Joo̱b 4 - Xo̱jo̱n eén Néná

Ni xi tjón katsó Elifaa̱

¹ Kó Elifaa̱ nda̱ xi chji̱a̱ni nangi Temaa̱n, bi̱ katsoó Joo̱b:

² «Tsi tjín xí ngo én ku̱i̱chji̱a̱joo, tsjajínra̱ ka̱maa̱, ta̱nga jmíjín xi ka̱maa̱ ko̱óxioó ndso̱ꞌba án.

³ Achichí nda foaꞌátsjienna nga jí boá xi mostroo̱ achichí xota̱ kamá ji, kó katseꞌéngaꞌníi̱ xota̱ xi je katsꞌénkjiékjo̱a̱ katsaki,

⁴ achichí kamaá kandokjo̱e̱je ji, nga katseꞌéngaꞌníi̱ xota̱ xi kisꞌińdo ndasee̱n, ko̱jo akasíke̱je ji xota̱ xi inda tsꞌén kisꞌiṉtso̱maa̱.

⁵ Ta̱nga ngotꞌe̱ ꞌne̱ nga ji xi tibitjatí ji kjo̱a̱ni̱ma̱, chikjo̱a̱jiín, kó je tiniꞌínkjié ji kjo̱a̱.

⁶ Ji xi achichí kixi̱ tsꞌén tiniꞌínxétꞌée̱ Néná, kó nga ta̱soboá ni xi nda tjítsꞌen an, kase ji, kó míkjo̱a̱a̱ nga kjimaꞌnítakínjín ji Néná ngotꞌe̱ ꞌne̱.

⁷ »¡Ti̱ꞌinkjé jí ngotꞌe̱, kó tꞌíyéní, ꞌyá xotaa̱ xi jmíjéjiín xi je kiniꞌánkjié, kó kjiꞌání nga je kamáyà, nga je kiniꞌánkjié xota̱ xi kixi̱i̱!

⁸ Jè kamábe an ngotꞌe̱ ꞌne̱, nga xota̱ xi tsꞌén ni xi ndajiín, ti̱ ndajín maá nga.

⁹ «Kjiꞌanga Néná tsꞌénxchán, botsieé, kó ta̱ ngo tsí tjo̱o̱ tsꞌoa tsꞌenkjiéni xota̱ xi ꞌniú ndajiín,

¹⁰ Ndatsi ku̱i̱ꞌítsje̱ ko̱jo tsi skja̱ndáyà xikoó xandi̱je̱e̱, Néná skjítꞌó ńꞌni̱u̱.

¹¹ Kó ko̱yà bojó, xikó maá xandi̱je̱ xchá xí ngiti̱ sakójiín ni xi kjinie, kósꞌe̱ ndií tsojoboa ngijee̱.

¹² »Tjiꞌmána kui nii̱ katsaki, ta̱nga ta̱ꞌya tsintꞌie an.

¹³ Tji̱e̱nga ngayeje xota̱ nga̱sondiee̱ kjiyojofé, ngo chi̱ni tseꞌéna, kó ngiti̱ ndajín kisꞌijña ini̱ma̱na.

¹⁴ ¡Achichí katsakjon an, kó jatsié ngayeje yojona!

¹⁵ Tjo̱o̱ ngo a̱siénni̱xtjin jaꞌatꞌana kó yítsieé kje̱n án, kó ngaskande kaxoboꞌyójón má yojona.

¹⁶ ¡Be án nga tjín xí kisꞌijña ki̱a̱a̱, ta̱nga ndajín kamábe an ꞌyá kuií bo̱a̱! Kisꞌie xió xió nga ngo foaꞌatjiyajoo̱n. Kó ta̱niján má tsintꞌie an, nga tjín xí tsíchji̱a̱jo si̱e̱n si̱e̱nna nga bi̱ katsóna:

¹⁷ “A kixi̱ ngase xotaa̱ ta̱bo̱a̱jiín Néná. A tsjie ngase xotaa̱ ta̱bo̱a̱jiín kui Ne xi katsꞌénda.

¹⁸ Néná nde ndítsjiee̱, kui xi mosoo̱, maꞌniátakónjín, ngatꞌa̱ ngaskande kui kitikjo̱a̱ ma nga,

¹⁹ akja̱ꞌmíra̱ xotaa̱ ka̱maꞌniátakón, kui xi ndiꞌa chji̱ndi̱e̱ síndoꞌyaá, kó ńdie kamándani, ngatꞌa̱ inda boá, kó ka̱ma ko̱jna̱nié xikoó xobií.

²⁰ ”Nga ta̱jño̱ó tsen, kó nga kamángixoón fesón, kó chaja ndi̱yà nga nde ngojín xi ma ndasee̱n.

²¹ ¡Chjaníyá, xikó maá yaá ngo ndiꞌańjño, kó fesón ngindiee̱ nga sa̱ko̱ó kjo̱a̱kjínkoón!