Joo̱b 36 - Xo̱jo̱n eén Néná

Xi ma nijoón ndi̱yà nga tsíchji̱a̱ Eliuu̱

¹ To̱kó bi̱ katsó ngase Eliuu̱:

² «Chiyérachiíní, mejénna xiyaá nga to̱kó tikón ngasena ni xi kuichjiá an kjo̱a̱a̱ kjo̱a̱nda tsi̱ꞌe̱ Néná.

³ Kixi̱ tsꞌensénná Néná, kó kuí boá xí katsjána ngayeje kjo̱a̱kjínkón xi tjínna, kó kuí nii̱ xi kokoo ngotꞌe̱.

⁴ Ja̱koxi̱ boá nga tsꞌénꞌbindisóojín an, ¡tsi ngo xota̱ xi kjínkón timindyisé ji, ja̱ kꞌi̱e̱ tikón an kꞌi̱e̱e̱!

⁵ »Néná achichí ngaꞌniú xí tjiín, kó ngayeje nii̱ xi makjiín kui, nde ngojín xota̱ xi kixi̱ xi tsꞌenchꞌó,

⁶ ꞌboxiéꞌá xota̱ ni̱ma̱a̱ tsi̱ꞌe̱ nga jmíjín xi kjo̱a̱ꞌáxiín kjo̱a̱nda xi tjiín, ta̱nga tsjandièjiín nga kꞌuíndo ngase xota̱ xi ndajiín,

⁷ ngatsjéni̱xtjin nga koo̱n xota̱ xi kixi̱i̱, kó achichí nkꞌa xá xí tsjaá: ¡Tsjandieè nga ngatsjéni̱xtjin ki̱a̱ nijan ko̱tíxomajo̱ ree̱!

⁸ Kó tsi ndyi̱a̱taꞌniú ko̱jo tsi ndo̱bo̱a̱yà síndo, ko̱jo tsi tsie kjo̱a̱ndasen ndyi̱foaꞌatio,

⁹ Néná boá xi bokoó ni xi katsꞌén, ko̱jo nga kjo̱a̱nkꞌakoo̱n boá xi jeé,

¹⁰ kó chji̱a̱jo tsi̱ꞌe̱ nga sa̱ꞌínchji̱ni̱e̱, ko̱jo nga chꞌójín ka̱maa̱, kó míꞌaá nga ko̱ngaboaꞌaá ni xi ndajiín.

¹¹ Tsi kui xi ku̱i̱ntꞌiéꞌeén Néná, kó tsi ki̱a̱ sa̱ꞌínxátꞌaa̱, ngatsjéni̱xtjin nga tsjatsꞌèn ko̱jo nga nda kꞌuíndo,

¹² ta̱nga tsi ku̱i̱ntꞌiéꞌénjiín, nde sku̱i̱e̱jín nga kji̱ndi̱baá kjo̱a̱bo̱yaa̱, kó kju̱i̱e̱són nga kisꞌiejiín kjo̱a̱kjínkón.

¹³ »Xota̱ xi jókje̱e̱n ndyi̱tsꞌènxchánjo̱ Néná, kó nga tjíbotíjeé, jmíni̱xtjin míꞌaá kjo̱a̱nda.

¹⁴ Kuíni nga kjindí nga kjifesón, xikoó maá xota̱ xi ndyi̱tsꞌènmasién yojoo̱.

¹⁵ »Ta̱nga Néná ꞌboxiéꞌá kui xi tsꞌénfoaꞌatio kjo̱a̱ni̱ma̱a̱, kó ngi̱jii̱n kjo̱a̱ndasee̱n bokoyaá tsi̱ꞌe̱ nga ku̱i̱ntꞌiéꞌén,

¹⁶ ta̱nga ngotꞌe̱ ꞌne̱, jè tsꞌaxiéjii̱n ngayeje ni xi nda̱ kjimaa̱, tsꞌéntsjaá tsie nichinie, kó je katsꞌéndé kjin kjii̱n.

¹⁷ »Tsoboaári nga Néná sa̱ꞌínjeé xikótsꞌèn tsꞌénjeé xota̱ xi ꞌniú ndajiín, kó ka̱májiín kꞌuíchjée̱ kui nii̱ ji.

¹⁸ ¡Kuíni nga ꞌniú chíi̱n yojòo̱! Ngata̱ kjo̱a̱cho̱o̱njín xi ka̱maꞌniátakón ji, ngase má tsi ndajín tsꞌén kasako kui nii̱,

¹⁹ ngatꞌa̱ kjo̱a̱cho̱o̱n ko̱jo ngaꞌniúu̱ nde jmí ni ka̱machjíjiín.

²⁰ Ngata̱ chiyéjíi̱n nga ka̱majñoó, ngatꞌa̱ nga jñoó boá nga chaja xota̱ na̱xi̱ńdaá.

²¹ ¡ꞌNiú chíi̱n yojòo̱! ¡Ti̱ꞌinkjìi̱n yojòo̱ ni xi ndajiín, ngatꞌa̱ kuíni nga tsie kjo̱a̱ni̱ma̱ tibitjatí ji ngotꞌe̱!

²² »Néná tjiín ngaꞌniú ko̱jo kjo̱a̱je, kó jmíjín ingo mostro̱ xi xikoó kuí.

²³ Jmíjín xi ka̱ma ku̱i̱ꞌaa̱ xki̱, ti̱nde jmíjín xi ni ka̱tso̱o̱ tsi ka̱matsobéjii̱n.

²⁴ Ngayeje xotaa̱ xi tsꞌéntsjaà kui, kjo̱a̱a̱ ni xi tsꞌén, kó ngatjaꞌátsjiee̱n ji, nga bo̱a̱ si̱ꞌin ji nga.

²⁵ Ngayeje xotaa̱ xi ka̱má sku̱i̱e̱ ni xi tsꞌén, ndatsi ta̱ kjin skotsíjennii̱.

²⁶ Achichí tsie kjo̱a̱je tjiín Néná nga ngaskande nde májín ya, ti̱nde yàjín ñá kótjín nó tjiín.

²⁷ »Néná boá xi tsꞌénkixó tín ndáfoaa̱, kó ꞌbitíkó stseé nga ṉdi̱ má,

²⁸ kó kui ndáfoaa̱ ki̱a̱ fotjoni ngi̱jin ṉdi̱i̱, sꞌe̱ bixónieé xota̱ nga̱sondiee̱.

²⁹ Ta̱nga nde jmíjín xi ka̱maa̱ ka̱tso̱yàná kótsꞌèn matíyá ṉdi̱i̱ ko̱jo ñá fotjoni cho̱ꞌo̱o̱n.

³⁰ Néná boá xi tsꞌénkjién ndiꞌí cho̱ꞌo̱o̱n nga tsꞌentsíjenni nga̱són ndáchíkoón, kó sꞌijñatsijen ngaskande nínga ꞌniú na̱nga̱a̱.

³¹ Ngatꞌa̱ ta̱ngatꞌanii̱ stseé nga tsjaá kjo̱a̱mindyion xota̱ na̱xi̱ńdaá, kó tꞌanangii̱ tsjá tsie nichinie,

³² tsja kjíbéní ngo ndiꞌí cho̱ꞌo̱n, kó ta̱ nínga mejénrií ꞌbojmi.

³³ Cho̱ꞌo̱o̱n bokó nga tikón Néná, kó tjo̱ꞌniuú bokó nga tjitsꞌénxchán.