Joo̱b 38 - Xo̱jo̱n eén Néná

Néná bi̱ tsꞌén tsíchji̱a̱jo Joo̱b

¹ Néná tsíchji̱a̱jo Joo̱b ndeskande ngi̱jii̱n ngo tjo̱ꞌniú, kó bi̱ katsoó:

² »ꞌYání jí nga ma kon takín nga sꞌijinjín maá kjo̱a̱kjínkónna, kó nga ta̱soboá én xí jmí ni chjíjiín boá xi ndokjo̱e̱ ji.

³ ¡Ja̱ stsitsíjen máráa̱ a kjénraá nga tá chꞌokon sèe̱ yojòo̱! Án mára kuichjiá an ngotꞌe̱, kó ndókjo̱e̱ ji kjiꞌanga tjín ni xi kosíyaá.

⁴ »Tsi kjeén nga ta̱nisién kjínkón ji, tꞌíyéní ñá tindyin ji kjiꞌanga katsꞌenda an nga̱sondiee̱.

⁵ A yé jí ꞌyá xí tsꞌachi̱bo̱a̱, axa̱ kótjín nga nkꞌa, nga ndojó, ko̱jo nga tiyá,

⁶ ti̱nde yejín ji ꞌyá xí íjñá ndi̱jo̱ ngaꞌniuú, ko̱jo kótsꞌèn ítsꞌi̱yanii̱ nga kamánda ngindiee̱!

⁷ ¡Ki̱a̱jín kixindyin ji, tji̱e̱nga kisie ńñoo, ko̱jo nga iskjínkꞌatsja ndítsjiena!

⁸ »Tꞌíyéní ꞌyá xi íchjaá nga̱ntjo̱a̱ ndáfoaa̱ ndáchíkoón kjiꞌanga jatjoxieni ngi̱ndie nínga tji̱e̱n fochó,

⁹ kjiꞌanga iꞌmáni an ngo ṉdi̱ ndáchíkoón, kósꞌe̱ kisꞌiejñó,

¹⁰ ko̱jo nga ijñáa̱ tsindió nínga tji̱e̱n chjiéngá kjo̱chó, kósꞌe̱ ki̱a̱ ijñá an nga̱xto̱n nga̱ntjo̱a̱a̱ nga ichjáꞌniú án,

¹¹ kjiꞌanga bi̱ kixiáa̱n: Ka̱májín ku̱i̱tjéntjée̱n kui tsindioó, kó ngaskande tsí kꞌi̱e̱e̱ nga ka̱má kjo̱chó ngaꞌniuú ndáfoàa̱.

¹² »A jè sa akatíxomée̱ tsꞌueé ngo ta̱jño̱ó nga tindyin ji nga̱sondie, axa̱ a jè sa kiꞌmíyée̱ nga sisi̱eén kóchon ku̱i̱ꞌítsꞌi̱ya nginií ingo ni̱xtjin,

¹³ tsi̱ꞌe̱ nga skjíbé nga̱ndee̱ tꞌanangii̱, kósꞌe̱ ki̱a̱ ku̱i̱ꞌítsaniesón xota̱ xi ꞌniú ndajiín.

¹⁴ Ngije ma sisi̱eén sasíkjo nga̱sondiee̱ kó a̱sie̱én tꞌanangii̱ kjíbé, kje̱ꞌe a̱si̱én má, xikó maá ngo xtjí.

¹⁵ Ta̱nga xota̱ xi ꞌniú ndajiín chjeꞌéxiín ndiꞌií, chaja ngaꞌniuú, kó ki̱a̱ tji̱e̱n niꞌánchaja.

¹⁶ »A jè kꞌin ji nínga ꞌniú na̱nga̱a̱ ndáchíkoón ndeskande nínga tjitjó ndáfoaa̱.

¹⁷ A jè akakoo̱ nga̱ntjo̱a̱a̱ kjo̱a̱bo̱yaa̱, a je kamáyè ji ki̱a̱ nínga botixómá kjo̱a̱bo̱yaa̱.

¹⁸ A jè yé ji kótjín ndojó, ko̱jo nkꞌa ko̱jo tiyá nga̱sondiee̱, tꞌíyéní tsi ja̱koxi̱ nga je ye ji ngayeje kui nii̱.

¹⁹ »A jè yé jí kótsꞌèn fóchó nínga tikón ndiꞌií, a jè yé ji ngi̱ndie nínga tikón jñoó.

²⁰ A ka̱má kꞌuínje̱ ji nínga tji̱e̱n fochó, kósꞌe̱ nga ko̱ké nginíi̱ nínga tikón ndiꞌaa̱.

²¹ ¡Ja̱ jè yé ji, ngatꞌa̱ ja̱bo̱a̱ jè katsen ji! Kó jè kjín nó tjiín nga tindyin ji nga̱sondie.

²² »A jè kꞌintsitsijìi̱n ngi̱ndie nínga xindyiá nchꞌaàn, a jè kamáyè ji ngi̱ndie nínga foaꞌatjó an ndókoaá.

²³ Án boá xi foaꞌatjó an, tsi̱ꞌe̱ ni̱xtjin nga nda̱ ka̱maa̱ xotaa̱, ko̱jo tsi̱ꞌe̱ ni̱xtjii̱n kjo̱a̱xcha̱án.

²⁴ A yé jí ñá xtji̱e̱e̱n nínga ꞌbóka ndiꞌí cho̱ꞌo̱o̱n, a yé jí ñá xtji̱e̱e̱n fí tjo̱ xi ndibání xtji̱e̱e̱n na̱ngi.

²⁵ A yé jí ꞌyání bo̱a̱ xi tsꞌénkáꞌá stsé ꞌniuú, a yé jí ndi̱yà nínga foaꞌa ndiꞌícho̱ꞌoo̱n,

²⁶ a yé jí ꞌyání xi bosíndaá nangi kjitiyaa̱, ki̱a̱ nínga jmí xota̱ síndojín.

²⁷ ꞌYá xí bosíndaá tꞌanangi xi kixií, tsi̱ꞌe̱ nga fotjo nginií ndi̱xcho̱ sa̱si̱e̱e̱.

²⁸ ꞌYání xi na̱ꞌmii̱ stseé, kó ꞌyá xí tsꞌénda xoñoo̱.

²⁹ ¡Tꞌíyéní ñá fotjoni nchꞌaàn kó stséxa̱ xi nchꞌaàn, ꞌyá xí tsꞌénda.

³⁰ Kótsꞌèn nga tajá ndáfoa ndáchíkoón, kó xikoó tsi ndi̱jo̱ ma, kui xi ma nchꞌàn nínga ꞌniú na̱nga̱a̱!

³¹ »A ka̱maári ńꞌniú kuítꞌe ji ńño xi tjín nkꞌa jàn tsi̱ꞌe̱ nga kꞌuíndo xtín, ko̱jo tsi kja̱xín kja̱xín kꞌuínde ji ńño xi chji̱a̱ni Orioo̱n,

³² a ka̱maári nga kuí má chi̱bo̱a̱a̱ nga ka̱matsijen ńño xi tsꞌentsíjee̱n, ko̱jo tsi ji kꞌuiyée̱ ndi̱ya̱à Osa̱ xi je ngasee̱ ko̱jo nga yito xi ndí ndií.

³³ A yé jí kjo̱a̱kiti xi je tikón nga botíxomaa̱ nkꞌajmi jàn, a ka̱maári nga ji ko̱ti̱xomée̱ tꞌanangii̱.

³⁴ »A ka̱maári ꞌniú xchieꞌeyé ji nga ko̱e̱ꞌékjo̱e̱e̱ ṉdi̱i̱, tsi̱ꞌe̱ nga stsé sa̱ngíyá.

³⁵ A ka̱maári nga ji ko̱e̱ꞌékjo̱e̱e̱ ndiꞌí cho̱ꞌo̱o̱n, tsi̱ꞌe̱ nga ko̱e̱je̱ nínga mejeén jí, kó nga: «Kꞌi̱e̱ tindyionjne̱». Ka̱tso̱o̱.

³⁶ Tꞌíyéní ꞌyá xí katsjaá kjo̱a̱kjínkón cho̱ ibii̱s ko̱jo xo̱nda̱xi̱ꞌii̱n.

³⁷ Tꞌíyéní ꞌyání bo̱a̱ xi bo̱a̱ tsꞌén kjínkoón, xi maa̱ ꞌbíxki̱ ṉdi̱i̱, ko̱jo ꞌyání bo̱a̱ xi ka̱maa̱ skjitjón ndáfoa xi ndyi̱a̱a̱ tsi̱ꞌe̱ nga stsé ka̱ma,

³⁸ tsi̱ꞌe̱ nga kꞌo̱ndyi̱ tꞌanangii̱ kjiꞌanga je tikón kixí.

³⁹ »A ka̱maári nga ji ku̱i̱ndyi̱sée̱ ni xi skji̱ni̱e̱ xandi̱je̱e̱, a ka̱maári nga ji xi ko̱e̱ꞌée̱ nichinie ndií,

⁴⁰ tji̱e̱nga kjiyojofé ko̱jo tsi ndyi̱tsꞌènkjaꞌyá ngi̱ya ti̱xa̱na̱xi̱i̱, tji̱e̱nga ndyi̱koyaa̱ chi̱bo̱a̱ nga skji̱ni̱e̱ nichinie.

⁴¹ ꞌYání bo̱a̱ xi tsjaá nichinie ni̱sie kuerboo̱, kjiꞌanga ndií ni̱ma̱ chji̱a̱a̱ Néná, kjiꞌanga tjimá kichajá nga ndyi̱mongase nichinie.