Joo̱b 40 - Xo̱jo̱n eén Néná

¹ Kó Néná ti̱ bi̱ ti̱ katsó ngasee̱ Joo̱b:

² »A kjo̱a̱kjíntakón boá nga ji ko̱ndókjo̱e̱tije̱ ji xi tsi̱ꞌe̱ ngayeje ngaꞌniuú, ja̱ tsi ji xi kandokjo̱e̱tije̱ ji, ja̱ ndókjo̱e̱ꞌéni ngotꞌe̱».

³ Kó Joo̱b bi̱ katsoó Néná:

⁴ »Kó xián án nga kuichjiáꞌaa̱ ji, xi jmí ni chjíjiín an, ta̱sá xió kotíjña̱ an.

⁵ Ngo ndi̱yà jè tsíchji̱a̱ an, ta̱nga jè ngiti̱ jmí ni xiánjín an, sꞌe̱ ti̱ tsíchji̱a̱ nginí an xi ma joó ndi̱yà, kó ngiti̱ jmí ni kixianjín an».

⁶ Kósꞌe̱ Néná tsíchji̱a̱jo Joo̱b ndeskande ngi̱jin ngo tjo̱ꞌniú, kó bi̱ katsoó:

⁷ »¡Ja̱ stsitsíjen máráa̱ a kjénraá nga tá chꞌokon sèe̱ yojòo̱! Án mára kosíyaá ngotꞌe̱, kó jí ndókjo̱e̱ ji ni xi kosíyaá.

⁸ »A niꞌínchjíjínríi̱ kjo̱a̱kixi̱ xi tsꞌen an, a si̱ꞌinjéní tsi̱ꞌe̱ nga ko̱ké ji nga ji xi tjiín ngakixi̱.

⁹ A tjiínri ngaꞌniú xikoó an. A ka̱má kjo̱ni̱e̱ nda̱a̱ xikótsꞌèn fonie cho̱ꞌo̱o̱n xikoó tsa̱ꞌa̱n.

¹⁰ Tsi bo̱a̱ kjiꞌi, ¡ja̱ ngatꞌieé kjo̱a̱je ji, ko̱jo ngatamayandikoón!

¹¹ Ti̱ꞌinkjìn jí ngayeje kjo̱a̱xcháa̱n ¡kó ni̱ma̱kjo̱a̱ tꞌínde ji xota̱ xi nkꞌakoo̱n!

¹² Tsitsíjìi̱n kui xota̱ xi ꞌniú ndajiín, kó ni̱ma̱kjo̱a̱ ti̱ꞌin, kó ti̱ꞌinkjie ji ta̱ nínga síndo,

¹³ ¡tjanijín ji ki̱a̱ tꞌanangii̱, kó tjaꞌme ji kje̱n tsi̱ꞌe̱ nga kꞌuíndo nínga jñoó!

¹⁴ Kósꞌe̱ kjiꞌá boá nga skuie an nga ta̱nisién tjiín ngaꞌniú kó nga kuíni nga kiniꞌín ji.

¹⁵ Tsitsíjìi̱n cho̱ chꞌokjiꞌi xi ꞌmí beemoo̱t, kui cho̱ xi an katsꞌenda an nga xikoó ji, kꞌijñá xkjuién kjinie, xikó maá cho̱yojo toro̱ xi bokján tꞌanangii̱,

¹⁶ kó ngayeje ngaꞌniuú ki̱a̱ ndibánií ńdayìtsꞌe̱n, kó achichí ngaꞌniú xí tjiín yojo nga̱tsꞌo̱a̱.

¹⁷ Tsꞌéntíyaà ńtsꞌen xikoó ngo yákón, kó naxá xí tjiín ti̱ꞌmi̱í ngaskande tsꞌájin maá xkjín.

¹⁸ Ńdaa̱ bo̱a̱ má kón xikoó ki̱cha̱ bronsee̱, kó ti̱ꞌmi̱í bo̱a̱ má kón xikoó ki̱cha̱ xi ndaa̱.

¹⁹ Ngi̱jii̱n ngayeje cho̱ xi katsꞌenda an, kui boá xi tjón katsꞌenda an, kó tsi an xi mejénna, ta̱ án tsí xi ka̱mana sa̱ꞌinkꞌién an.

²⁰ Ndi̱xcho̱ xi tjín ngi̱jin kꞌijñaá boá xi kjinie, ki̱a̱ ngi̱ndie nínga tsꞌéntsobé cho̱ tamaá.

²¹ Ki̱a̱ kjojñá ngindiee̱ ndikingándaá, kó ki̱a̱ kꞌuijñáꞌmá ngi̱jii̱n yána̱xo̱o̱, ngi̱ndie nínga ndyi̱i̱,

²² kó ngindiee̱ kui xka̱a̱ ki̱a̱ fojña, kó ngindie tji̱nkꞌi̱e̱én yá xí kjiꞌi tꞌachji̱ndi̱e̱e̱ tsꞌénkjaꞌyá.

²³ Tsi ka̱ma je ndejeèꞌ, tsakjónjín má, ndatsi ngaskande ndáfoaa̱ ndejèꞌ Jorndaa̱n jè tsꞌénboꞌmá má.

²⁴ ꞌYá xí ka̱maa̱ skjánjo̱ kjiꞌanga kjiꞌiféjín. ꞌYá xí ka̱maa̱ stso̱ba̱ nga ko̱sién ti̱xa̱ ṉtjo̱n.