Joo̱b 18 - Xo̱jo̱n eén Néná

Xi ma joó ndi̱yà nga tsíchji̱a̱ Bilndaa̱nd

¹ Kó bi̱ katsó Bilndaa̱nd, nda̱ xi chji̱a̱ni nangi Súaa̱j:

² «Ngaskande kjiꞌání nga kókje ji ndso̱ꞌbe. Ti̱ꞌinkjé mára ji, kósꞌe̱ jaskan xchi̱boáni̱jmì.

³ Míkjo̱a̱a̱ nga xikoó tsi cho̱ kjimaa̱ ji̱n, ko̱jo tsi xikoó xota̱ chi̱ni.

⁴ A beriítakín nga tsi tiniꞌínxchín jí nga kꞌuiyé ji kjo̱a̱ni̱ma̱ xi tibitjatí, kósꞌe̱ sꞌi̱jñatiya tꞌanangii̱, ko̱jo nga ndi̱jo̱o̱ sa̱síkjo ngi̱ndie nínga síndo.

⁵ »Kjo̱a̱mindyioo̱n xota̱ xi ꞌniú ndajiín, kꞌo̱, xikoó ngo ndiꞌí, kó ꞌna̱a̱ ngiti̱ sa̱ꞌíntsijenjín ngase,

⁶ kui ndiꞌií inda inda kꞌo̱ ngi̱ya ndiꞌaa̱, kó ta̱niján má ngiti̱ sa̱ꞌíntsijenjín ngase.

⁷ Ngaꞌniú xí tjiín nga fotsoꞌbá, kju̱i̱e̱, kó ti̱ kuii̱ ni xi tsꞌénkjó sa̱ꞌínchaja,

⁸ ngatꞌa̱ ngo chja̱ya̱ kꞌuijñaá nínga kjo̱a̱ꞌa, kó ki̱a̱ kꞌo̱kayà kui chja̱ya̱a̱,

⁹ kó ńdatoꞌoo̱ kꞌuindyióꞌniúní, ńꞌniuú kui chja̱ya̱ xi ikꞌíjñaá.

¹⁰ Ngo chja̱ya̱ kꞌuijñáꞌmaá ngi̱jin tꞌanangii̱, tsi̱ꞌe̱ nga ki̱a̱ kꞌo̱kayà nga kjo̱a̱ꞌa.

¹¹ Ndikoón ni xi ndajiín, xindyiaá ta̱ nínga ndyi̱fí,

¹² xi bojó xi xíndaá sa̱ꞌínkjié ngaꞌniuú, kó ngatsjéni̱xtjin nga ꞌniú ndajín ka̱maa̱.

¹³ Chiꞌii̱n sa̱ꞌínkjié ngayeje tji̱xin yojoo̱, kó kjo̱a̱bo̱yaa̱ sa̱ꞌínkjié tsja ko̱jo se.

¹⁴ Chja̱ꞌáxiín kjo̱a̱xió xi tjiín ngi̱ya ndiꞌaa̱, kó ki̱a̱ kongínjo̱ ngindyi̱ko̱n re xi mindyiandíkoón.

¹⁵ Ki̱a̱ kꞌuijñáꞌyá ndiꞌa xi tsi̱ꞌe̱, ta̱nga xikoó tsi kuijín tsi̱ꞌe̱ ka̱maa̱, kó ndso̱ko̱a̱n asufre̱ ku̱i̱xo̱ nga̱soón kui ndiꞌaa̱.

¹⁶ Kó xi̱ ja̱ma̱a̱, ko̱jo ku̱i̱chá tjiaa̱ xikoó ngo yá.

¹⁷ Nde ngojín xi kjo̱a̱ꞌátsjiee̱n kui, kó nde ngojín xi sa̱ꞌínkaxoma jaꞌeén ki̱a̱ ndi̱yàtieé.

¹⁸ Nínga tsijee̱n tikón, kó ki̱a̱ ku̱i̱chíjmijin nínga jñoó, kó ko̱ꞌna̱xiéni kui nga̱sondiee̱.

¹⁹ Kꞌuiéjiín xota̱ xkjín ki̱a̱ nangi nínga kisꞌijña, ti̱nde kꞌuiéjiín xkjín xi ku̱i̱ꞌíndoo̱ ni xi kisꞌiee̱.

²⁰ Ndeskande ngo ndiè, ngaskande xi ingo ndieè tꞌanangii̱, nga xotaa̱ fíndikoón, kó tsakjón má nga be kótsꞌèn fe kjo̱a̱.

²¹ Bo̱a̱ tsꞌén fe xota̱ xi ꞌniú ndajiín, kó kuí bí ngi̱ndie xi tsoboaá xota̱ xi bendikónjín Néná».