Joo̱b 19 - Xo̱jo̱n eén Néná

Xi ma uún ndi̱yà nga tsíchji̱a̱ Joo̱b

¹ Kó bi̱ katsó Joo̱b:

² «Ngaskande kjiꞌání nga to̱kó si̱ꞌanꞌonjnúu̱ ini̱ma̱na, nga chꞌo kꞌuínjnúꞌun.

³ Ngotjón ngotjón chꞌo ꞌmíjnúꞌun. ¡A soboájín májnú!

⁴ Ndatsi ja̱koxi̱ nga katsꞌenjé án, yojona boá xi tjítsꞌenjo̱ an.

⁵ Ta̱nga tsi jún xi nkꞌa ngase ꞌna̱xiéjnú yojojnú ta̱bo̱a̱jiín án, nga niꞌánkjiénjnú kjo̱a̱ni̱ma̱ xi tsꞌénfoaꞌatio an, kondra̱ tsa̱ꞌa̱n.

⁶ Ja̱ mejénna nga xcha̱jnú nga Néná boá xi tsꞌatájóna, kó kuí boá xi íjñána ngo chja̱ya̱.

⁷ »Kjandayà má an nga míꞌá an nga tjín xí ko̱síko̱jona, ta̱nga nde ngojín xi ntꞌiéna, ti̱nde ngojín xi kixi̱ tsꞌén sa̱ꞌínsénna.

⁸ Néná jè íchjána ndi̱yà, kó mejénjiín nga kjo̱a̱ꞌa an, jè katsꞌénjñó ndi̱yàna.

⁹ Jè jaꞌáxín kjo̱a̱cho̱nna, ko̱jo kjo̱a̱yandikónna,

¹⁰ jè katsꞌénkjatsónna, kó jè kjiꞌme an, jè xikoó tsi ngo yá xí kachjaníyá ko̱jo ja̱ma̱ katsꞌénna.

¹¹ »Néná achichí ꞌniú katsꞌénxchánjo̱na, nga ngaskande kondra̱ tsi̱ꞌe̱ katsꞌénna,

¹² xtín jájuún kijítsꞌuiéna nga askjanjo̱na, ¡kó nga ngo foaꞌatjiyajoo̱n ndiꞌana je síndo!

¹³ »Néná katsꞌén nga ngaskande ntsꞌié án je katsꞌénkjinna, kó amingo̱na kotsijenna kósꞌe̱ xikoó tsi xota̱ xi nde bejín ꞌyá kuií bo̱a̱ maa̱ an.

¹⁴ Xota̱ xingi̱ án je katsꞌénkjinna yojoo̱, xota̱ xi bena je katsꞌénchíyána.

¹⁵ Xota̱ xi ki̱a̱ kisꞌińdo ndiꞌana ko̱jo chji̱ni̱e̱ꞌbona, ngotꞌe̱ ꞌne̱ kotsijenna xikoó tsi ngo xota̱ xi nde bejínna.

¹⁶ Tsíchji̱a̱a̱ moso̱na, kó katsꞌénsénjínna, kó ngaskande indasén máa̱.

¹⁷ Achichí chꞌoje̱n nda̱na, nga ngaskande chjo̱onna chikjo̱a̱jiín, kó ndína achichí chꞌo maá.

¹⁸ Ngaskande jáxóngo̱ó katsꞌénchꞌóna, ngije fostjíe̱n an, tji̱e̱nmá chji̱a̱taꞌinna,

¹⁹ ngayeje amingo̱na tsꞌenchꞌóna, kó xota̱ xi ꞌniú tjó kamána, je kondra̱na síndona ngotꞌe̱.

²⁰ Tji̱xinna ko̱jo yojona jè tjisítꞌa ꞌniú má ńdana, kó jè ta̱ yojońꞌniú án tsí xi tikón ngase.

²¹ »Jún já Amingo̱, ¡ngatamani̱ma̱jnú án! Ngatꞌa̱ Néná boá xi katsꞌénkjiénakjo̱a̱.

²² Míkjo̱a̱a̱ nga ndyi̱miyotji̱ngijnúꞌun xikó tjítsꞌénjo̱na Néná. A kji̱e̱ tsiejínjnú nga ndyi̱niꞌánkjiétikónjnúꞌun.

²³ »¡Achichí mejénna nga ngo xo̱jo̱n si̱tꞌa énna katsaki,

²⁴ ko̱jo tsi ngo chikjan ki̱cha̱ tie ngatsjéni̱xtjin si̱tꞌa!

²⁵ Jè be an nga tikón kui xi kꞌo̱xiéꞌána, kó nga fetꞌani kuí boá kjo̱stjíe̱nni ngi̱jin tꞌanangii̱.

²⁶ Kó ndatsi ngije jatson yojona, ti̱ kuí xí skuiéni an Néná.

²⁷ Ja̱koxi̱ boá nga án má xi skuie an, ndyikón án má xi sku̱i̱e̱, kó jmí tsi ndyi̱ko̱n kje̱ꞌe xota̱, ¡achichí ni xi kjimana nga kjo̱chó kui ni̱xtjii̱n!

²⁸ »Ka̱mara̱ bi̱ kꞌuínjnú: míkjo̱a̱a̱ nga ndyi̱miyotji̱ngíi̱, ngatꞌa̱ ndyi̱niꞌánkjójnú nga an boá xi konna kjo̱a̱a̱ ni xi ndajín xi kjimana,

²⁹ ta̱nga chónjnú yojojnú kjo̱a̱a̱ kjo̱a̱bo̱yaa̱, ngatꞌa̱ kuí boá xi tsꞌénkjién Néná nga botíjeé ngayeje ni xi ndajiín, kó bo̱a̱ tsꞌén nga xcha̱jnú nga tikón ngo xi be tsi nda ko̱jo tsi ndajín ndyi̱niꞌánjnú».