Joo̱b 3 - Xo̱jo̱n eén Néná

Nga ni̱ma̱ katsó Joo̱b

¹ Ti̱chaa̱n jachó chi̱bo̱a̱ nga Joo̱b ngiti̱ kichikjo̱a̱jín ngasee̱, kó ítsꞌi̱yanii̱ nga chꞌo tsꞌén tsíchji̱a̱ kjo̱a̱a̱ ni̱xtjin nga katsen.

² Kó bi̱ katsó:

³ «Nganiꞌánkjié ni̱xtjin nga katsen an, ko̱jo ni̱xtji̱e̱n nga bi̱ kiꞌmí: “¡Xi̱ꞌin kamá kui ndií!”

⁴ ¡Ngatamajñó kui ni̱xtjii̱n, kó nga boaꞌaxki̱jín Néná, ti̱nde nga sisi̱e̱njín!

⁵ ¡Ngo tji̱nkꞌi̱e̱én xí ꞌniú jñó ngatsꞌénjñó, ko̱jo tsi ngo ṉdi̱ jñó ngasꞌijñajin, chꞌo ngatsꞌénkꞌié, xikoó tsi ngo ni̱xtjin xi ꞌniú ndajín!

⁶ ¡Jñoó ngatsꞌén tsi̱ꞌe̱ kui ni̱xtjii̱n, kó nga ngojín xi ꞌbíxki̱, xikoó ngo ni̱xtjii̱n noó, ko̱jo tsi saá!

⁷ »¡Ngo ni̱xtji̱e̱n xi tiya ngatama! ¡Kó nga ingojín xi nga kjandayà tsja!

⁸ ¡Chꞌo nga tsoó, kui xi ngatꞌíko̱jonii̱ tsoó ni̱xtjii̱n, kui xi maa̱ tsꞌénkjáꞌaá lebiataa̱n, cho̱ chꞌokjiꞌii̱ ndáchíkoón!

⁹ ¡Ngasꞌijñó ńño ndibáꞌásie̱én kui ni̱xtji̱e̱e̱n, nga koyaa̱ nga ka̱matsijen, ta̱nga nga ma tsijénjín!

¹⁰ Ngatꞌa̱ íchjájín ndo̱bo̱a̱ndií na̱anna, nínga tikónꞌya an, kó katsjandiè nga katsꞌen an, ti̱nde íꞌmájiín ndyikón án ngayeje kjo̱a̱ni̱ma̱ xi tjiín.

¹¹ »Ánní nga ta̱sájín kꞌien an ngi̱ya ndo̱bo̱a̱ndií na̱ana. Ko̱jo tsi kjiꞌa má kꞌien an nga katsen an katsaki.

¹² Míkjo̱a̱a̱ nga kisꞌie kon tikó xí kixindyia nga katsen an, ko̱jo nga kisꞌie kon chiki xi katsjána ndáchíkí.

¹³ Ngatꞌa̱ tsi kꞌien an kjiꞌa, ngotꞌe̱ ꞌne̱ xióra̱ kjiꞌifé an, kó xióra̱ tjítsꞌenkjaꞌyà an tsobo̱a̱,

¹⁴ nínga síndo já ree̱, ko̱jo xota̱ xi tsjá kjo̱a̱botíxomaa̱, kui xi katsꞌénda ngasꞌe̱ ndiꞌa yiꞌi xi je ixóndó ngotꞌe̱,

¹⁵ ko̱jo tsi xota̱ xi botixómá xí íkitsie maá to̱nsinié ko̱jo to̱ntiboa ndo̱bo̱a̱xa̱á.

¹⁶ »Ta̱sara̱ ndatsi ikꞌínijín ꞌmána, xikótsꞌèn ꞌbínijín ndí xí tsenxtió, kui xi jmíni̱xtjin be ndiꞌií.

¹⁷ Ki̱a̱ kjo̱a̱bo̱yaa̱, xota̱ xi ꞌniú ndajiín, ngiti̱ jmí ni májiín tsꞌén ngase, kó ki̱a̱ boá nínga tsꞌénkjaꞌyá xota̱ xi je jendaa̱.

¹⁸ Ti̱ ki̱a̱ boá nínga tsꞌénkjaꞌyá xota̱ xi síndo ꞌniuú, nínga ngiti̱ ntꞌiéjiín nda̱ xi botixómaá xaá.

¹⁹ Ki̱a̱ nínga tikón kjo̱a̱bo̱yaa̱, ki̱a̱ síndo xi xchá xí kjindí, ko̱jo xota̱ xi mosoo̱, kui xi je kamándé ngi̱ya tsja ndi̱a̱a̱.

²⁰ »Míkjo̱a̱a̱ nga Néná tsjandiè nga tsen xota̱ xi kjo̱a̱ni̱ma̱ kjo̱a̱ꞌatio nga kꞌuíndo nga̱sondiee̱. Míkjo̱a̱a̱ nga to̱kó tsꞌénkꞌíndora nga̱sondie xota̱ xi síndo xtindaa̱,

²¹ kui xi ndyi̱koyaa̱ kjo̱a̱bo̱yaa̱, kó fochójín, ndatsi xikó maá ngo ti̱jìto̱n nga ndyi̱mongase.

²² ¡Achichí ꞌniú tsjá ka̱maa̱ tsi tsá kju̱i̱e̱són katsaki!

²³ »Míkjo̱a̱a̱ nga Néná tsjaá kjo̱a̱mindyion ngo xota̱ xi nde bejín nínga tsꞌénfí, ko̱jo kui xi Néná je íchjaá nga̱ntjo̱a̱.

²⁴ Kjo̱a̱foaꞌatsꞌíꞌoón boá xi ni chiniena, kó ndándyíkón án tjitjón xikó maá tsi ndáfoa.

²⁵ Ngatꞌa̱ jè kjindibániéna ni xi indyiándikónna, kó jè kjifotjosón nga kjima ni xi katsakjonña an nga ka̱ma.

²⁶ Ngiti̱ jmíjínna kjo̱a̱xió, ko̱jo kjo̱a̱niꞌánkjaꞌyá, ta̱sá má achichí nda̱ kjimana».