Joo̱b 5 - Xo̱jo̱n eén Néná

¹ »¡Ngotꞌe̱ ꞌne̱, cheꞌeyé ji Joo̱b! ¡Cheꞌeyé ji xikó kjiꞌi mejeén, tsi ta̱ꞌaa̱ ngo ndítsjie ku̱i̱ntꞌie̱é, kó sa̱ꞌínseén!

² Kjénní nga kjo̱a̱tamaá boá xi tsꞌenkꞌién xota̱ xi kitikjo̱a̱a̱, kó xi onkoo̱n, kjo̱a̱ꞌontakoón boá xi tsꞌenkꞌién.

³ Jè kamábe an nga tjín xota̱ xi kitikjo̱a̱ xi achichí tjoninkꞌaa̱ yojoo̱, ta̱nga ti̱ kuii̱ chi̱bo̱a̱ je bo̱a̱ kixian an nga ndajín ka̱maa̱ ndiꞌaa̱.

⁴ Ndií, nde ngojín xi bosikójo ko̱jo xi ꞌboxiéꞌá, ¡ki̱a̱ nínga mandajin kjo̱a̱xti xi tjín ki̱a̱ na̱xi̱ńdaá, nde ngojín xi kixi̱ tsꞌenseén!

⁵ Ni xi kamáxchaá, xota̱ xi bojoó kjinie nga ki̱a̱ ꞌboxiéjinni ngi̱jin ndaꞌyaá, kó xota̱ xi xíndaá ma mejeén kjo̱a̱cho̱o̱n.

⁶ »¡Ngatꞌa̱ kjo̱a̱ndasee̱n, jmí tsi ngi̱jin chojoo̱ fotjoni, ti̱nde ni xi ndajiín, jmí tsi ngi̱jin tꞌanangii̱ fotjoni!

⁷ Xikótsꞌèn nga ndiꞌií boá xi konnii̱ nga kjínkꞌá xꞌueé, ti̱ bo̱a̱ ti̱ tsꞌén xota̱ nga̱sondiee̱ boá xi konnii̱ nga tsie kjo̱a̱ni̱ma̱ foaꞌatio.

⁸ »Tsi an xi bo̱a̱ kjimana xikó kjimaa̱ ji, ngi̱ya tsja Nénárá kꞌuijñá an kui nii̱.

⁹ Kui xi tsꞌén kjín kjo̱a̱ndikón ko̱jo ni xi fíndikónná, xi nde jmíjín xi ka̱makjiín.

¹⁰ Néná boá xi tsꞌén, nga stseé bixó nga̱són tꞌanangii̱, kó kuí boá xi bosíndanií kꞌijñaá,

¹¹ Néná boá xi tsjaá ngaꞌniú xota̱ xi ni̱ma̱kjo̱a̱ síndoo̱, kó bosikójo xota̱ xi síndo xa̱ꞌya̱a̱,

¹² Néná boá xi ꞌbíchjaá ni xi tsꞌénkjó xota̱ xi mañaa̱, tsi̱ꞌe̱ nga fotjosónjín ni xi mejeén sa̱ꞌín,

¹³ kó kuí boá xi tsꞌénkjién kjo̱a̱mañaa̱ já kjínkoón tsi̱ꞌe̱ nga ti̱ kuii̱ ku̱i̱xo̱jin, kó tsꞌenkjié ni xi ndajín xi ꞌbínda xota̱ xi ꞌniú ndajiín.

¹⁴ Néná boá xi tsꞌén nga xikoó tsi jñó maá nga ni̱xtjii̱n, kó nga ma ndisꞌueé ꞌbímá xikoó tsi nga ni̱xtji̱e̱e̱n,

¹⁵ bo̱a̱ tsꞌén nga ꞌboxiéꞌá xota̱ ni̱ma̱a̱ kjo̱a̱a̱ tsꞌoa xota̱ xi mañaa̱, ko̱jo ngi̱ya tsja xota̱ xi ndajiín,

¹⁶ ngatꞌa̱ kuí boá xi tsjaá kjo̱a̱chiyá xota̱ xi ni̱ma̱a̱, ta̱nga xota̱ xi ꞌniú ndajiín bókjo tsꞌoa.

¹⁷ »Achichíra̱tsjaa̱ xota̱ xi Néná sa̱ꞌínchji̱ni̱e̱, kuíni nga, ngata̱ niꞌínchꞌíjín ji kjo̱a̱niꞌánchji̱ni̱e̱e̱ kui Néná xí tsi̱ꞌe̱ ngayeje ngaꞌniuú.

¹⁸ Néná boá xi tsꞌénꞌónná, ta̱nga tsꞌendáyà nginí nínga onná, Néná boá xi moꞌónná, ta̱nga ti̱ tsꞌendáyà nginí xi so xi ndakjanná.

¹⁹ Jun kjo̱a̱ni̱ma̱ kꞌo̱xiéjii̱n nga ko̱síko̱joo̱, kó xi ma yitoo̱, jmí ni sa̱ꞌínjiín.

²⁰ Kjiꞌanga ni̱xtjii̱n nga ma kjindiá, tsja̱ndièjín nga ko̱yè jí, kjiꞌanga ni̱xtjii̱n kjo̱a̱xchán, tsja̱ndièjín nga si̱ꞌankꞌiee̱n.

²¹ Kuí boá xi skoón kjiꞌanga tjín xí ndajín ka̱tso̱o̱, kó nde chjiénjín nga ko̱ndaki̱n jí, kjiꞌanga kji̱ndi̱bá ni xi ndajiín.

²² Ko̱jno̱che ji kjindiaá, ko̱jo ngayeje ni xi tsꞌenkjiéná, kó nde chjiénjín nga ko̱ndaki̱n jí cho̱ tamaá:

²³ ¡Ngatꞌa̱ ngaskande ndi̱jo̱ xi tjín ngi̱jin kꞌijñaá, ka̱ma kꞌuíndeje̱ ji ngo ni, kó cho̱ tamaá ko̱jo ji, kꞌuiéjnú kjo̱a̱xió!

²⁴ Xió ku̱i̱ndyin ji ngi̱ya ndiꞌàa̱, kó nga kꞌuíxki̱ ji cho̱ tjiée̱ nde ngo cho̱ xcha̱jàjiín.

²⁵ Achichí kjín ndí ko̱jo kjín ndínde kꞌuieé, ¡xtókjà xikó maá kꞌijñá xí tjín ngi̱jin kꞌijñaá!

²⁶ Kjiꞌa ngije xchá jí nga ko̱yè jí, xikó maá ngo chꞌo̱ to ndso̱ko̱a̱n ṉño̱pan xi ni̱xtjii̱n má nga chjaꞌátikó.

²⁷ Jè kamáyà nga bo̱a̱ kjiꞌi kui nii̱. Tsi ko̱si̱nnijinjne̱, ti̱ jíní xi ka̱ma xchítꞌe ji nga bo̱a̱ ka̱ma».