Joo̱b 6 - Xo̱jo̱n eén Néná

Ni xi tjón katsó Joo̱b

¹ Bi̱ tsꞌén tsíchji̱a̱ Joo̱b kjo̱a̱a̱ ni xi katsó Elifaa̱:

² «¡Achichí mejénna nga ngayeje ni xi ndajín xi kjimana ka̱ma xꞌi̱chi̱bo̱a̱joni ngo nisochi̱bo̱a̱!

³ ¡Achichí má kui nii̱, nga ngaskande é ngase ka̱ma, ta̱bo̱a̱jiín ngayeje tsomií ndáchíkoón! ¡Nde chjiénjín nga ta̱ bi̱ ta̱ ka̱majnú nga bo̱a̱ tsꞌén tsꞌénchji̱a̱ an!

⁴ Kuí Néná xí tsi̱ꞌe̱ ngayeje ngaꞌniuú xi katsꞌénꞌónna nga yeꞌéna yáyojoó, ¡kó jè tsijen kjimaa̱ ngi̱jin yojona, nga xikoó tsi je tsꞌénmongajin ndikimaya xi tjiín kui yáyojoó! ¡Achichí tsꞌéntsakjon an kui nii̱!

⁵ »Tsi ndyi̱a̱ ndi̱xcho̱ nínga kjiényá ni cho̱o̱, nde ngojín bórroó xí skja̱ndáyà, ti̱nde ngojín cho̱yojo xi̱ꞌii̱n xi skja̱ndáyà nga.

⁶ Kjiꞌanga tjiín na̱xa̱ nichiniee̱, achichí ndakón má, ¡kó ngaskande tiboaa̱ chjo̱o nda chinie nga!

⁷ Ta̱nga kui ni xi nde kamámejénjínna katsꞌenjo̱ an ngasꞌe̱, ¡kuí boá xi ni chiniena kjima ngotꞌe̱!

⁸ »¡Achichí mejénna nga Néná tsja̱ana ni xi tsꞌénmíꞌáa̱ katsaki, achichí mejénna nga sa̱ꞌínkjatjosón ni xi mejénna:

⁹ nga ta̱ ngo ndi̱yà ngatsꞌénkjítiena, ngatꞌíniéna tsja, kósꞌe̱ ngatsꞌénkjiéna kjo̱a̱!

¹⁰ »¡Ndatsi achichí ni xi kjimaa̱ xi so xi ndakjaa̱n, ta̱nga tsi tsá ko̱ya án, xikónií tsi kui nii̱ xi sa̱ꞌíndajonna, ngatꞌa̱ ngatsjéni̱xtjin nga tsꞌénbendikón án eén kui Néná xí tsjiee̱!

^11-12 »Mí ngaꞌniú xí tjín ngasena tsi̱ꞌe̱ nga skoya an, kó mí ni xi ka̱mana nga kju̱i̱e̱tꞌa, tsi̱ꞌe̱ nga to̱kó kotíjña̱ra ngase an. Jmí tsi tajá án xikoó ndi̱jo̱o̱, ti̱nde jmí tsi ki̱cha̱ bronse̱ kjijon yojona.

¹³ Nde ngojín xi bosikójona, ti̱nde májínna nga ti̱ aa̱n xi bosiko̱jo an yojona.

¹⁴ Tsi ngo amingo̱ xi kjo̱a̱ni̱ma̱ tsꞌénfoaꞌatio, niꞌándajónrií, ndatsi je ngiti̱ ntꞌiéꞌénjiín xi tsi̱ꞌe̱ ngayeje ngaꞌniuú.

¹⁵ Ta̱nga jún, xi amingo̱na, jè ikꞌíjñámasienjnúꞌun, kó bo̱a̱ kon je kamájnú xikoó ndejèꞌ xi fotjoxie má ndi̱ya̱à,

¹⁶ kui xi xikó maá ndáfoa ndiee̱, ko̱jo ndáfoa nchꞌaàn, nga nchꞌàn sꞌíjón nga̱soón,

¹⁷ ta̱nga nga ni̱xtjii̱n cho̱ndoboaá, ꞌbíndo kixí, kó ngiti̱ mongajín ndáfoaa̱.

¹⁸ »ꞌBíjñámasiénjnú ndi̱yà nínga ndyi̱mongínjnú, kó inda inda ma chiboajnú, kósꞌe̱ chajajnú.

¹⁹ Xota̱ xi botiñá ni xi chji̱a̱ni na̱xi̱ńdáꞌniú Temaa̱ ko̱jo Sabaa̱, ꞌbímá xtín xtín nga mongase xo̱ngàndántꞌieé,

²⁰ ta̱nga nga jachó ki̱a̱a̱, ta̱ bi̱ ta̱ kamaá nga jmí ni kasakojiín, kó ngiti̱ kamámejénjiín kisꞌińdo ngase nga̱sondie.

²¹ ¡Ngotꞌe̱ ꞌne̱ ti̱ bo̱a̱ ti̱ kónjnú jún nga, ngatꞌa̱ kjiꞌanga kamáyàjnú kjo̱a̱ni̱ma̱ xi tsꞌénfoaꞌatio an, achichí kandakonnijnú.

²² »Ánjín xi bo̱a̱ kixianjnúꞌun nga kji̱ndi̱bájnú, ko̱jo nga jún xi kꞌuíchjíjnú to̱n,

²³ tsi̱ꞌe̱ nga kjo̱tjoꞌa an, ngi̱ya tsja kondraa̱, ko̱jo kjo̱a̱a̱ xota̱ xi ta̱nisién ꞌniú ndajiín.

²⁴ Tꞌíyájnúꞌun ñání nínga ndajín katsꞌen an, kósꞌe̱ kokjo an ndso̱ꞌba án ngijee̱.

²⁵ Achichí ngaꞌniú xí tjiín én xí kixi̱i̱. ¡Ta̱nga jún ndyi̱fongitaꞌinjnúꞌun ngo jé, kó nde jmíjínjnú kótsꞌèn ko̱kójnú nga bo̱a̱ kjiꞌi kui nii̱!

²⁶ Mejénjnú nga ngiti̱ jmí ni xiánjín ngase an, ta̱nga bo̱a̱ tsꞌén chji̱a̱ an kjo̱a̱a̱ nga achichí nda̱ kjimana, kó eén tjo̱o̱ boá xi fíjo̱.

²⁷ ¡Jún ka̱majnú si̱ꞌánjnú ngayeje nii̱, ngaskande tsi ko̱ti̱ñájnú ngo xota̱ xi xꞌi̱a̱n, ko̱jo tsi ngo ti̱xa̱ si̱ꞌandajnú nínga kꞌuínijìnjnú ngo amingo̱!

²⁸ »Tsitsíjenjnúu̱ ndyikón án, kó tꞌíyájnúꞌun tsi tsꞌénꞌbindisojo̱ tíkje̱n tíkje̱njnú.

²⁹ Kixi̱ ti̱ꞌanjo̱jnúꞌun, kó ngiti̱ ta̱xkiya fongitaꞌínjínjnúꞌun ngo jé, ta̱sá tꞌíyájnú nga jmíjéjínna.

³⁰ Jmí tsi indisojo̱jnúꞌun. A beriítakónjnú nga makjínjínna mí ni xi ja̱koxi̱ ko̱jo mí ni xi ja̱koxi̱jín.