Joo̱b 33 - Xo̱jo̱n eén Néná

¹ »Ji amingo̱ Joo̱b, ꞌniú míꞌaá nga nda nda má tasínijìi̱n nga ngo nga ngo ngayeje én xí kuichjiájoo.

² Jè tsꞌénkjíxꞌá án ndso̱ꞌba án, kó jè ka̱tse̱ má kjimaa̱ najén án.

³ Nga ngo nga ngo én xí kuichjiá an ngi̱jin ini̱ma̱na fotjoni, kó ni xi kuichjiá an, ni xi kixi̱ boá.

⁴ A̱si̱énni̱xtjii̱n Néná boá xi katsꞌéndana, kó tjo̱ xi yítsiéna xi tsi̱ꞌe̱ ngayeje ngaꞌniuú, kuí boá katsjána kjo̱a̱mindyion.

⁵ Ndókjo̱e̱ꞌéni tsí ka̱maa̱, ti̱ndyinde ji tsi̱ꞌe̱ nga xchi̱boátí.

⁶ Ngindyi̱ko̱n Néná, ji ko̱jo an ndse̱je̱n ñá, ngatꞌa̱ ti̱ chojo kamándani an nga.

⁷ Kuíni nga, ngata̱ ndakinjín máni, ngatꞌa̱ jmí tsí ni xi ndajín sa̱ꞌínjoo̱ ji.

⁸ »Nga ja̱koxi̱ jí boá xi bi̱ kase ji, kó to̱kó tsꞌéntꞌie tsjé an nga bi̱ tꞌísé ji kjimana:

⁹ “¡Tsjie án, jmí jéjínna! ¡Jmí jéjínna, kó jmíjínna ni xi ndajín!

¹⁰ Néná boá xi tjítsó nga tjínna jé, kó xikoó tsi kondra̱a̱ kui kjimaa̱ an.

¹¹ Tjitáꞌniúrií an, xikoó tsi ńꞌniúki̱cha̱ tjítꞌaa̱ an, kó nga ngo ni̱xtjii̱n nga an tsꞌénkondana”.

¹² »Kixi̱jín ni xi tꞌísé ji, ngatꞌa̱ Néná je ngase ta̱bo̱a̱jiín xota̱ nga̱sondiee̱.

¹³ Kó míkjo̱a̱a̱ nga kui mejeén ku̱i̱xkénje̱ ji, jmí kjo̱a̱jín nga kui sa̱ꞌínseén ni xi tꞌísé ji.

¹⁴ Ta̱nga Néná tsi ngo ko̱jo tsi jó to̱ko̱ya tikoón xikótsꞌèn chji̱a̱joná, ta̱nga xotaa̱ makjínjiín,

¹⁵ tjín ni̱xtjin nga Néná ngi̱jin ńjñáná chji̱a̱joná, kjiꞌanga tjèn ndyi̱tsjayojofé,

¹⁶ ko̱jo tsi ngi̱ya tji̱bo̱a̱nijón chji̱a̱ya, kó tsóyá cha̱n cha̱nná kjo̱a̱botíxomaa̱,

¹⁷ tsi̱ꞌe̱ nga ngiti̱ si̱ꞌán jàn ñá ni xi ndajín, ko̱jo nga ngiti̱ nkꞌakonjín ka̱má,

¹⁸ ngatꞌa̱ bo̱a̱ tsꞌén nga kꞌo̱xiéꞌáná ngi̱ya tsja kjo̱a̱bo̱yaa̱, ko̱jo tsi tsi̱ꞌe̱ nga jmíjín xi chꞌo tsꞌén sa̱ꞌínkꞌiénná.

¹⁹ »Tjín ni̱xtjin nga Néná botíjéná, nga tsjáná xí so xi ndakjan ngi̱jin ńdaná.

²⁰ Nga ngaskande ngiti̱ ma bojójínná, kó ini̱ma̱ná ngaskande ngiti̱ jmí ni fijénjiín,

²¹ xíyà kjin kjin yojoná, kó ngaskande yà má ńdaná.

²² Kó bo̱a̱ tsꞌén yà nga je kjima tiñáná kjo̱a̱bo̱yaa̱.

²³ »Ta̱nga tsi ki̱a̱ tikóntꞌaa̱ ngo ndítsjie ndeta̱ ngo chií kui xi mi̱ ma xi tjiín Néná, xi ka̱tso̱yaa̱ ndi̱yà xí nda xi chjiéngá ko̱e̱je̱,

²⁴ tsi ni̱ma̱ ka̱maa̱, kó bi̱ ka̱tso̱o̱ Néná: ꞌNa̱xiéꞌé ji ngi̱ya tsja kjo̱a̱bo̱yaa̱, ngatꞌa̱ jè kasakoséna kótsꞌèn kjo̱tjoꞌa.

²⁵ Kósꞌe̱ yojoo̱ ka̱makjindiyà nginí, kó xikó maá tsi tsi̱ꞌe̱ ngo nda̱chií ka̱ma ngijee̱.

²⁶ Kósꞌe̱ ni̱ma̱ ka̱tso̱ nga ku̱i̱chji̱a̱a̱ Néná, kó Néná tsja̱á kjo̱a̱ndaa̱, kó tíkje̱n tíkje̱n sku̱i̱e̱, kó tsjá ka̱maa̱, kó Néná kixi̱ tsꞌén sa̱ꞌínseén.

²⁷ Kósꞌe̱ bi̱ ka̱tso̱o̱ ngayeje xota̱ nga̱sondiee̱: “Ndatsi katsꞌenjé án, kó kixi̱jín kamá an, ta̱nga Néná katsꞌénjéjínna xikótsꞌèn tsoboána katsaki.

²⁸ Néná kꞌo̱xiéꞌá ini̱ma̱na tsi̱ꞌe̱ nga ko̱e̱je̱jín ngi̱ya nga̱tsjo̱ó, kó sku̱i̱e̱ nginí ndiꞌií”.

²⁹ »Ngayeje kui nii̱ xi tsꞌén Néná ta̱ xikó kjiꞌi ndi̱yà mejénrií kui,

³⁰ tsi̱ꞌe̱ nga kꞌo̱xiéꞌá ini̱ma̱ná nga ko̱yàjín ñá kó ta̱sá ku̱i̱ndyionra ngase nga̱sondie.

³¹ »Ji amingo̱ Joo̱b, ngata̱ bichékjéjíi̱n ni xi tsꞌénchji̱a̱ an, ¡tasínijin ndé ndéní ni xi xiaán!

³² Ta̱nga tsi tjiín ngo ni xi ko̱ndókjo̱e̱ ji, ja̱ ndókjo̱e̱ tsobo̱a̱, achichí tsjá ka̱mana nga skuie an nga jmí jéjiín.

³³ Tsi jmíjiín ni xi ko̱ndókjo̱e̱ ji, xió tindyin, kó ndaꞌyéní, kó án kokoyaá kótsꞌèn kꞌuieé kjo̱a̱kjínkón».