꞌe̱.

⁷ Kó ndatsi chiboa ma kjo̱a̱cho̱n xi tjón kisꞌiee̱, nde kjo̱chótji̱ngíjín xikó kjiꞌi ni xi jaskan kꞌuieé.

⁸ »Tasíyée̱ xota̱ tji̱e̱ xcháná, kó xchi̱e̱ ji kókjiꞌi ni xi kamábe kui.

⁹ Ngatꞌa̱ xota̱ ngojña̱ ngocha̱ boá ñá, kó jmí ni yajín ñá, kó ni̱xtjin xi tindyión kuí nga̱sondiee̱ achichí tsá foaꞌa, bo̱a̱ má maá xikoó tji̱nkꞌi̱e̱én.

¹⁰ Kui xotaa̱ ku̱i̱chji̱a̱joo ko̱jo ko̱kóyaá, kó ndeskande ngi̱jin ini̱ma̱a̱ kꞌo̱xiéni én xí ku̱i̱chji̱a̱joo.

¹¹ «A ka̱maxchá xka̱ papiroo̱ nínga jmí ndásejín. Kó a ka̱maxchá ndikingándaá nínga jmí ndáfoajín.

¹² Ta̱nga ndatsi to̱kó sa̱si̱e̱ ngase, kó ndatsi kji̱e̱ bichájín, tsá ngase xí ta̱bo̱a̱jiín kje̱ꞌe xka̱.

¹³ Ti̱ bo̱a̱ ti̱ maa̱ ngayeje xota̱ xi tsꞌénchíyà Néná, kó kjo̱a̱chiyaá xota̱ xi ꞌniú ndajiín, fe kjo̱a̱.

¹⁴ Kjo̱a̱ꞌniátakoón achichí inda má, xikó maá ngo ndo̱bo̱a̱tóstsó,

¹⁵ kó kui xi ki̱a̱ ko̱óꞌniú kuí ndo̱bo̱a̱tsóstsoó, kꞌo̱ka, ngatꞌa̱ ngije skjíbé, stindsó.

¹⁶ Xota̱ xi ꞌniú ndajiín xikónií kui xka̱ xi kjiꞌanga beꞌeé ndoboaá, fítsié, kó ngayeje ndi̱tsee̱n sꞌikitsieni tjiaa̱,

¹⁷ kó ngi̱jin ndi̱jo̱o̱ fíjin ja̱ma̱a̱, kó ki̱a̱ sitꞌa ndi̱jo̱o̱,

¹⁸ ta̱nga tsi tjín xí skji̱níyá, nde jmíjín xi sku̱i̱e̱ nínga kisꞌińdo.

¹⁹ ¡Bo̱a̱ tsꞌén fe kjo̱a̱tsja xi ꞌbeé nga kisꞌińdo, kó ngi̱ndiee̱ kje̱ꞌe xka̱ tjo ngijee̱!

²⁰ »Néná tsꞌenchꞌójín xota̱ xi kixi̱i̱, ti̱nde bosikójojín xota̱ xi ꞌniú ndajiín.

²¹ Néná boá xi sa̱ꞌín nga ko̱jne̱ nginí ji, kó xchieꞌeyé má ji nga tsja ka̱maa̱.

²² Ta̱nga kondra̱a̱ kjo̱a̱soboá boá xi sa̱ko̱ó, kó si̱ꞌankjatsón ndiꞌaa̱».