Joo̱b 17 - Xo̱jo̱n eén Néná

¹ »Jè mejeén ma kꞌien an, jè má kjié ni̱xtjinna, kó jè tikónnda nga̱tsjo̱óna.

² Ngayeje xota̱ xi síndo nga ngo foaꞌatjiyajonna xi ndyi̱mojnókiena, kó tsꞌénkotsijée̱n kótsꞌèn ndyi̱tsꞌènxtína.

³ »¡Ji Ne, nángí ji yojòo̱ kjo̱a̱a̱ an, kó chínní, ngatꞌa̱ ꞌyá xí bo̱a̱ sa̱ꞌín tsi jijín!

⁴ Ji xi kiniꞌíntsobéjìi̱n kui xotaa̱, ngata̱ boeꞌéndièjíi̱n nga kui xi sa̱ꞌín.

⁵ Kui xi ta̱ngatꞌanii̱ nga ngo to̱n sa̱ꞌín nga maa̱ botiñá ngo amingo̱, ¡kuí xi̱ꞌba̱ xi chjiéngá sku̱i̱e̱ kótsꞌèn kju̱i̱e̱són ndií!

⁶ »Ji Ne, jí boá xi tiniꞌínkjeꞌení kjo̱a̱soboá, kó ngayeje xotaa̱ ndyi̱mojnókiena, tjín xí ngaskande botítiajón má kje̱n án.

⁷ Jè tjísichjá má ndyikón án ta̱ngatꞌanii̱ xi so xi ndakjaa̱n, kó kjo̱a̱niꞌánkjóna, xikoó tsi ngo tji̱nkꞌi̱én kjimá.

⁸ Kjiꞌanga bena xota̱ xi ndaa̱, achichí fíndikoón, kó xota̱ xi jmíjéjiín kjánjo̱ xota̱ xi ꞌniú ndajiín.

⁹ Xota̱ xi kixi̱i̱, fíra ndi̱yà xí tjimá, kó xota̱ xi jmíjéjiín ndyiojón ndyiojón kꞌuié ngasee̱ ngaꞌniú!

¹⁰ »Ndibájnú kó ka̱ma ku̱i̱xkánjo̱ ngasejnúꞌun, ngatꞌa̱ jè be an nga ngi̱jinjnú nde ngojín xota̱ xi kjínkón tjín.

¹¹ Jè kjimatiñana kjo̱a̱bo̱yaa̱, kó kjifotjosónjín ni xi mejeén ini̱ma̱na nga ka̱ma,

¹² ¡ta̱nga jún ndyi̱bosíkjojnú ni̱xtji̱e̱e̱n, kó ni̱xtjin ndyi̱niꞌánjnú! ¡To̱kó jñó ngase, kó jè kisisie̱èn ndyi̱ꞌmìjnú!

¹³ Tsi kjo̱a̱bo̱yaa̱ xi kjo̱a̱chiyána, kó jñoó je jaꞌatjiyajoo̱n nínga kjiꞌijña an,

¹⁴ tsi nga̱tsjo̱ó xí na̱ꞌmi tꞌíxiáa̱n, kó tsi chi̱ndoo̱ xi xikoó tsi ndichjá án ko̱jo na̱ana kjima,

¹⁵ ¡ja̱ ñání tikón kjo̱a̱chiyána, tsobo̱a̱ kó kui kjo̱a̱chiyaá, ꞌyá xí jaskan sku̱i̱e̱!

¹⁶ Kjo̱a̱chiyaá nijan ko̱yàjo̱ an, ¡kó nijan kjónijínjne̱ nga jójne̱ ki̱a̱ ngi̱jin tꞌanangii̱!»