Joo̱b 22 - Xo̱jo̱n eén Néná

Xi ma jaán ndi̱yà nga tsíchji̱a̱ Elifaa̱

¹ Kósꞌe̱ bi̱ katsó Elifaa̱, nda̱ xi chji̱a̱ni nangi Temaa̱n:

² «Kó tsꞌén chjiénnií Néná xota̱ nga̱sondiee̱. Xota̱ xi kjínkoón ti̱kuíní xi nda maá yojoo̱ ni xi tsꞌén.

³ A tjín ni xi tsja ka̱maa̱ Néná, kjo̱a̱a̱ nga kixi̱ ji, axa̱ a tjín ni xi sa̱ꞌín kuí, kjo̱a̱a̱ nga ngo ndi̱yà xí nda tiꞌmi ji.

⁴ A tsꞌénbotíjeéri Néná kjo̱a̱a̱ nga yendikín jí, kó a kuíni nga skotsíjee̱n tsi nda ko̱jo tsi ndajín tiniꞌín ji.

⁵ ¡Ta̱nga achichí jè jaꞌatioo̱ nga ꞌniú ndajín ni xi tiniꞌín ji, kó jée̱, jè nde ngiti̱ májín ꞌbíxki̱!

⁶ Nde jmí kjo̱a̱jín nga kachjábé jí ńjñoo̱ ntsꞌie ji, kó xota̱ ni̱ma̱a̱ kachjeꞌéxíi̱n ńjñoo̱ nga.

⁷ Katseꞌéjìi̱n ndáfoa xota̱ xi kamáxíndaá, ti̱nde katseꞌéjìi̱n nichinie xota̱ xi kamábojoó.

⁸ Ta̱nga xota̱ xi cho̱o̱n katseꞌée̱ tꞌanangi, kó katseꞌéndièe̱ nga ki̱a̱ kisꞌińdo,

⁹ ínchjín kꞌán xi je kꞌien xi̱ꞌii̱n, jmí ni katseꞌéjìi̱n, kó xota̱ xi xꞌi̱a̱a̱n kachjeꞌéxíi̱n ngayeje ni xi tjiín.

¹⁰ Kuíni nga ngotꞌe̱ ꞌne̱ nga ngo foaꞌatjiyajòo̱n je síndo chja̱ya̱, kó ta̱niján má tindakin ji,

¹¹ tsijénjín tsꞌeén jñoó, kó xikó maá tsi ngaꞌniuú ngo ndejèꞌ tsꞌénkjifeé.

¹² »A mí tsí nkꞌajmii̱ tikón Néná, tsitsíjìi̱n kókjiꞌi nkꞌa síndo ńño ꞌna̱a̱.

¹³ Kó jí bi̱ se ji nga Néná bejín ni xi niꞌín ji, ko̱jo nga ṉdi̱ jñoó tsjandièjiín nga be tsi nda ko̱jo tsi ndajín tsꞌén xotaa̱.

¹⁴ Ṉdi̱ jñoó tsjandièjiín nga bená, kó kuí má bo̱a̱ xi fotsoꞌbá, ngo ndiè ngaskande xi ingo ndieè nkꞌa jàn.

¹⁵ »A mejeénri ki̱a̱ kꞌuíntjíngí ji ndi̱yà xchá xí kisꞌiṉtso̱ma xota̱ xi ꞌniú ndajiín.

¹⁶ Ngatjaꞌátsjiee̱n nga kui xotaa̱ achichí ngindie ni̱xtjin nga jesón, ngatꞌa̱ xikoó tsi ndáfoaa̱ ndejeèꞌ kijítjiboajo̱.

¹⁷ Bi̱ katsoó Néná: ti̱ꞌinkjinjne̱ yojòo̱. Kó mí ni xi ndajín xi katsꞌénjo̱ kui Néná xi tsi̱ꞌe̱ ngayeje ngaꞌniuú,

¹⁸ ta̱sá Néná achichí ni xi nda katsjaá ki̱a̱ ndiꞌaa̱. ¡Ta̱nga kjo̱a̱botíxomaa̱ kui xota̱ xi ndajiín, achichí kjin tikónnii̱ an!

¹⁹ »Nga sku̱i̱e̱ xota̱ xi kixi̱i̱ achichí tsjá ka̱maa̱, nga je si̱ꞌankjie xota̱ xi ndajiín, kó xota̱ xi jmíjéjiín ko̱jno̱kie nga bi̱ ka̱tso̱:

²⁰ “¡Jè kiniꞌánkjié kondra̱ná, ndiꞌií boá xi katsꞌénkjié kjo̱a̱cho̱o̱n!”

²¹ »Ji Joo̱b, tjandée̱ Néná, kó ngatꞌié nginií kjo̱a̱xió, kó kuí boá xi ndatsꞌèn sa̱ꞌínkꞌijñá nginií.

²² Te̱ꞌéndiè ji nga kui ko̱kóyaá én xí fotjonii̱ tsꞌoa, kó ngi̱jin ini̱ma̱a̱ tꞌíjin ji eén.

²³ Tsi kꞌuíchin nginíi̱ Néná, kuí boá xi skjinínkꞌaá, kó bo̱a̱ tsꞌén nga ngiti̱ jmí kjo̱a̱ndasen kꞌuiéjín ngi̱ya ndiꞌàa̱.

²⁴ Tsi ki̱a̱ ku̱i̱chíjmijin ji ngi̱jin chojoo̱ kjo̱a̱cho̱o̱n, achichí to̱nsinié kꞌuieé, xikó maá ndi̱jo̱ xi tjín ngi̱jin ndejeèꞌ,

²⁵ kó ti̱kuíní Néná xí tsi̱ꞌe̱ ngayeje ngaꞌniuú xi kꞌo̱xiéꞌaá, kó achichí to̱ntiboa kꞌuieé.

²⁶ Ngatꞌa̱ kjiꞌá boá nga achichí tsjá ka̱maa̱ kjo̱a̱a̱ kui Néná xí tsi̱ꞌe̱ ngayeje ngaꞌniuú, kó ngindyi̱ko̱n kui ka̱ma chjanínkꞌé kje̱n ji.

²⁷ Ka̱ma ko̱ndókjoée̱, kó kuí ku̱i̱ntꞌie̱é, kó ka̱ma si̱ꞌinkjatjosén ji ni xi kiꞌmíyetjée̱n.

²⁸ Kósꞌe̱ nda kjo̱tjosón ngayeje ni xi kꞌuínde ji, kó tsijen ka̱ma ndi̱yà nínga ku̱i̱ńtje̱.

²⁹ Néná ni̱ma̱kjo̱a̱ tsꞌénkꞌíndo xota̱ xi nkꞌakoo̱n, kó tsꞌénkjastjíe̱n xota̱ xi ni̱ma̱kjo̱a̱a̱.

³⁰ Néná tsꞌéndé xota̱ xi jmí jéjiín, kó tsi jmí jéjiín jí, ti̱ kꞌo̱xiéꞌaá nga».