Joo̱b 16 - Xo̱jo̱n eén Néná

Xi ma nijoón ndi̱yà nga tsíchji̱a̱ Joo̱b

¹ Joo̱b bi̱ katsoó Elifaa̱:

² «Ngayeje ni xi je kiꞌmíjnú jún achichí jè kjín ndi̱yà nga je tsintꞌie an, ¡kó kui eén nde katsꞌéndajónjínna!

³ A jmíjín kótsꞌèn kju̱i̱e̱ni kui én xí jmí ni chjíjiín. Míkjo̱a̱a̱ nga to̱kó ndyi̱ndokjo̱a̱konjnú.

⁴ Tsi ngajona tindyiónjnú, ¡ti̱ bo̱a̱ ti̱ tsꞌén kuichjiájojnúꞌun nga! ꞌNiú kongítaꞌínjnúꞌun, kó kojnókiejnúꞌun nga sa̱ꞌintíyáa̱ tokó án.

⁵ Ta̱nga tsi an xi tikón an ngajojnú, sa̱ꞌinꞌniútakonjnúꞌun nga kuichjiájojnúꞌun én xi sa̱ꞌíndajonjnú xi sa̱ꞌínkꞌíxió xi so xi ndakjaa̱n.

⁶ »Tsi kuichjiá an, xixiójín xi so xi ndakjanna, kó tsi xió kotíjña̱ an, ti̱nde bo̱a̱ tsꞌén tjoꞌóxínjín nga.

⁷ Ta̱nga ji Ne, jè kiniꞌínkjié ji ngaꞌniúna, kó jè kachjeꞌéxínní ngayeje xota̱ ndiꞌana.

⁸ Kjo̱a̱xkꞌiénna bokó ni xi kjimana, jè kamáyójin kje̱n án, kó kuí nii̱ xi bokó xí so xi ndakjanna.

⁹ »Achichí tjítsꞌénxchánjo̱na Néná, nga tsꞌénmongatji̱ngina ko̱jo tjítsꞌénxi̱na, kó ngaskande kjinieya má ṉꞌni̱u̱ kondra̱ tsa̱ꞌa̱n, ¡achichí on kotsijenna xikó maá ngo kondra̱!

¹⁰ Kondra̱na tsíchji̱a̱taꞌinna, ko̱jo tsajnókiena, kó tsatꞌa tꞌanijón án, sꞌe̱ ngo tjín katsꞌén yojoo̱ nga yeꞌéna.

¹¹ Néná jè katsꞌénkꞌasꞌienna ngi̱ya tsja xota̱ xi ꞌniú ndajiín.

¹² Achichí nda tikón an katsaki, ta̱nga Néná katsꞌénkjiékjo̱a̱na, xikoó tsi kjásén án iskjíbé, sꞌe̱ katsꞌénxi̱na, kó ta̱soboá án askjanjo̱na.

¹³ Jè jaꞌatjiyajonna jájuún xi kjiní yáyojoó, kó nde ni̱ma̱jín kamaá nga yeꞌeé chjo̱ondáyána, kó sana ki̱a̱ katjon tꞌanangii̱.

¹⁴ Kijítsꞌuiéna xikoó ngo nda̱ xi kján, kó ti̱ katsꞌénꞌón nginií nínga onna.

¹⁵ »Kó tsajá an ńjño xa̱ꞌya̱, kó ni̱ma̱kjo̱a̱ tsꞌaxié an yojona ngaskande nga kisꞌietꞌa an tꞌanangi jàn.

¹⁶ Jè ske má kje̱n án nga achichí jè askjandá an, jè tjèn má ndyikón án.

¹⁷ Ndatsi jmíni̱xtjin katsꞌen an ni xi ndajín, ta̱nga kixi̱ chjiáa̱ Néná.

¹⁸ »Ji tꞌanangi, ngata̱ ꞌyíjín ji jínna, kó nga boeꞌéjínní ngo ngi̱ndie nínga skjandáyà an.

¹⁹ Jè be an nga ki̱a̱ nkꞌajmii̱ tikón ngo chistiko̱ xi tikón kjo̱a̱ndana, ngatꞌa̱ nga ja̱koxi̱ ki̱a̱ tikón xi ꞌboxiéꞌána.

²⁰ Ngindyi̱ko̱n Néná achichí ndasen kjandà an, ngatꞌa̱ amingo̱na mojnókiena.

²¹ Néná boá xi kꞌo̱xiéꞌána, xikótsꞌèn ꞌnaxiéꞌá ngo amingo̱.

²² Ta̱nga jè makjachó ni̱xtjin nga kotíjña̱ an ngi̱ya nga̱tsjo̱ó, kó ngiti̱ kji̱ndi̱báꞌoyájín an.