Joo̱b 2 - Xo̱jo̱n eén Néná

Kjín ngase kjo̱a̱chjatꞌayákón xi kisꞌiee̱ Joo̱b

¹ Ngo ndi̱yà, ngo ni̱xtjin nga mosoo̱ nkꞌajmii̱ matikó ngindyi̱ko̱n Néná, ti̱ jachó Xindajiín nga,

² kó Néná, bi̱ katsoó: —¡Kó jí! Ñá kjoéꞌe̱ni. Kó Xindajiín, bi̱ katsó: —Nga̱sondiee̱ kjoéꞌe̱ni an, ki̱a̱ kijíkatjiyajòo̱n.

³ Kósꞌe̱ Néná, bi̱ tsꞌén asíyaá: —Kótsꞌèn niꞌínkjé jí kjo̱a̱a̱ Joo̱b, moso̱ xi tsꞌénxátꞌana xi achichí ꞌniáko̱n an. Jmíjín ingo nda̱ ngayeje kui nga̱sondiee̱ xi bo̱a̱ tsꞌén ndaxota̱ ko̱jo xi kixi̱ xikoó Joo̱b. Ngatsjéni̱xtjin nga ntꞌiéꞌénna, kó chiíjín tsꞌén ni xi ndajín, ndatsi je bo̱a̱ kasení nga ndajín sa̱ꞌinjo̱ an, kó ndatsi jmí kjo̱a̱jínna nga bo̱a̱ sa̱ꞌinjo̱ an.

⁴ Kó Xindajiín, bi̱ katsoó Néná: —¡Tji̱e̱nga jmíjín xi sa̱ꞌínꞌónná nínga ꞌniú ngase on ka̱máná, ngayeje nii̱ xi ndakjiꞌi! Ta̱nga tsi kjo̱a̱a̱ nga kꞌo̱xiéꞌá yojoo̱ xota̱ nga̱sondiee̱, ka̱márií sa̱ꞌín ta̱jmì niní.

⁵ Ndé xchi̱e̱ ji nga tsi ndajín si̱ꞌinje̱ ji, ¡chꞌo ka̱tso̱ tíkje̱n tíkje̱e̱n! Kósꞌe̱ Néná, bi̱ katsoó Xindajiín:

⁶ —Ndakjíꞌí tsobo̱a̱, ja̱ ta̱ ni xi mejeénri ti̱ꞌinje̱ ji, ta̱nga ngata̱ niꞌínkꞌínjín ji.

⁷ Kósꞌe̱ Xindajiín tsangaboaꞌá ngindyi̱ko̱n Néná, kó katsꞌénꞌoón Joo̱b nga íkitsie maá ṉdoꞌon ngayeje yojoo̱, ndeskande ngi̱ya se, ngaskande nga̱tsjà to̱ko̱.

⁸ Kuíni nga ndiso kijíkꞌíjñajinni, kó nga ngo ni̱xtjii̱n nga ngo ndi̱jo̱ tokjuie iskjijón yojoo̱.

⁹ Kó chjo̱ón Joo̱b, bi̱ kijítsoó: —Míkjo̱a̱a̱ nga to̱kó tiboke ji nga nda ji xota̱. ¡Ta̱sá chꞌo tꞌíi̱n Néná, sꞌe̱ ngataye ji ngijee̱!

¹⁰ Ta̱nga Joo̱b, bi̱ katsoó: —¡Jmí chjo̱ón! Ngata̱ bo̱a̱jín tsó kjo̱a̱chi̱ni xi ndokjo̱e̱ ji. Tsi niꞌánjo̱ꞌó ñá ngayeje ni nda xi tsjáná Néná, ja̱ ti̱ chjiéngá si̱ꞌanjo̱ꞌo ni xi ndajiín nga. Kó ndatsi bo̱a̱ kjiꞌi ngayeje ni xi je kamaá Joo̱b, katsꞌénjéjín nga chꞌo katsoó Néná.

Nga ján já amingoo̱ Joo̱b

¹¹ Joo̱b ján já amingo̱ kisꞌiee̱, kó kuí boá xi ꞌmí: Elifaa̱, kui xi chji̱a̱ni nangi Temaa̱n, ko̱jo Bilndaa̱nd, kui xi chji̱a̱ni ngo ngi̱ndie xi ꞌmí Súaa̱j, ko̱jo Sofaa̱r, kui xi chji̱a̱ni ngo ngi̱ndie xi ꞌmí Naamaa̱t. Ngije tsintꞌié ngayeje ni xi ndajín xi kamaá Joo̱b, nijan kamá xkjín kuí jaá, tsi̱ꞌe̱ nga ko̱e̱je̱koo̱n, kó sa̱ꞌíndajoo̱n ko̱jo ka̱tso̱yaa̱ nga ko̱jo kui ndasen tjíndo kjo̱a̱a̱ nga jesón ndií Joo̱b.

¹² Nga jachó kui jaá ki̱a̱ nínga tikón Joo̱b, ta̱ kjín kamábeni, kó nde ngiti̱ kamábejín tsi kui, ta̱nga nga jachó kje̱n nínga tikón, ítsꞌi̱yanii̱ nga askjandá ko̱jo nga askjandáyà. Sꞌe̱ tji̱e̱nmá iskjíndiyájón ńjño xi ndyi̱yajá, kó indyiaá ndiso to̱ko̱ tsi̱ꞌe̱ nga akó nga ndasen síndo ko̱jo kui nga.

¹³ Yito ni̱xtjin, yito ni̱xtji̱e̱n nga kisꞌińdo tꞌanangi, nga ki̱a̱ nijan kisꞌińdojo̱ Joo̱b, kó nde ngojín kui jaá xi kamákón nga ngo ni katsoó.