Joo̱b 39 - Xo̱jo̱n eén Néná

¹ «A yé jí ni̱xtjin nga beꞌé ndí tindso̱ ínchjín kꞌijñaá. A jè kamáyè ji kjiꞌanga beꞌé ndí ndi̱kꞌijñá ínchjiín.

² A jè ikꞌíxki̱ ji kótjín ni̱xtjin nga boaꞌa ndí. A jè yé jí kjiꞌání nga beꞌé ndí.

³ Kjiꞌanga fochó chi̱bo̱a̱a̱ nga stse̱n ndií, fíkjajña ngi̱jin kꞌijñá jàn, kó ki̱a̱ beꞌé ndií,

⁴ ngije tsen kui ndií, maxchá kó ꞌbeé ngaꞌniú, sꞌe̱ jaskan fíboá, kó ngiti̱ foeꞌeꞌoyájín nginí.

⁵ »ꞌYá xí índondé bórró kꞌijñaá, ꞌyá xí iskjíndó ńꞌniú xí tjitáꞌniúní,

⁶ án boá xi katsjáa̱ ngi̱ndie nínga kꞌuíndo soboá, ki̱a̱ katsjáa̱ nangi kixií, tsi̱ꞌe̱ nga ki̱a̱ kꞌuíndo.

⁷ Jè tjimándé nga ngaskande nde ngiti̱ jmí xki̱ tsꞌénjín ni xi kjima na̱xi̱ńdáꞌniú jàn, ti̱nde ntꞌiéjiín xota̱ xi ꞌbitíyà cho̱o̱.

⁸ Kó boá tsꞌén ꞌbítso̱ma ngi̱jin na̱xi̱i̱ nga mongase ndi̱xcho̱, ko̱jo kꞌijñá xí xkjuién.

⁹ »A bee̱takín nga ngo cho̱yojo toro̱ tamá sa̱ꞌínseén jí, ko̱jo nga ki̱a̱ sa̱ꞌínkjaꞌyá nínga síndo nchꞌoaá cho̱ xi tjiín.

¹⁰ A bee̱takín nga tsi kuítꞌaꞌní jí ka̱maa̱ ko̱e̱je̱tji̱ngii̱, kósꞌe̱ ko̱kján tꞌanangìi̱ ngaskande nga chje̱ꞌétikí jí ni xi ikꞌítji̱e̱ ji.

¹¹ A ka̱má ka̱maꞌniátakón ji ngaꞌniú xí tjiín, ko̱jo nga kui sa̱ꞌín ngayeje xá xí niꞌín ji.

¹² A ka̱má si̱ꞌin ji nga cho̱yojo toroo̱ kjo̱a̱ꞌáꞌyá ngayeje xojmá xí kamáxchaá sꞌe̱ ko̱e̱je̱jo ki̱a̱ nínga ꞌyo̱o̱.

¹³ »Cho̱ Abestruu̱ achichí tsjaꞌbeé, kó achichí tsjá maá nga kjíxꞌá nga̱a̱, ta̱nga jmí tsi bo̱a̱ tsꞌén tsjakjiꞌi xikoó cho̱ngándaá,

¹⁴ ngi̱jin tsomií ꞌbíndo chjo̱o, kó chojoo̱ tꞌanangii̱ tsꞌénꞌásonii̱,

¹⁵ ¡nde ndasénjiín tsi tjín xí tsja̱nié, ko̱jo tsi ngo cho̱ tamá tsja̱nié kó ko̱kján!

¹⁶ Tsꞌenchꞌó ndií xikoó tsi kuijín tsi̱ꞌe̱, kó jmí ndasénjiín tsi ta̱kjo̱a̱ndaní xá xí jè katsꞌén.

¹⁷ Ngatꞌa̱ an jmí kjo̱a̱kjínkón katsjajáa̱n, ti̱nde katsjajáa̱n kjo̱a̱kjíntakón,

¹⁸ ta̱nga kjiꞌanga kjíxꞌá nga̱a̱ kó monga, ta̱ mojnókie tsí ndi̱je̱e̱ ko̱jo xi ꞌbíjñasoón.

¹⁹ »A jí xí katseꞌée̱ ngaꞌniú xí tjiín ndi̱je̱e̱, ko̱jo a jí xí katseꞌée̱ tsja̱ngasen.

²⁰ A jí xí niꞌín ji nga kjínkꞌá xikó maá ngo chjo̱bo̱a̱, ko̱jo nga mindyiandíkoón xotaa̱ kjiꞌanga tsꞌéntjiesén.

²¹ ꞌNiú tsjásꞌieén tꞌanangii̱, kó tsja maa̱ ngaꞌniú xí tjiín, kó nkꞌakon maá yojoo̱ nga fíkján kjo̱a̱xcha̱án.

²² Ta̱ mojnókie tsí ndikoón, kó nde tsakjónjín má, ti̱nde tsakjónjín má nga fíkján tíkje̱n tíkje̱n.

²³ Ntꞌieé xikótsꞌèn fonie yáyojoó, kó ngaskande ꞌna̱ má ndyi̱ko̱n yáyojó xi tjítokó ki̱cha̱a̱,

²⁴ kó nde ndasénjín maá nga ꞌniú monga, nga ntꞌieé tjio xi tsjákjo̱a̱ nga bixkaán,

²⁵ tsꞌéntjiesén má nga ntꞌieé tjioo̱, ta̱ kjin makjiín nga kjo̱a̱xchán kjimá, nga ntꞌieé xi ndyi̱kjandàyaá nga ndyi̱tsjà kjo̱a̱.

²⁶ »A ta̱ngatꞌanií kjo̱a̱kjínkóo̱n nga fítji̱e̱n cho̱ alkoo̱n, ko̱jo nga fítji̱e̱n xtji̱e̱e̱n na̱ngi.

²⁷ A jí xí katseꞌékjo̱e̱e̱ nga kjo̱tji̱e̱n ja̱a̱, ko̱jo nga ki̱a̱ nínga nkꞌaa̱ sa̱ꞌínda ndo̱bo̱a̱a̱.

²⁸ Ki̱a̱ ngi̱jin na̱xi̱i̱ ꞌbíndo ja̱a̱, ki̱a̱ nkꞌaa̱ ndi̱jo̱ xi síndo nínga ꞌniú nkꞌaá.

²⁹ Ndeskande ki̱a̱ konda cho̱ xi stso̱ba̱ nga kotsijen cha̱n cha̱a̱n.

³⁰ Ja̱a̱ ꞌbitíkó ndií nga̱ndee̱ cho̱ xi sa̱ko̱ó nga skji̱ni̱e̱, kó ndií tsja maa̱ kjiꞌanga ꞌbi jiín kui cho̱o̱.