Joo̱b 23 - Xo̱jo̱n eén Néná

Xi ma yitoo̱ ndi̱yà nga tsíchji̱a̱ Joo̱b

¹ Joo̱b bi̱ katsoó Elifaa̱:

² «Ndatsi tsꞌénkjandayá an, Néná to̱kó tsꞌénbotíjéna.

³ Achichí mejénna nga sa̱kóna Néná katsaki, tsi̱ꞌe̱ nga kjuínkóo̱n ngaskande nínga tikón.

⁴ Ngindyi̱ko̱n kui kjuínjo̱ an kjo̱a̱na, kó xiyà cha̱n cha̱nráa̱ kótsꞌèn kꞌoxiéꞌá an yojona.

⁵ Mejénna skuie mí eén xi sa̱ꞌínkjién, tsi̱ꞌe̱ nga skuie an ni xi ka̱tso̱na.

⁶ A sa̱ꞌínkjién ngaꞌniuú nga skjánjo̱na tsobo̱a̱, bee̱ko̱n an nga ta̱sá sa̱ꞌínsénna.

⁷ Ngindyi̱ko̱n Néná nga ngo xota̱ xi kixi̱, ka̱maa̱ nijan sa̱ꞌínkjó kjo̱a̱a̱ kjo̱a̱ xi tjiín, kó bo̱a̱ tsꞌén nga ngatsjéni̱xtjin ku̱i̱ꞌíjñandéna, ngindyi̱ko̱n kui xi be nga nda ko̱jo tsi ndajín katsꞌen an.

⁸ »Ta̱nga fi an xtji̱e̱e̱n nínga tjo tsꞌueé, kó sa̱kójínna Néná, fi an xtji̱e̱e̱n nínga ꞌbosꞌien tsꞌueé, kó sa̱kójínna nga,

⁹ tsi ki̱a̱ ko̱kó ngaꞌniuú xtji̱e̱e̱n ta̱ꞌin, skuiejín an, kó tsi ki̱a̱ xtji̱e̱e̱n na̱ngi kꞌuijñáꞌmá, ti̱ skuiejín an nga.

¹⁰ Ta̱nga Néná jè be nínga tsoꞌbá an, kó tsi skítꞌayákónna, bo̱a̱ má kꞌuié án xikoó to̱nsinié xi kui soboá soboaá.

¹¹ Ndsa̱ko án ki̱a̱ tsꞌénfítji̱ngi chi̱bo̱a̱ se, ki̱a̱ tsꞌénfítji̱ngi an ndi̱ya̱à, kó xínjín tsꞌénfí an.

¹² Kji̱e̱ ngo ndi̱yà tjítsꞌenkjìi̱n yojona kjo̱a̱botíxoma xi chji̱a̱, mején ngasena eén ta̱bo̱a̱jiín nichiniee̱.

¹³ »Tsi ngo ni xi mejeén sa̱ꞌín Néná, ꞌyá xí ka̱maa̱ nga ku̱i̱ꞌíchjaá tsi̱ꞌe̱ nga ko̱síkjo ni xi sa̱ꞌín, ni xi tsó ini̱ma̱a̱, kuí ni xi tsꞌén.

¹⁴ Kuíni nga ta̱ ni xi mejénrií kui sa̱ꞌínjo̱na, kó ngayeje ni xi je katsꞌénkjó nga sa̱ꞌín, sa̱ꞌínkjatjosón.

¹⁵ Kó ngindyi̱ko̱n kui achichí tsakjon má an, kjiꞌanga kui nii̱ tsꞌenkjó án, ngaskande fotsié ndikón má an.

¹⁶ ¡Néná jè jaꞌáxín kjo̱a̱ꞌniútakoón ini̱ma̱na, kui xi tsi̱ꞌe̱ ngayeje ngaꞌniuú jè ꞌniú indyiándikónna!

¹⁷ Ánní nga kiniꞌánkꞌiénjínna kui ni̱xtji̱e̱e̱n, ánní nga akjaꞌmajín kje̱n án nga jñoó.