Joo̱b 28 - Xo̱jo̱n eén Néná

Soó kjo̱a̱kjínkoón

¹ «To̱ntiboaa̱ ki̱a̱ ꞌnaxiéni ti̱xa̱na̱xi̱i̱, kó to̱nsinieé ndiꞌií boá xi niꞌántsjieni.

² Ki̱cha̱ ndaa̱ ki̱a̱ ꞌnaxiéni ngi̱jin chojoo̱, kó ki̱cha̱ kobree̱ ngi̱jin ndi̱jo̱o̱ ꞌnaxiéni.

³ Xota̱ xi tsꞌénxá ngi̱ya ti̱xa̱na̱xi̱i̱, boaꞌa ndiꞌí xí tsꞌentsíjee̱n nínga ꞌniú jñoó tꞌanangii̱, kó mongase ndi̱jo̱ tsjakon nínga ꞌniú kjii̱n ko̱jo nínga ꞌniú jñoó ti̱xa̱na̱xi̱i̱,

⁴ ńꞌniú tsꞌénkjién kjiꞌanga fotjajen nínga nkꞌaa̱, achichí ndojó ti̱xa̱ xi tsꞌénda, kó fochó ngaskande nínga kji̱e̱ jmíjín xi fochó.

⁵ »Tꞌanangii̱ boá nínga ꞌboxiéni ni xi kjinie ko̱jo ni xi ꞌbi, kó ki̱a̱ ngi̱ndie tꞌanangii̱ achichí sibéꞌyá.

⁶ Ndi̱jo̱ yiꞌii̱ ꞌboxiéni ndi̱jo̱ safiro̱, kó ngi̱jin chojoo̱ ꞌboxiéni to̱nsinié.

⁷ Kui ndi̱ya̱à kji̱e̱ ngo ni̱sie je kamábe, ko̱jo kji̱e̱ ngo cho̱ xi kjinie yojo siee̱n nga,

⁸ kji̱e̱ ngo cho̱ tamá jè jaꞌa ki̱a̱a̱, ti̱nde ngo xandi̱je̱ kji̱e̱ bejín kóchon kui ngi̱ndiee̱.

⁹ Xota̱ xi tsꞌénxá ti̱xa̱na̱xi̱i̱ bokján ndi̱jo̱ tajaá, kó ꞌbíndo tsijen ngindiee̱ na̱xi̱i̱,

¹⁰ tsꞌeén ti̱xa̱ ndi̱jo̱ yiꞌii̱, kó kotsijee̱n ni tsjakon xi tjiín,

¹¹ fochó ngaskande nínga tokjà ndejeèꞌ, kósꞌe̱ kjiꞌá boá nga bokó ni xi kisꞌińdoꞌmámára.

¹² »Ñá tikón kjo̱a̱kjínkoón. Ñání tikón ngi̱ndiee̱ kjo̱a̱kjíntakoón.

¹³ Jmíjín xi be kókjiꞌi chjínií xota̱ nga̱sondiee̱, ngatꞌa̱ jmí tsi kui nga̱sondiee̱ chji̱a̱ni.

¹⁴ Nínga ꞌniú na̱nga̱a̱ ndáchíkoón, bi̱ tsó: Kꞌi̱e̱jín tikón, kó ndáchíkón tiyaá, bi̱ tsó: Ánjín tikónna.

¹⁵ Kjo̱a̱kjínkoón ka̱májín to̱nsinié si̱ꞌantsieni, ti̱nde ka̱májín to̱ntiboaa̱ nga,

¹⁶ ti̱nde ka̱májín to̱nsinié xi nda ngasee̱, ti̱nde ka̱májín ndi̱jo̱ tsjakon xi ꞌmí ónise̱ ko̱jo tsi ndi̱jo̱ safiro̱ si̱ꞌantsieni.

¹⁷ Ti̱nde to̱nsinieé, ti̱nde chi̱tse̱én, ti̱nde ni tsjakon xi ꞌniú chjií, ka̱májín bo̱a̱ má kon kꞌuiín kjo̱a̱kjínkoón,

¹⁸ ¡ti̱nde ndi̱jo̱ koraa̱l, ti̱nde toꞌixkií, ka̱májín nga bo̱a̱ má kón kꞌuiín. Kjo̱a̱kjínkoón chjí ngasenii̱ ta̱bo̱a̱jiín ndi̱jo̱ tsjakon xi chjií,

¹⁹ ti̱nde ndi̱jo̱ topasio̱ xi tjín nangi Kuu̱, ka̱májín nga bo̱a̱ má kón kꞌuiín, ti̱nde to̱nsinié xi ndaa̱ ka̱májín kui si̱ꞌantsieni.

²⁰ »Ja̱ ti̱ ingo ndi̱yà kosíyángiñá án: ñá kji̱ndi̱báni kjo̱a̱kjínkoón, kó ñání tikón ngi̱ndiee̱ kjo̱a̱kjíntakoón.

²¹ Tikónꞌmárií ngayeje xota̱ nga̱sondiee̱, ko̱jo ngindyi̱ko̱n ni̱sie xi tjín nkꞌa jàn nga.

²² Ndatsi kui xi tsꞌenkjiéná ko̱jo kjo̱a̱bo̱yaa̱ tsó nga be xò ꞌyá kuií bo̱a̱,

²³ ta̱kuítsí Néná xí be ndi̱ya̱à, ko̱jo xi be kótsꞌèn sakóná.

²⁴ Néná be ngaskande nínga fetꞌanii̱ nga̱sondiee̱, kó ti̱ be ngayeje ni xi ma ngindie nkꞌajmii̱,

²⁵ kjiꞌanga Néná katsjaá ngaꞌniuú tjo̱o̱, ko̱jo nga tsꞌachi̱bo̱a̱ ndáfoaa̱,

²⁶ kjiꞌanga íjñaá ngo kjo̱a̱kiti stseé, ko̱jo nga akoó ndi̱ya̱à cho̱ꞌo̱o̱n,

²⁷ askotsijen ndá ndaá kjo̱a̱kjínkoón, nga ki̱a̱ tikón, kó kamámejeén askotꞌayákón, kó kamábe kókjiꞌi chjií.

²⁸ Kósꞌe̱ bi̱ katsoó ngayeje xota̱ nga̱sondiee̱: “tsi xcha̱ndikónjnú Ndi̱a̱a̱, kó tsi ku̱i̱ta̱xínboaꞌájnúu̱ ni xi ndajiín ja̱ jè kasakojnú kjo̱a̱kjínkoón”».