Joo̱b 32 - Xo̱jo̱n eén Néná

Nga tjón tsíchji̱a̱ Eliuu̱

¹ Kjiꞌanga kamákjiín nga ján kui jaá nga Joo̱b nda tsꞌaxié yojoo̱, ngiti̱ jmí ni katsójiín.

² Ta̱nga ngo nda̱ xi ꞌmí Eliuu̱ achichí ꞌniú katsꞌénxchánjo̱ Joo̱b, ngatꞌa̱ nda ngase tsꞌaxié yojoo̱ ta̱bo̱a̱jiín Néná. Eliuu̱ ndií Barakee̱l boá, ndíndee̱ Buu̱, xota̱ ngo ndiꞌaa̱ Raa̱n.

³ Kó ti̱ katsꞌénxchánjo̱ ngaján já amingoo̱ Joo̱b, ngatꞌa̱ ja̱bo̱a̱ je ítꞌajé, kó kji̱e̱ bokójín nga Joo̱b xi konnii̱.

⁴ Eliuu̱ ja̱bo̱a̱ jè kamámejeén tsíchji̱a̱ ngindiee̱, ta̱nga ta̱sá xió kisꞌijña ngatꞌa̱ Joo̱b ko̱jo já amingoo̱ xchá ngase ta̱bo̱a̱jiín kui.

⁵ Ta̱nga ngije kamábe Eliuu̱ nga ngaján já amingoo̱ Joo̱b ngiti̱ jmí ni xi katsójín, achichí katsꞌénxchán,

⁶ kó ítsꞌi̱yanii̱ nga tsíchji̱a̱. Bi̱ katsó Eliuu̱: «Ti̱ꞌanjetakónjnú nga kuichjiá an, ngatꞌa̱ kjindí ngase an, kó jún jè xchájnú, kuíni nga achichí katsakjon an nga kuichjiá an ni xi tjítsꞌenkjó án.

⁷ Bi̱ tsꞌén katsꞌenkjó án: Xota̱ xi xchaá, kuí boá xi ngatíchji̱a̱, kó xota̱ xi je ꞌniú xchá ngasee̱ ngatakoyá kjo̱a̱kjínkón xi tjiín.

⁸ Nga ja̱koxi̱ xota̱ nga̱sondiee̱ tikónjii̱n ngo a̱siénni̱xtjin, ngo tjo̱ xi katsjaá Néná xí tsi̱ꞌe̱ ngayeje ngaꞌniuú, kó kuí boá kui a̱si̱énni̱xtjii̱n xi tsjaá kjo̱a̱kjíntakón.

⁹ Ta̱nga jmí tsi kjo̱a̱a̱ nga je xchá, sꞌe̱ xota̱ xi tjiín kjo̱a̱kjíntakón ka̱má, ti̱nde jmí tsi xota̱ xi je ꞌniú xchaá xi makjiín kjo̱a̱kixi̱i̱.

¹⁰ »Kuíni nga bi̱ kixian an: Ndaꞌyájnúꞌun ni xi xián án, ngatꞌa̱ ti̱ tjínna kjo̱a̱kjínkón.

¹¹ Tji̱e̱nga ndyi̱ndokjo̱a̱jnú jún, kó ndyi̱mindyiséjnú én nda xi ko̱ndókjo̱a̱jnú, askoyá xió xió an, nga tsintꞌièe̱ ni xi je kandokjo̱a̱jnú.

¹² Jè tsintꞌie nda ndajnúꞌun, ta̱nga nde ngojín jún xi kamaá tsíchji̱a̱ꞌa Joo̱b, nde ngojín jún xi kamaá nga bo̱a̱jín kjiꞌi ka̱tso̱ kjo̱a̱a̱ ni xi tsíchji̱a̱.

¹³ »¡Ngata̱ bi̱jín ꞌmíjnú ngotꞌe̱: jè kasakoná kjo̱a̱kjínkón, kó ta̱sá Néná, jmí tsi xota̱ nga̱sondie xi ngatíchji̱a̱ꞌa Joo̱b!

¹⁴ Jmí tsi an xi tjítsóna Joo̱b, kuíni nga bo̱a̱jín tsꞌén ku̱i̱chji̱a̱ an xikó kiꞌmíjnú jún.

¹⁵ »Ji Joo̱b, já amingo̱o̱ kamátsobéjinrií, kuíni nga ngiti̱ jmí ni ndyi̱tsójín ngase, ngatꞌa̱ jè ngiti̱ jmíjiín ni xi ku̱i̱chji̱a̱.

¹⁶ Jè askoyá an, ta̱nga ngiti̱ tsíchji̱a̱jín ngase, ta̱sá xió kisꞌińdo, kó ngiti̱ jmí ni katsójín!

¹⁷ Kuíni nga án boá xi kuichjiáꞌaa̱, ngatꞌa̱ ti̱ tjínna kjo̱a̱kjíntakón.

¹⁸ Achichí én xí tjíjinna xi kuichjiá an, kó jè ngiti̱ chikjo̱a̱jínna nga jmí ni tꞌíxiánjín an.

¹⁹ An jè xikó maá ngo ti̱jìtjíxin xí ndyi̱a̱ bino̱, ¡kó je mejeén xtjiyà an!

²⁰ Chjiéngá kuichjiá an, ¡chjiéngá kjo̱a̱ꞌajenda an!

²¹ Nde ngojín jún xi nijan ka̱ma an, ti̱nde jmíjín xi kjo̱a̱ndaa̱ kotíjña̱ an,

²² ngatꞌa̱ tsjajín mána nga tjín xí nkꞌa ꞌbijñá an, tsi bo̱a̱ sa̱ꞌin an, Néná ko̱tíjéna.