Joo̱b 35 - Xo̱jo̱n eén Néná

Xi ma jaán ndi̱yà nga tsíchji̱a̱ Eliuu̱

¹ Bi̱ katsó ngase Eliuu̱:

² «Ji amingo̱ Joo̱b, a sꞌijiínri nga tjiín ngakixi̱ ngayeje ni xi je kase ji, ko̱jo nga kixi̱ tindyin ji ngindyikón Néná.

³ Kó nga bi̱ kasée̱ Néná: “Mí ni xi nda ka̱maa̱ tsi tjínna ko̱jo tsi jmíjínna jé”.

⁴ »Ja̱ ndakjiꞌi ja̱ an kuichjiájoo ji ko̱jo amingo̱ xi nijan síndojoo̱.

⁵ Tsitsíjìi̱n nkꞌajmii̱, tsitsíjìi̱n ṉdi̱i̱ kókjiꞌi nkꞌa ngase, ta̱bo̱a̱jiín jí.

⁶ Tsi ndajínkjiꞌi ni xi tiniꞌín ji, jmí ni májiín Néná kó tsi tiniꞌínkjín ngase ji jée̱, ti̱nde jmí ni májiín kui nga.

⁷ Kó tsi kixi̱ ni xi tiniꞌín ji, mí ni xi nda xi tiboeꞌée̱ kui, jmí ni xi nda tiniꞌínjíi̱n Néná.

⁸ ¡Xota̱ xi xikoó jí boá, xi ndajín tsꞌeén ni xi ndajín xi tsꞌén. Kó kje̱ꞌe xota̱ xi xikoó jí boá, xi nda tsꞌeén kjo̱a̱kixi̱ xi niꞌín ji!

⁹ »Achichí ni xi ndajín xi tjín kuí nga̱sondiee̱, nga xotaa̱ míꞌá nga ko̱siko̱jo, tsi̱ꞌe̱ nga kjo̱tjongii̱ yojoo̱ ngi̱ya tsja xota̱ xi tjiín ngaꞌniuú.

¹⁰ ¡Ta̱nga nde ngojín xi mongase Néná, kui xi tsjangaꞌniúná nga jñoó! Nde ngojín xi bosíyá kjo̱a̱a̱ kui Néná xi katsꞌéndaná,

¹¹ kui xi bokoyá ngasená ta̱bo̱a̱jiín cho̱ tamá xí tjín tꞌanangii̱, kó tsie ngase kjo̱a̱kjínkón tsjáná ta̱bo̱a̱jiín ni̱sie xi tjín nkꞌa jàn.

¹² Ki̱a̱ boá nínga ni̱ma̱ ka̱tso̱o̱ Néná nga ku̱i̱chji̱a̱a̱, ta̱nga kui nde ku̱i̱ntꞌièjiín ta̱ngatꞌanii̱ kjo̱a̱nkꞌakoo̱n.

¹³ ¡Kuíni nga Néná xi tsi̱ꞌe̱ ngayeje ngaꞌniuú, tsꞌensénjiín ni xi jmí ni chjíjiín xi ta̱xkiya míꞌá xotaa̱!

¹⁴ Ndatsi bo̱a̱ tꞌísé ji nga yejín ji kje̱n Néná, chiyékjo̱e̱ ji, ngatꞌa̱ jè ngi̱ya tsja kui tikón kjo̱a̱ xi tse̱.

¹⁵ Ji xi bi̱ se ji nga Néná tsꞌénxchánjín, ti̱nde botíjéjínná, ko̱jo nga nde ki̱a̱jín tsꞌenseén ni xi ndajín xi tsꞌén xota̱ nga̱sondiee̱,

¹⁶ ta̱nga nga ja̱koxi̱ ji Joo̱b, jmí ni chjíjiín ni xi tꞌísé ji, achichí ni xi tindokjo̱e̱ ji, ta̱nga nde yejín ji ni xi tꞌísé ji».