Joo̱b 34 - Xo̱jo̱n eén Néná

Xi ma joó ndi̱yà nga tsíchji̱a̱ Eliuu̱

¹ Kó bi̱ katsó ngase Eliuu̱:

² «Jún xi xota̱ kjínkónjnú, ko̱jo jún xi xota̱ chji̱ni̱e̱jnú, nda nda má tasiénijónjnúꞌun ni xi ku̱i̱chji̱a̱ an.

³ Tsi máná chitꞌa kókón nichiniee̱, ti̱ ka̱máná nda ko̱nda̱ꞌyá kó tsó eén nga.

⁴ Kuíni nga stsitsíjen cha̱n cha̱a̱n kókjiꞌi kui kjo̱a̱a̱, tsi̱ꞌe̱ nga xcha̱ ꞌyání xi tjiín ngakixi̱.

⁵ »Jè bi̱ katsó Joo̱b: “Jmí jéjínna, ta̱nga Néná mejénjiín nga kixi̱ tsꞌén sa̱ꞌínsénna,

⁶ xota̱ xi kixi̱ án, ta̱nga xikó maá tsi ngo xi tsꞌénꞌbindísó kjima an, nde ngo jé katsꞌénjín an, ta̱nga Néná katsꞌénꞌónna tsi̱ꞌe̱ nga ko̱yà án”.

⁷ »A tjín ingo xota̱ xi xikoó Joo̱b tsobo̱a̱, xi ngatsjéni̱xtjin mojnókie ngayeje nii̱.

⁸ Achichí tsjá maá nga ki̱a̱ fotsoꞌbájo̱ xota̱ xi ꞌniú ndajiín, kó tsꞌénkámajo̱ xota̱ xi ndajiín.

⁹ ¡Kó ngotꞌe̱ ꞌne̱ bo̱a̱ tjítsó nga jmí ni chjíjín xoò nga si̱ꞌankjatjosón ni xi mejeén Néná!

¹⁰ »Ta̱nga jún xota̱ xi kjínkón boá jún, kuíni nga nda nda má tasiénijónjnúꞌun ni xi xiánjnúꞌun. ¡Ndeskande chjiénjín nga si̱ꞌankjó nga kui Néná xí tsi̱ꞌe̱ ngayeje ngaꞌniuú sa̱ꞌín ngo ni xi kixi̱jín kjiꞌi!

¹¹ Ngatꞌa̱ kuí boá xi ku̱i̱ꞌíchjií xota̱ nga̱sondiee̱ ta̱ xikó kjiꞌi ni xi katsꞌén, kó tsja̱á xikó kjiꞌi ni xi tsoboaá.

¹² Nga ja̱koxi̱ Néná xí tsi̱ꞌe̱ ngayeje ngaꞌniuú tsꞌénjín ni xi ndajín ko̱jo ni xi kixi̱jín.

¹³ ꞌYá xí íjñá ngi̱ya tsja kui tꞌanangii̱, ꞌYá xí atíxomaa̱ nga ku̱i̱ꞌíndonda ni xi tjíndo kui nga̱sondiee̱,

¹⁴ Tsi Néná xí tjítsꞌénkjó nga kjo̱a̱ꞌáxínná a̱si̱énni̱xtjii̱n, ko̱jo tsi skjíbé nginí kjo̱a̱mindyion xi katsjáná,

¹⁵ ¡ngayeje ñá nga ko̱yà, kó chojo ka̱má nginí ngayeje xota̱ nga̱sondiee̱!

¹⁶ »Kó ji Joo̱b, tsi ja̱koxi̱ nga xota̱ xi kjínkón ji, nda nda má tasínijìnní ni xi xián án.

¹⁷ Tsi Néná chꞌoó kjo̱a̱kixi̱i̱, ka̱májiín ko̱tíxomaa̱ kui nga̱sondiee̱. Kuíni nga ka̱májín nga kui Néná xí kixi̱i̱, ko̱jo xi tjiín ngaꞌniuú kꞌuítꞌejé jí.

¹⁸ A ka̱má xota̱ xi ꞌniú ndajín kꞌuiín ree̱, kó a ka̱má xota̱ xi kixi̱jín kꞌuiín xota̱ xi yandikoón.

¹⁹ Néná katsꞌéndaná ngayeje ñá, tsi xota̱ ni̱ma̱ ko̱jo tsi xota̱ xi cho̱n, jmíjín xi tjó ngasee̱ kui.

²⁰ Ta̱niján má fesón xota̱ nga̱sondiee̱, kó nga ma masien ni̱xtji̱e̱e̱n tsꞌénxchán xota̱ na̱xi̱ńdaá, kó chaja ngi̱jin a̱si̱én, kó xota̱ xi tjiín ngaꞌniuú, nde jmí ngaꞌniú niꞌánkjiénjiín nga niꞌánchaja.

²¹ »Néná ngatsjéni̱xtjin nga tsꞌénkonda ngayeje ni xi tsꞌén xota̱ nga̱sondiee̱.

²² Ngaskande nga ni̱xtji̱e̱n xi ꞌniú jñoó májín ꞌbíndoꞌmá xota̱ xi tsꞌén ni xi ndajiín.

²³ Néná íjñájiín ngo ni̱xtjin xota̱ nga̱sondiee̱ tsi̱ꞌe̱ nga kjo̱chó ngindyi̱ko̱n kui, nga sa̱ꞌínjeé,

²⁴ ti̱nde chjiénjín nga ko̱ngasendièmára tsi̱ꞌe̱ nga sa̱ꞌínkjié xota̱ xi chꞌokon tsoó yojoo̱, ko̱jo nga kje̱ꞌe xí ku̱i̱ꞌíndo ngi̱ndiee̱.

²⁵ Néná jè be ni xi ndyi̱tsꞌèn ngayeje xotaa̱, kó nga má jñoó foaꞌáxiín ngaꞌniú xí tjiín, kó tsꞌenkjié ndo̱jò ndójo̱,

²⁶ ngindyikón ngayeje xota̱, botíjeé kjo̱a̱a̱ nga ndajín katsꞌén,

²⁷ ngatꞌa̱ ngiti̱ tsintꞌiéꞌénjiín, kó ta̱sá íjñámasien kjo̱a̱botíxomaa̱ Néná,

²⁸ achichí nga ndajín katsꞌénjo̱ xota̱ ni̱ma̱a̱, nga ngaskande Néná tsintꞌieé nga ndyi̱kjandayà nga ko̱siko̱jo.

²⁹ Ta̱nga tsi Néná xí mejeén nga xió kꞌuijñá, ꞌyá xí ka̱maa̱ sa̱ꞌínchꞌó nga bo̱a̱ sa̱ꞌín. Tsi kui xi mejénjiín nga ko̱kó yojoo̱, ꞌyá xí ka̱maa̱ sku̱i̱e̱ kje̱n. Ta̱nga Néná, kuí boá xi tsꞌénkotsijee̱n ngayeje na̱xi̱ńdá ko̱jo xota̱ xi tjín nga̱sondiee̱,

³⁰ tsi̱ꞌe̱ nga kuijín xota̱ xi ndajiín xi ko̱tíxomaa̱, ti̱nde ku̱i̱ꞌíndisojo̱jín xota̱ na̱xi̱ńdaá.

³¹ »Ndara̱ kjiꞌi tsi bi̱ kꞌuíi̱n Néná: Jè akatíjéní, kó ngiti̱ sa̱ꞌinjéjín an.

³² Takéní ni xi bejín an, kó tsi ndajín katsꞌen an, ngiti̱ bo̱a̱jín sa̱ꞌin an,

³³ kó, a xikótsꞌèn mejeén jí, a bo̱a̱ ka̱ma katsaki, jmí, Néná boá xi sa̱ꞌín ngo ni xikótsꞌèn mejeén kui, jmí tsi ji, ta̱nga tsi ye ngase ji kje̱ꞌe ni, ja̱ ndókjo̱e̱ ji tsobo̱a̱.

³⁴ »Jún xi ndyi̱ndaꞌyájnúꞌun xota̱ xi kjínkónjnú ko̱jo xi chji̱ni̱e̱jnú, kuíni chjiéngá si̱ꞌanjo̱ꞌojnú,

³⁵ nga ta̱chiboa chji̱a̱ Joo̱b, kó nde jmí xki̱jiín ni xi tsó.

³⁶ Mejénna nga Joo̱b xchítꞌayákón ni xi je tsíchji̱a̱, ngatꞌa̱ xikó má tsꞌén chji̱a̱ xota̱ xi ꞌniú ndajiín, bo̱a̱ má tsꞌén chji̱a̱.

³⁷ Jmí tsi ta̱ katsꞌénjé tsí Joo̱b, ti̱ kitikjo̱a̱ kamá nga, tsajnókiejne̱ ji̱n nga katsꞌéntsen má tsja, kó achichí chꞌo katsoó Néná nga».