Joo̱b 27 - Xo̱jo̱n eén Néná

Xi ma jii̱n ndi̱yà nga tsíchji̱a̱ Joo̱b

¹ Joo̱b ti̱ tsíchji̱a̱ nginí, kó bi̱ katsó:

² «Be án nga tikón Néná, kó jè jaꞌáxín kjo̱a̱ndana, kui Néná xi tsi̱ꞌe̱ ngayeje ngaꞌniuú, je katsꞌénxtína nga mejénjiín nga kixi̱ tsꞌén sa̱ꞌínsénna,

³ ta̱nga tji̱e̱nga tikón an nga̱sondie, tji̱e̱nga Néná tsꞌéntsjána tjo̱ xi tjéjén an,

⁴ ndso̱ꞌba án ku̱i̱chji̱a̱jín ni xi ndajín, ti̱nde najén án jmí kjo̱a̱ndiso ku̱i̱chji̱a̱jín.

⁵ Tji̱e̱nga tikón an nga̱sondie, ꞌniú kuichjiá an nga jmí jéjínna, kó jmíni̱xtjin tsjandièjnúꞌun nga jún xi kꞌuiéjnú ngakixi̱.

⁶ ꞌNiú kꞌuijñá an nga kixi̱ án, kó nde ngojín ni̱xtjin nga tikón an xi sa̱ꞌínchꞌó ini̱ma̱na.

⁷ »¡Bo̱a̱ ngatamaa̱ kondra̱na xikoó xota̱ xi ꞌniú ndajiín, kó ti̱ bo̱a̱ ngatamaa̱ xikoó xota̱ xi kixi̱jiín!

⁸ Ngatꞌa̱ mí kjo̱a̱chiyá xi tjiín xota̱ xi ꞌniú ndajiín ko̱jo xota̱ xi chejeé, kjiꞌanga Néná sa̱ꞌínkjiesón.

⁹ A ku̱i̱ntꞌierií Néná kjiꞌanga ni̱ma̱ ka̱tso̱ nga ꞌniú nda̱ ka̱maa̱.

¹⁰ A kꞌuiérií kjo̱a̱tsja nga ki̱a̱ kꞌuijñátꞌaa̱ xi tsi̱ꞌe̱ ngayeje ngaꞌniuú. A ngatsjéni̱xtjin nga ku̱i̱chji̱a̱a̱ Néná.

¹¹ »Kokomárajnúꞌun ngaꞌniú xí tjiín Néná, kó kꞌuiꞌmájínjnúꞌun ni xi je índa xi tsi̱ꞌe̱ ngayeje ngaꞌniuú.

¹² Ta̱nga tsi je yàjnú kui nii̱, míkjo̱a̱a̱ nga achichí kjo̱a̱chi̱ni xi ndokjo̱a̱jnú.»

Xi ma jaán ndi̱yà nga tsíchji̱a̱ Sofaa̱r

¹³ Kó Sofaa̱r, bi̱ katsó: «Néná xí tsi̱ꞌe̱ ngayeje ngaꞌniuú jè tikónndaa̱ ni xi tsja̱á xota̱ xi ꞌniú ndajiín, kó bi̱ tsꞌén ka̱majeé:

¹⁴ Ndatsi kjín ka̱ma ndií, tjín xí ngi̱jin kjo̱a̱xcha̱án ko̱yà, kó kje̱ꞌe xí ko̱yà bojó.

¹⁵ Tsi tjín xí kꞌuíndo ngase, ngo chiꞌin sa̱ꞌínkjiesón, kó ínchjín xí kisꞌińdojo̱ nde ska̱ndátjéjín.

¹⁶ Ndatsi tsie to̱n ko̱jo ńjño ku̱i̱ꞌítikó,

¹⁷ ta̱nga nga fetꞌani, xota̱ xi kixi̱i̱ ko̱jo xi jmí jéjiín boá xi ka̱ma tsi̱ꞌe̱ ńjñoo̱ ko̱jo to̱o̱n.

¹⁸ »¡Xota̱ xi ꞌniú ndajiín, ndiꞌa xi katsꞌénda xikónií tsi xobí jè iskjinie, kó nde ꞌniújín tikón, xikó maá ngo ndiꞌa ti̱ki̱e̱n.

¹⁹ Cho̱n nga kjófé nga fetꞌanii̱, ta̱nga nga kjo̱a̱ꞌaá, jè ni̱ma̱ kamá,

²⁰ ¡achichí ni xi ndajín xi bixónieé, xikó maá tsi stsé bixónieé, kó xikó maá tsi ngo tjo̱ꞌniú kjifé nga jñoó!

²¹ Xtji̱e̱e̱n nínga fotjo tsꞌueé ndibá ngo tjo̱ꞌniú, kó kui tjo̱o̱ ndeskande ndiꞌaa̱ skji̱níyá nga kjo̱jo.

²² Néná ꞌniú ko̱tíjeé kó nde sa̱ꞌínjetakónjiín, kó ndatsi mejeén nga kjo̱tjongii̱ yojoo̱, nde ka̱májiín.

²³ Nga sku̱i̱e̱ xotaa̱, sa̱ꞌíntsen má tsja, kó ku̱i̱ꞌíxo̱bí maá nga ko̱jno̱kie».