Joo̱b 41 - Xo̱jo̱n eén Néná

¹ »A ka̱maári ko̱ndo̱bo̱e̱ ji cho̱ chꞌokjiꞌi lebiataa̱n nga ta̱ ngo tsí tsitin kjuíi̱n, axa̱ a ka̱maári tsi ngo ńꞌniú kuítꞌe ji na̱je̱n.

² A ka̱maári ko̱sii̱n ti̱xa̱ ńdatꞌanijon nga ko̱nángíi̱ ngo ki̱cha̱ntꞌi̱u̱a̱, axa̱ a ka̱maári tsi ngo ńꞌniú kuítꞌe ji ńdatꞌanijon.

³ ¡A beriítakín ji nga kui cho̱o̱ ni̱ma̱ ka̱tso̱o̱, axa̱ a beriítakín nga én ixi sa̱ꞌínkjién tsi̱ꞌe̱ nga kꞌuíjñindé.

⁴ A sꞌijiínri nga ku̱i̱ꞌíndajoo̱, tsi̱ꞌe̱ nga mosòo̱ ka̱ma ngayeje ni̱xtjin nga kꞌuijñá!

⁵ A ka̱maári ko̱óńtenje̱ xikoó tsi ngo ni̱siee̱, axa̱ a ka̱maári tsi ngo ńꞌniú kuítꞌe ji se, tsi̱ꞌe̱ nga sa̱ꞌíntsobejo̱ ndí ínchjíi̱n.

⁶ A ka̱má nichinie si̱ꞌánjnú tsi̱ꞌe̱ nga xi̱ni̱e̱jójnú já amingo̱jnú. A ka̱márií xota̱ xi tsꞌenkꞌién cho̱o̱ nga kui ko̱tiya, ko̱jo nga ki̱a̱ ko̱tíñá ndi̱tse̱e̱n yojoo̱.

⁷ A ka̱maári kichiro̱ ku̱i̱chéje̱ni ji tji̱xi̱ín, ko̱jo tsi ngo choso̱ ko̱na̱ngísꞌíi̱n to̱ko̱.

⁸ Tsi mejeén nga ku̱i̱xkénje̱ ji, jmíni̱xtjin xchi̱yaa̱ kui nii̱, kó ngiti̱ ka̱mamejénjiín ku̱i̱xkénje̱ nginí ngijee̱.

⁹ Nde jmí chjíjiín nga si̱ꞌinkjé jí nga si̱ꞌìi̱n, ¡ndeta̱ stsitsíjinríi̱, kó ko̱yayà má ji!

¹⁰ Tsi jmíjín xi ka̱maa̱ nga sa̱ꞌiín kui nga ndyi̱a̱ ndyi̱ko̱n, ja̱ ꞌyá xi ka̱maa̱ nga an sa̱ꞌínna.

¹¹ ¡ꞌYá xí an tjón katsjána ngo ni, tsi̱ꞌe̱ nga an tsjaꞌoyá ngiñáa̱, Án tsa̱ꞌa̱n ngayeje ni xi tjín ngindiee̱ nkꞌajmii̱!

¹² Xiójín kotíjña̱ an, chjiéngá xiyà an kjo̱a̱a̱ xi kókón ni xi yaꞌanii̱ yojoo̱ kui cho̱o̱, ko̱jo kjo̱a̱a̱ ngaꞌniú xí tjiín, ko̱jo kjo̱a̱a̱ nga ndikón tsꞌén fochó.

¹³ ꞌYá xí ka̱maa̱ kjo̱a̱ꞌáxiín tji̱xi̱ín, ꞌyá xí ka̱maa̱ nga ku̱i̱ꞌíjñaá ngo ki̱cha̱ xi chjenꞌniúnií tsꞌoa.

¹⁴ ꞌYá xí ka̱maa̱ skjíxkjá ńdatꞌanijon xi yajá ndi̱yà ndi̱yà ńꞌni̱u̱ nga mindyiandíkón máná.

¹⁵ Tji̱xin xi kjijon yojoo̱ xikó maá ni xi ꞌbíchjaá ni xi ndajín, achichí ꞌniú síndotꞌaꞌniuú xkjín,

¹⁶ ti̱ ki̱a̱ ti̱ maa̱ síndotꞌaa̱ xkjín, nga ngaskande tjo̱o̱ foaꞌandyiójín

¹⁷ tjíkjojo̱ má xkjín nga ngaskande nde jmíjín xi ka̱maa̱ kꞌo̱xiékjo.

¹⁸ Kjiꞌanga tsꞌéntjiesén, ꞌboxié má ndiꞌí, kó ndyi̱ko̱n bo̱a̱ má kón xikoó ndiꞌií nga ndibáꞌásie̱én,

¹⁹ ndiꞌí fotjoni tsꞌoa, ndiꞌí xi ngaskande kjí má nga kjínkꞌá,

²⁰ ṉdi̱ fotjoni ṉtjo̱n, ¡xikó maá ngo ti̱ji̱í xí tjixó xi tjíjin ngi̱jin ndiꞌií!

²¹ Nga botsié nda̱a̱ ꞌbítí má ndiꞌií, ngatꞌa̱ ndiꞌí ꞌboxiéni tsꞌoa.

²² Achichí ngaꞌniú xí tjiín kjásén, kó nga ta̱ tsitsíjenrií ndakon má má,

²³ nínga inda ngasee̱ yojoo̱ nde ngo ni ꞌbosꞌiénjiín, ꞌniú síndo, kó nde tsꞌéntíyàjín,

²⁴ ini̱ma̱a̱ tikón chikín chikín xikoó ngo ndi̱jo̱, tikón tajá tajá xikoó ngo ndi̱jo̱o̱ molino̱.

²⁵ Kjiꞌanga ꞌbítsanie yojoo̱ kui cho̱o̱, ngaskande xota̱ xi chꞌokon tsoó yojoo̱ fotsié má, kó monga.

²⁶ Tsi tjín xí kjo̱chótji̱ngii̱, nde ka̱májiín tsi ngo ki̱cha̱ sa̱ꞌínꞌónnii̱, kó ni xi ꞌbíchjánii̱ yáyojoó, ko̱jo yáyojoó nde ko̱síko̱jojín.

²⁷ Ngatꞌa̱ tsꞌénxi̱ ki̱cha̱a̱ xikoó ngo xtjié, kó tsꞌénxi̱ ki̱cha̱ bronsee̱ xikoó ngo yá xí kjifondo,

²⁸ ꞌbosꞌiénjiín yáyojoó, kó ndi̱jo̱ndayojoo̱ ta̱ xikónií tsi xtjié maá,

²⁹ ngayeje ni xi niꞌánkjién nga má kjo̱a̱xcha̱án, ta̱ xikónií tsi xka̱ kixí maá, kó ta̱ mojnókie tsí nga fonie yáyojoó.

³⁰ Ni̱se̱e̱n ja̱kon tji̱bo̱a̱tsjie má kón ni xi tjiín, kó kjiꞌanga ꞌbifé yojoo̱ ngi̱jin ndásee̱ mején má ndi̱yà,

³¹ ngaskande tsꞌenxò má ndáfoaa̱ ndáchíkoón kjiꞌanga ꞌbojmijin yojoo̱, kó ndáfoaa̱ xikó maá ngo ramita̱ ndásíje̱n maa̱ kui,

³² ndi̱yà xí ꞌna̱ má mején nínga foaꞌa nga fí, xikó maá ngo ndiꞌí tiboa ki̱a̱ nga̱són ndáfoaa̱.

³³ Jmíjín kui nga̱sondiee̱ ngo xi xikoó kuí, kuí boá xi ngo cho̱ chꞌokjiꞌi xi ta̱nisién ndakon.

³⁴ Chꞌórií xota̱ xi nkꞌakoo̱n, kó kui boá xi ree̱ ngayeje xi nkꞌakoo̱n».