Joo̱b 7 - Xo̱jo̱n eén Néná

¹ »Achichí ꞌniú xá xí niꞌán nga tindyión kuí nga̱sondiee̱, kó ni̱xtjinná xikónií ni̱xtjii̱n ngo nda̱ xi tsꞌénxá ngi̱jin jno̱o̱.

² Bo̱a̱ kón ñá xikoó mosoo̱, nga ndyi̱koyaa̱ nga je sa̱ꞌínkjaꞌyá, bo̱a̱ kón ñá xikoó moso̱ xi tsꞌénxá ni̱xtjii̱n, nga je mejeén nga je ka̱machjií.

³ Bo̱a̱ tsꞌén nga achichí je kjín sá nga kjo̱a̱ni̱ma̱ tsꞌénfoaꞌatio an, xikoó ngo moso̱ xi je jenda, xi achichí nda̱ kjimaa̱ nga je ka̱majñoó.

⁴ Kjiꞌanga fojña an, bi̱ xian an: kjiꞌání nga kjo̱stjíe̱n an, nde tsájín foaꞌana ni̱xtji̱e̱n, kó tsꞌénkꞌafóyà kꞌi̱e̱ tsꞌénkꞌafóyà ngaján án nga̱són ṉchanna, nga boeꞌéńjñájínna, kó tsꞌenkjó án kóchon si̱sién.

⁵ Ngayeje yojona je kjifee̱ chi̱ndo ko̱jo stsié, ¡ngayeje yojona nga tjitjoó ndátjítsi̱é!

⁶ »Achichí tsá tsꞌénfí ni̱xtjin nga tikón an, xikó maá nga foaꞌa ńchjón xí tsꞌénkjién xota̱ xi kjóyà ńjñoo̱. ¡Jè ngiti̱ jmíjín ngasena kjo̱a̱chiyá!

⁷ Ngatjaꞌátsjiee̱n ji Ne, nga kjo̱a̱mindyionna xikónií tsi ngo ndi̱yà chjondá, kó nga jè ngiti̱ skuiejín an ngase mí nii̱ bo̱a̱ ni xi ndaa̱.

⁸ Xota̱ xi ndyi̱bena ngotꞌe̱, ngiti̱ sku̱i̱e̱jínna ngase, ngatꞌa̱ kjiꞌanga ji xi stsitsíjinní, jè ngiti̱ kotíjña̱jín an.

⁹ Xikó maá ṉdi̱ xi fií kó chajaa̱, bo̱a̱ má maá xota̱ xi fesoón, ngatꞌa̱ ngiti̱ foaꞌáꞌyájiín,

¹⁰ ngiti̱ fochójín nginí ndiꞌaa̱, ¡kó xota̱a̱ jè ngiti̱ bejín ngase!

¹¹ »Kuíni nga an, ka̱májín kokjo an ndso̱ꞌba án, kó kuíni nga kuichjiá an nga achichí nda̱ kjimana, ko̱jo achichí xtií ini̱ma̱na.

¹² Ánjín bo̱a̱ xi cho̱ chꞌokjiꞌii̱ ndáchíkoón, tsi̱ꞌe̱ nga an xchindèní.

¹³ Tjín ni̱xtjin nga tsꞌenkjó án, nga ṉchanna boá xi sa̱ꞌíndajonna, kó nga ńjñaá boá xi sa̱ꞌínkjaꞌajinda kjo̱a̱ni̱ma̱ xi tsꞌénfoaꞌatio an,

¹⁴ kósꞌe̱ kjiꞌá boá nga mindyiendikíi̱n ńjñána, kó ngo chi̱ni xi chꞌo tsó boeꞌéní.

¹⁵ ¡Ta̱sá mejénna nga si̱ꞌanxíndona, ta̱sá ngatꞌien an, ngiti̱ mejénjínna kotíjña̱ an nga̱sondie!

¹⁶ Jè kamáchꞌona kjo̱a̱mindyioo̱n, ngatꞌa̱ jmí tsi ngatsjéni̱xtjin nga kotíjña̱ an, ¡te̱ꞌéndièní, ngatꞌa̱ jè ngiti̱ jmí ni chjíjiín kjo̱a̱mindyionna!

¹⁷ »ꞌYá kuií bo̱a̱ xota̱ nga̱sondiee̱, tsi̱ꞌe̱ nga ndikón si̱ꞌinje̱ ji, ko̱jo nga ki̱a̱ kꞌuijñíjin ji ini̱ma̱a̱.

¹⁸ Ko̱jo nga ndyiojón ndyiojón tichindé, ko̱jo nga ta̱jmì chi̱bo̱a̱ní nga tichjatꞌeyékín ji.

¹⁹ Ngaskande kjiꞌání nga to̱kó an stsitsíjinní, ¡ti̱ntjoénní, ndeta̱ tsi̱ꞌe̱ nga xtjéjen chií án ndáńti̱a̱na!

²⁰ Tsi katsꞌenjé án, mí ni xi ndajín xi ka̱ma sa̱ꞌinjoo̱ ji. Ngiti̱ tsitsijinjíi̱n xota̱ nga̱sondiee̱, Míkjo̱a̱a̱ nga ta̱ngongá an tiniꞌínje̱ní, ngaskande nga xikoó tsi ngo chꞌià é kjimaa̱ an.

²¹ Ánní nga niꞌínjetakínjínní, sꞌe̱ niꞌínchíyé ji ni xi ndajín xi katsꞌen an. Ngatꞌa̱ jè ńdie ka̱má ngiñá an, kó tsi ndyiojón ku̱i̱ndyi̱séní, jè ngiti̱ jmíjín an, jè aya an».