Joo̱b 26 - Xo̱jo̱n eén Néná

Joo̱b ta̱niján má katsꞌénxixió nga tsꞌénchji̱a̱ Bilndaa̱nd

¹ Tsꞌénmojnó chií má Joo̱b, nga bi̱ katsó:

² «A bo̱a̱ tsꞌén bosíke̱je ji xota̱ xi ngo ni chjieén, kó a bo̱a̱ tsꞌén ꞌnaxiéꞌé ji kui xi je ngiti̱ jmí ngaꞌniújiín.

³ Kókjiꞌi kjo̱a̱botíxoma xi katseꞌée̱ ngo xota̱ xi jmí ni bejín xikoó an. Kókjiꞌi kjo̱a̱kjínkón je akake nga bo̱a̱ se ji.

⁴ ꞌYá xí asíko̱joo̱ nga bo̱a̱ tsó én xí kandokjo̱e̱ ji. ꞌYá a̱siénni̱xtjin xi tsꞌaxieé kui eén.

Bilndaa̱nd tsíchji̱a̱ra ngase

⁵ «Ngaskande nínga ꞌniú na̱nga̱a̱ ndáchíkoón, nga xota̱ xi je jesoón fotsié má nga tsakjón má.

⁶ Tikón tsijen nga̱tsjo̱ó ngindyi̱ko̱n Néná, kó ngaskande kjo̱a̱bo̱yaa̱ ma ꞌmájiín yojoo̱ nga.

⁷ Néná boá xi katsꞌéntiyá nkꞌajmi xi tikón xtji̱e̱e̱n ta̱ꞌin, kó tikón tiya boá ngi̱ndie nínga íjñá, kó tꞌanangii̱ ngi̱jinꞌa̱sie̱èn tikón.

⁸ Kuí boá xi mindyiá ndáfoaa̱ ki̱a̱ ngi̱jin ṉdi̱i̱, kó nde jmí ni májiín ṉdi̱i̱, ndatsi é ndáfoaa̱.

⁹ »Ngojín xi be ngi̱ndie nínga botixómá Néná, ngatꞌa̱ ngi̱jin ṉdi̱i̱ tikónjin.

¹⁰ Ngo tsindió íjñaá ndáchíkoón, kó ki̱a̱ ꞌboxiékjo ni̱xtjii̱n ko̱jo ni̱xtji̱e̱e̱n.

¹¹ Yásé xi kjiꞌiꞌniúnií nkꞌa jàn, fotsiéndíkón má nga ntꞌié nda̱a̱ Néná.

¹² Ngaꞌniuú tsꞌénkjién nga tsꞌenkꞌájin ndáchíkoón, kó kjo̱a̱kjínkoón tsꞌénkjién nga tsꞌénꞌoón cho̱ chꞌokjiꞌi raa̱b,

¹³ A̱si̱énni̱xtjii̱n katsꞌénkjién nga tsja katsꞌénkꞌié nkꞌa jàn, kó tsja má bo̱a̱ xi tsꞌénkjién nga tsꞌenkꞌién cho̱ chꞌokjiꞌii̱ ndáchíkoón.

¹⁴ »Kuí nii̱ xi bokóná kjo̱a̱a̱ ngaꞌniú jee̱, ni xi yà kjo̱a̱a̱ kui, sꞌe̱ tsí ngo ni xi ta̱ꞌya ndaꞌyá. Kó ngaꞌniú xí tjiín Néná, ꞌyá xí ka̱makjiín».