Joo̱b 20 - Xo̱jo̱n eén Néná

Xi ma joó ndi̱yà nga tsíchji̱a̱ Sofaa̱r

¹ Kósꞌe̱ Sofaa̱r, nda̱ xi chji̱a̱ni nangi Naamaa̱t, bi̱ katsoó Joo̱b:

² «Kjo̱a̱niꞌánkjóna tjítsꞌénná kjo̱a̱ꞌniú tsi̱ꞌe̱ nga kuichjiájoo, kuíni nga tsá tjítsꞌée̱n yojona.

³ Ni xi ndajín xi tꞌísé ji, an kasatiena, kó chꞌo mana, ta̱nga jè be an kótsꞌèn kuichjiájoo.

⁴ »A yejín ji nga ngatsjéni̱xtjin nga bo̱a̱ kjiꞌi ni xi kamá, ndeskande koó nga Néná katsꞌénda xota̱ xi tjoón kui nga̱sondiee̱,

⁵ nga kjo̱a̱tsjaa̱ xota̱ xi ndajiín, tsiejín ꞌbondíyaá, ko̱jo nga kjo̱a̱tsjaa̱ xota̱ xi ꞌniú ndajiín, ta̱ ngotjón tsí foaꞌa.

⁶ Ndatsi achichí nkꞌakon ꞌboxié yojoo̱, xikoó nkꞌajmii̱, kó sꞌijii̱n nga kjo̱chótꞌaa̱ ṉdi̱i̱ nga skjinínkꞌá to̱ko̱,

⁷ ta̱nga kui xotaa̱ bo̱a̱ má kón xikoó yeꞌee̱, kuíni nga xcha̱ja ngatsjéni̱xtjin, kó xota̱ xi kamábee̱, nginijánjín sku̱i̱e̱ ngase,

⁸ xcha̱ja xikoó ngo ńjñá xi ta̱ ngotjón foaꞌa tsí, ko̱jo tsi xikoó ngo ni xi bokóná nga jñoó xi chaja,

⁹ ¡xota̱ xi kamábee̱, ngiti̱ sku̱i̱e̱jín ngase, ti̱nde kui ngiti̱ sku̱i̱e̱jín ngi̱ndie nínga kisꞌijña!

¹⁰ Ndií chjiéngá ku̱i̱ꞌaa̱ kjo̱a̱nda xota̱ xi ni̱ma̱a̱, kó tsja ngajoo ni xi katsꞌénchejé na̱ꞌmii̱,

¹¹ ndatsi ngotꞌe̱ achichí ngaꞌniú tjiín xikoó tsi xo̱ngò, ta̱nga ki̱a̱ nga̱tsjo̱ó chojo kamá nginí.

¹² »Ni xi ndajiín achichí nda kichiniee̱ xikó maá ntsjieén, nga ngaskande katomájón má,

¹³ tsi nda kamaá ni xi ndajín xi katsꞌén, nde íjñámasienjín kui nii̱, ta̱sá to̱kó ndyi̱tomójónra̱.

¹⁴ Ta̱nga ngije iskjinie kui nii̱, ngi̱ya nga̱tsꞌo̱a̱ xikoó tsi xaán ye̱ kamá.

¹⁵ Sa̱ꞌínkjasó nginí kui kjo̱a̱cho̱n xi je iskjiniee̱. ¡Néná boá xi sa̱ꞌiín kjo̱a̱ꞌniú nga kꞌo̱xié nginí!

¹⁶ Xikónií tsi xaán ye̱ xi kꞌuí, kó kuí boá kui nii̱ xi sa̱ꞌínkꞌién.

¹⁷ Ngiti̱ sku̱i̱e̱jín xo̱ngàndántꞌieé, ko̱jo ndejeèꞌ, ko̱jo ntsjieén ko̱jo ntsjeén.

¹⁸ Ngayeje ni xi katsꞌén chjiéngá tsja̱ꞌóyá nginí, ka̱májín kuí skjíbé, ti̱nde ka̱májín kui tsjatsꞌèn sa̱ꞌínkjién kui nii̱,

¹⁹ ngatꞌa̱ kjo̱a̱ni̱ma̱ katsꞌénkjaꞌatio ko̱jo íjñámasien xota̱ ni̱ma̱a̱, kó iskjíbé ndiꞌa xi jmíni̱xtjin kui katsꞌénda.

²⁰ »Kuíni nga jmíni̱xtjin nga nda kꞌuíndo, kó nde ngo ni tsꞌenkꞌángíjín, ta̱ngatꞌanii̱ kjo̱a̱xké nii̱,

²¹ Ngayeje nii̱ xi iskjinie, kuíni nga tsiejín kꞌo̱ndíyaá nga bo̱a̱ tsꞌén nda kꞌuíndo.

²² Ndatsi tsie ni tjiín, ngatsjéni̱xtjin nga nda̱ ka̱maa̱, ¡kuí boá xi kꞌo̱kanieé ngayeje ni xi ꞌniú ndajiín!

²³ Kjiꞌa má nga skji̱ni̱e̱ nichinie, nga Néná ꞌniú sa̱ꞌínxchán, kó ki̱a̱ kꞌo̱kanieé kjo̱a̱xcha̱án.

²⁴ Tsi ko̱nga nga ki̱cha̱ndojó ko̱yàní, yáyojó si̱ꞌankꞌienni,

²⁵ kó kui yáyojó xi kꞌuieé, kjo̱a̱ꞌaxtikjaá yojoo̱, kó ki̱cha̱ xi tikoón ndyi̱ko̱n kui yáyojoó, skítjií saa̱, kósꞌe̱ achichí stsa̱kjonní.

²⁶ Jè tikónnda ngo ngi̱ndie xi ꞌniú jñó nínga kjo̱chó, ngo ndiꞌí xí jmí tsi xota̱ xi ítsié, kuí xí sa̱ꞌínkjié kui ko̱jo ndiꞌaa̱.

²⁷ Nkꞌajmii̱ ngayeje xi ko̱ko̱ó jé xí katsꞌén, kó tꞌanangii̱ kjo̱stjíe̱n tsi̱ꞌe̱ nga ko̱óngítaꞌin.

²⁸ Ni̱xtjin nga ꞌniú sa̱ꞌínxchán Néná, ndií ko̱jo ndiꞌaa̱ ngo stsé ꞌniú ko̱e̱je̱tjiboajo̱.

²⁹ Bo̱a̱ tsꞌén tsꞌénjeé Néná xota̱ xi ꞌniú ndajiín, kuí boá kui nii̱ xi sa̱ko̱ó ngatꞌa̱ jè bo̱a̱ tsꞌén tsꞌénchji̱a̱ eén»