Joo̱b 30 - Xo̱jo̱n eén Néná

¹ »¡Ta̱nga ngotꞌe̱ ꞌne̱ ngaskande xota̱ xi kjindí ngase xikoó an ndyi̱mojnókiena! ¡Kui xi ngaskande xi xchaá tsjandièjàa̱n nga ki̱a̱ kꞌuíndojii̱n ńñá xi koón cho̱tsa̱nga̱na!

² ¡Kó sa̱ꞌín kui xotaa̱, xi je ngiti̱ jmí ngaꞌniújiín!

³ Ta̱ngatꞌanii̱ nga ni̱ma̱ ko̱jo nga bojó kamaá, kuíni nga kisꞌiṉtso̱ma soboá, kó nga ni̱xtji̱e̱e̱n kisꞌiṉtso̱ma ngi̱ndie kjitiyaa̱, nga iskjiniejon ja̱ma̱ xi je kixí.

⁴ ¡Ki̱a̱ kisꞌiṉtso̱ma ngi̱jin kꞌijñaá, nga ítikó xka̱ sa, kó ta̱soboá ja̱ma̱a̱ yá boá xi iskjinie!

⁵ Kuí boá xi xota̱ xi katsꞌénchꞌó na̱xi̱ńdaá, kó askjandáyátji̱ngii̱ xotaa̱ xikó má niꞌánjo̱ chejeé.

⁶ Kuíni nga ki̱a̱ kisꞌińdo xo̱ngà kixíyaà, ko̱jo ngi̱ya ti̱xa̱na̱xi̱i̱, ko̱jo ngi̱jin ndi̱jo̱ yiꞌii̱,

⁷ tjimá ngi̱jin kꞌijñaá, nga ndyi̱kjandayà xikoó bórró.

⁸ Xota̱ xi jmí ni chjíjiín boá, ¡kuíni nga kaꞌnaxiéni ngi̱jii̱n na̱xi̱ńdaá!

⁹ »¡Ta̱nga ngotꞌe̱ ꞌne̱ án boá xi ndyi̱mojnókiena, kó ngaskande énkjàn chji̱a̱ kjo̱a̱a̱ an!

¹⁰ ¡Achichí chꞌo maá an, kó mongaboaꞌána, kó ngaskande botítiajón má kje̱n án!

¹¹ Kó nga Néná ni̱ma̱kjo̱a̱ íjñána, ko̱jo nga tsie kjo̱a̱ni̱ma̱ tjítsꞌénkjáꞌana, achichí chꞌo tsóna nga mojnókiena.

¹² Achichí kjín má nga ndyi̱kjánjo̱na xtji̱e̱e̱n nínga kixi̱na, kó tsangińña kꞌi̱e̱ tsangińña ngajánna, ngatꞌa̱ mejeén nga kꞌo̱ka an ko̱jo nga xcha̱ja an.

¹³ Kixindyiachjá ndi̱yà nínga foaꞌa an, ngatꞌa̱ kamámejeén sa̱ꞌínkꞌiénna, kó nde ngojín xi íchjaá nga bo̱a̱ katsꞌén.

¹⁴ Ndyi̱kjánjo̱na xikó maá ngo xtín jájún xi je katsꞌéntsi̱ꞌe̱ ngo na̱xi̱ńdá, nga tjimájin xó xí je ixóndoó.

¹⁵ Kjifotsié ndikón má án, ngiti̱ jmíjín xi bendikónna, kó kjo̱a̱cho̱nna kichajá xikoó ṉdi̱i̱.

¹⁶ »Jè kjiꞌme an, achichí ndasen tikón ini̱ma̱na, jè tjítsꞌénchajana kjo̱a̱ni̱ma̱ xi tsꞌénfoaꞌatio an.

¹⁷ Ngatꞌa̱ nga jñoó jè ngiti̱ xixiójín kui xi so xi ndakjaa̱n.

¹⁸ Néná jè xikoó tsi iskjíbé kjásén án, kó xikoó tsi tjítsꞌénxíndona,

¹⁹ kuí boá xi tsꞌajmijinna ngi̱jin ndásee̱, kó án jè xikónií tsi ndiso ko̱jo tsi chojo kamá an.

²⁰ »Ji Ne, ji chjiaá, ta̱nga ji ndaꞌyéjínní, fí an ngindyikin ji, kó ndeskande tsitsijinjínní.

²¹ Achichí nga ndajín tiniꞌínje̱ní, kó ngaꞌniúu̱ niꞌínkjìn jí nga niꞌínꞌínní,

²² chjaninkꞌéní nga foaꞌa tjo̱o̱, kó ki̱a̱ bichijmijìnní ngi̱jii̱n tjo̱ꞌniuú,

²³ kó jè be án nga kjiꞌa kjo̱chó ni̱xtjin ki̱a̱ kꞌuínje̱ní kjo̱a̱bo̱yaa̱, nínga tikón ngi̱ndie nínga ku̱i̱ndyionjne̱ ngatsjéni̱xtjin.

²⁴ «Ta̱nga ngojín xi ku̱i̱ꞌeé ngo xi je kiniꞌánchaja, kui xi ngije nda̱ kjimaa̱ ku̱i̱ꞌa nga ko̱siko̱jo.

²⁵ Ta̱sá askjandájo̱ an xota̱ xi tsie kjo̱a̱ni̱ma̱ jaꞌatio, kó on kamána ni xi kamátaꞌin xota̱ ni̱ma̱a̱.

²⁶ Ta̱nga nga tsꞌénkoyàa̱ ni̱xtjin xi ndaa̱, ta̱sá ni̱xtjin xi ndajiín jeꞌe, kó kjiꞌanga askoyáa̱ nga tsijen ka̱mana, ta̱sá ni̱xtjin xi jñoó kjindibá.

²⁷ Ngatsjéni̱xtjin nga achichí ni xi kjimaa̱ ini̱ma̱na, ngatꞌa̱ ndyiojón ndyiojón tsie kjo̱a̱ni̱ma̱ tsꞌénfoaꞌatio an.

²⁸ Achichí ndasen tikón an, xikó má chon má nga xindyiá ṉdi̱, mongase an nga ko̱síko̱jona xotaa̱, ta̱nga ta̱ꞌyajín xi bosikójona.

²⁹ Xikoó tsi ntsꞌié án má cho̱ tamá xi ꞌmí chakaa̱l, kó xikoó tsi amingo̱na ma ni̱sie abestruu̱.

³⁰ Jè kjifondo tji̱xin yojona kó chíchi̱ chíchi̱ kjibixóndó, xikoó tsi tjítíngajón má ńdana nga ndyi̱a̱na ṉtꞌe̱.

³¹ Arpa̱na jè só xa̱ꞌya̱ kjifoniee̱, kó yána̱xo̱na jè só ndasen kjifoniee̱ nga.