Joo̱b 42 - Xo̱jo̱n eén Néná

Ni xi kamaá Joo̱b nga fetꞌani

¹ Kósꞌe̱ Joo̱b, bi̱ katsoó Néná:

² «Jè be an nga ji xi maa̱ niꞌán ngayeje nii̱, ko̱jo nga jmíjín xi ka̱maa̱ ku̱i̱ꞌíjñaꞌma kjo̱a̱niꞌánkjoó ngindyikin ji.

³ Ji akasíyé ji nga bi̱ kase: ꞌYání jí nga ma kon takín nga sꞌijinjín maá kjo̱a̱kjínkónna, nga katsꞌenkjién án én xí jmí ni chjíjiín, ni xi ta̱nisién fíndikónna, kó nga ja̱koxi̱ nde bejín an ni xi kixian an.

⁴ “ꞌNiú míꞌaá nga ko̱nda̱ꞌyéní, án mára ko̱síyaá, kó ji takoyèní”.

⁵ »Ni xi be an ngasꞌe̱ kjo̱a̱a̱ ji, kuí boá ni xi ta̱ kiꞌmíyàna, ta̱nga ngotꞌe̱ ꞌne̱ ndyikón án má xi je kamábee̱, kó jè be an ꞌyání ji ꞌne̱.

⁶ Kuíni nga be an nga ki̱a̱jiín ni xi kixian an, tsꞌenkꞌoyà an yojona, kó ni̱ma̱kjo̱a̱ botíjña̱ an ngi̱jii̱n chojoo̱ ko̱jo ndisoo̱».

Ni xi ka̱má nga fetꞌaa̱

⁷ Ngije kamaá Néná nga tsíchji̱a̱jo Joo̱b, Néná tsíchji̱a̱jo Elifaa̱, nda̱ xi chji̱a̱ni nangi Temaa̱n, kó bi̱ katsoó: »Achichí tjítsꞌenxchán án kjo̱a̱a̱ ji, ko̱jo kjo̱a̱a̱ nga jó amingo̱ tse̱. Ni xi kiꞌmíjnú kjo̱a̱a̱ an bo̱a̱jín kjiꞌi, ta̱nga ja̱koxi̱ boá ni xi katsó Joo̱b.

⁸ Kuíni ngotꞌe̱ ꞌne̱ tangínjo̱jnú Joo̱b, kó tꞌítíjnú yito cho̱yojo toro̱, ko̱jo yito cho̱tsa̱nga̱ xi jaꞌatji ndi̱ja̱a̱, tsi̱ꞌe̱ nga sa̱ꞌinjetakónjnúꞌun. ꞌNiú ku̱i̱ꞌana Joo̱b nga ku̱i̱chji̱a̱tjéjnú, kó ta̱ngatꞌanii̱ kui nga jmí kjo̱a̱soboá sa̱ꞌínkjaꞌájínjnú, ta̱ngatꞌanii̱ nga kixi̱jín kandokjo̱a̱jnú kjo̱a̱a̱ an, xikó tsꞌén kixi̱ tsíchji̱a̱ Joo̱b».

⁹ Kósꞌe̱ Elifaa̱, nda̱ xi chji̱a̱ni nangi Temaa̱n, ko̱jo Bilndaa̱nd, nda̱ xi chji̱a̱ni nangi Súaa̱j, ko̱jo Sofaa̱r, nda̱ xi chji̱a̱ni nangi Naamaa̱t kijí, kó katsꞌénkjatjosón ni katsoó Néná, kó Néná katsꞌénseén Joo̱b nga ꞌniú tsíchji̱a̱a̱.

¹⁰ Jaskan ngije Joo̱b tsíchji̱a̱tjé amingoo̱, Néná jaꞌáxiín kjo̱a̱ni̱ma̱ xi tsꞌénfoaꞌatio, kó jó bo̱a̱ kjiꞌi ni katsjá nginií xikó kjiꞌi ni xi kisꞌiee̱ ngasꞌe̱.

¹¹ Kó ngayeje ntsꞌie ko̱jo ndichja, ko̱jo ngayeje xota̱ xi kamábe ngasꞌe̱, kijíkatsijee̱n, kó ngo sꞌué xí ꞌniú katsꞌén. Katsjangaꞌniuú ko̱jo katsꞌéndajoo̱n kjo̱a̱a̱ ngayeje kjo̱a̱ni̱ma̱ xi Néná katsꞌénkjaꞌatio, kó nga ngo nga ngo kui jaá ngo to̱ntiboa ko̱jo ngo sti̱ngaro xi to̱nsinié katsjaá Joo̱b.

¹² Kó Néná katsꞌénchikonñé ni xi jaskan kamaá Joo̱b, ta̱bo̱a̱jiín xikótsꞌèn kisꞌijña nga tjón tjón. Ngatꞌa̱ bi̱ kjiꞌi ni xi kisꞌiee̱: tienijón mi̱ cho̱tsa̱nga̱, ko̱jo jun mi̱ cho̱toꞌoyitsꞌe̱n, ko̱jo jó mi̱ cho̱yojo xi bokján tꞌanangi, ko̱jo ngo mi̱ bórró ínchjín,

¹³ kó ti̱ kisꞌiee̱ ngi yito ndí xíꞌín ko̱jo ngi ján ndí xí ínchjín.

¹⁴ Ndí chjo̱ón xi tjoón na̱ Jemima̱ ítꞌajaꞌén, xi ma joó na̱ Sesiaa̱ kiꞌmí, kó xi ma ján na̱ Keree̱n Apuu̱k kiꞌmí.

¹⁵ Kisꞌiejín ngase ínchjín kuí tꞌanangii̱ xi bo̱a̱ tsꞌén tsjakon ngase kamá xikoó ínchjiín Joo̱b. Kó Joo̱b íjñaá ni xi kisꞌiee̱ kui ndí ínchjiín ko̱jo ndí xíꞌiín, kó ndse̱je̱n tsꞌén akjángaá nii̱.

¹⁶ Jaskan ngije kamá kui nii̱, Joo̱b ngi úchán ko̱jo yichán nó kisꞌijña ngase, kó kamábe ngase ndií ko̱jo ndíndeé ngaskande xi ma nijón tji̱e̱.

¹⁷ Jaskan ngije tsjatsꞌèn kisꞌijña kjín nó, kjo̱a̱xcha̱á boá nga kꞌienni.