Joo̱b 24 - Xo̱jo̱n eén Néná

¹ »Kó nga Néná jè be ni̱xtjin nga ka̱majeé xotaa̱, míkjo̱a̱a̱ nga xota̱ xi tsó nga be Néná kosónjiín ni xi tsꞌén,

² kui xotaa̱ bendikónjín tsindioó tꞌanangii̱, kó cho̱yojo ndyi̱tsꞌènchéjé, tsi̱ꞌe̱ nga tsie ngase ni kꞌuieé,

³ foaꞌáxiín bórroó xota̱ xi xꞌi̱a̱a̱n, kó kjíbé cho̱yojo xi̱ꞌin xi ꞌbijñángíni nga míyá ni ínchjín kꞌán xi je kꞌien xi̱ꞌii̱n.

⁴ ꞌBoxiéni ndi̱yà xí tjimá xota̱ ni̱ma̱a̱, kó tsꞌeén kjo̱a̱ꞌniú tsi̱ꞌe̱ nga ꞌbíndoꞌmá.

⁵ Kui xotaa̱ ja̱kon bórró xí kji̱e̱ machji̱ni̱e̱jín ki̱a̱ nangi kixií má kón, mongase nichinie, kó ki̱a̱ nangi kixií sakoó ni xi skji̱ni̱e̱ ndií.

⁶ Kui xotaa̱, ki̱a̱ fí tꞌanangi xi kuijín tsi̱ꞌe̱, kó ki̱a̱ ꞌbitíkó tostsi̱je̱è, ko̱jo ńtiín to ndso̱ko̱a̱n ṉño̱pan,

⁷ kó xota̱ xi chiboa ńjño tjiín, foaꞌáxiín ńjñoo̱, tsi̱ꞌe̱ nga ꞌbíndo kjiꞌixtí nga fofé, kó jmíjiín kótsꞌèn sa̱ꞌínꞌasoo̱ yojoo̱,

⁸ kó stsé xí boaꞌa ki̱a̱ na̱xi̱i̱ ꞌbondyi̱ni, kósꞌe̱ ngi̱ndyió ndi̱jo̱ yiꞌii̱ ꞌbíndotji̱nkꞌi̱èn.

⁹ Foaꞌáxiín ndíndaa̱ ínchjín kꞌán xi je kꞌien xi̱ꞌii̱n, kó ndí xi̱xi̱i̱ xota̱ ni̱ma̱a̱ foaꞌáxiín nga tsꞌénkíyaà ni,

¹⁰ xota̱ xi ni̱ma̱a̱ foaꞌáxiín ńjñoo̱, kó tsꞌénkꞌítso̱ma kjiꞌixtí, tsꞌénkꞌánijín kjo̱a̱ꞌniú to ndso̱ko̱a̱n ṉño̱paa̱n, ndatsi bojoó xotaa̱.

¹¹ ꞌBo toꞌaseituna̱ tsi̱ꞌe̱ nga ꞌboxieé isti̱, tsꞌéntsꞌingí tostsi̱je̱è tsi̱ꞌe̱ nga tsꞌénda bino̱, ta̱nga ndatsi xíndaá boeꞌéndièjiín nga ꞌbi ndáfoa.

¹² Achichí kjo̱a̱ni̱ma̱ ndyi̱foaꞌatio, kó nga je mejeén kjifesón, kjandayà ndeskande ki̱a̱ na̱xi̱ńdáꞌniuú, nga míꞌaá Néná nga ko̱síko̱jo, ¡ta̱nga Néná nde tsꞌensénjiín nga chji̱a̱a̱!

¹³ »Kuí boá kui xotaa̱ xi kamáchꞌoó nínga tsijee̱n, kó jmíni̱xtjin kamábe ndi̱ya̱à Néná, ti̱nde ki̱a̱jín kisꞌiṉtso̱ma.

¹⁴ Ta̱ niꞌin si̱sién, kó kui xota̱ xi ꞌniú ndajiín, jè ndyi̱fotaxie nga ndyi̱tsꞌènkꞌién xota̱ xi ni̱ma̱a̱ ko̱jo xota̱ xi ni chjieén, kó ngije ma jñoó xota̱chejé má.

¹⁵ Xota̱ xi tsꞌéntꞌaa̱kjo̱a̱ chjo̱ón koyaa̱ nga je kjimajñoó, ngatꞌa̱ tsꞌénkjó nga kjiꞌá boá nga jñoó nga jmíjín xi sku̱i̱e̱ nga kje̱ꞌe chjo̱on kjiꞌijñajo̱.

¹⁶ Xota̱ xi chejeé nga jñoó boá nga tsꞌénchéjé ndiꞌaa̱ xotaa̱, kó nga ni̱xtjii̱n ꞌbíndoꞌyá, mejénjiín sa̱ꞌínjo̱ꞌo ndiꞌií.

¹⁷ Kui xota̱ xi ꞌniú ndajiín, nga ta̱jño̱ó xikónií tsi tji̱nkꞌi̱e̱én kjo̱a̱bo̱yaa̱ kjimaa̱, ngatꞌa̱ jè kamángaá ni xi ndajín xi ma nga jñoó».

Sofaa̱r ta̱niján má katsꞌénxixió nga tsꞌénchji̱a̱ Joo̱b

¹⁸ «Xota̱ xi ꞌniú ndajiín, monga xikoó ndáfoaa̱, kó kꞌijñaá jè ndajín kamá, kó nde ingojín xi tsꞌénxájin nínga kjiꞌii̱ tostsi̱je̱è.

¹⁹ Xikótsꞌèn nga cho̱ndoboaá ko̱jo sibeé tsꞌénńdá nchꞌaàn, ti̱ bo̱a̱ ti̱ tsꞌén nga̱tsjo̱ó tsꞌénchájá xota̱ jeé.

²⁰ Ngaskande ti̱ kuii̱ na̱aa̱n sa̱ꞌínchíyá, kó chi̱ndoo̱ achichí tsjá ka̱maa̱ nga skji̱ni̱e̱. Nde ngojín xota̱ xi sa̱ꞌínkjaꞌátsjien ngase, kó bo̱a̱ má ka̱maa̱ xikoó ngo yá xí je ikichá.

²¹ »Xota̱ xi ꞌniú ndajiín, ndajín katsꞌénjo̱ ínchjín kꞌán xi je kꞌien xi̱ꞌii̱n, ko̱jo ínchjín xí ndi̱i̱.

²² Ta̱nga kjiꞌanga Néná xí tsja̱á kon, ngaꞌniuú sa̱ꞌínkjiéni nga sa̱ꞌínkjítie, ngatꞌa̱ kjiꞌanga Néná xí je tsꞌén ngo ni, nde ngojín xi ka̱maa̱ nga ꞌniú kꞌuijñá ngase.

²³ Ngotꞌe̱ ꞌne̱ tsjandieè nga ꞌniú síndo, ta̱nga ngatsjéni̱xtjin nga ki̱a̱ tsꞌénkotsijee̱n.

²⁴ Xota̱ xi yandikón kiniꞌán ngotjón, ta̱nga sꞌe̱ si̱ꞌanchajà, kó si̱ꞌankjie xikoó xi ngasee̱. Kó ku̱i̱chá xikó maá ńtiín to ndso̱ko̱a̱n ṉño̱paa̱n.

²⁵ »Kó tsi bo̱a̱jín kjiꞌi, ꞌyá xí ka̱maa̱ nga ko̱kó nga bo̱a̱jín kjiꞌi ni xi je kixian an, ko̱jo tsi ko̱kó nga kamátsobéjinna».