Joo̱b 15 - Xo̱jo̱n eén Néná

Xi ma joó ndi̱yà nga tsíchji̱a̱ Elifaa̱

¹ Kósꞌe̱ Elifaa̱ nda̱ xi chji̱a̱ni nangi Temaa̱n, bi̱ katsoó Joo̱b:

² «Xota̱ xi kjínkoón, jmí tsi énkjínkón xi jmí ni chjíjiín xi chji̱a̱, ti̱nde jmí tsi tjo̱ sibé xi ꞌbikítsieni nga̱tsꞌo̱a̱,

³ jmí tsi ta̱soboá kjo̱a̱chi̱ni xí chji̱a̱, ko̱jo tsi én xí jmí ni chjíjiín xi chji̱a̱.

⁴ Kó jí niꞌínchjíjíi̱n kjo̱a̱yandikón xí chjiéngá ko̱e̱ꞌeé Néná, kó nde ndasénjín maá nga chjiéngá ko̱ndokjoaá kui.

⁵ »Ngatꞌa̱ ti̱kuíní ndso̱ꞌbe xi tsíchji̱a̱ ni xi ꞌniú ndajín, ngatꞌa̱ tindokjo̱e̱ ji xikoó ngo xota̱ xi maña̱.

⁶ Ndso̱ꞌbe boá xi ko̱óngítaꞌii̱n, kó jmí tsi an, ti̱kuíní ni xi ko̱ndókjo̱e̱ ji xi kondraa̱ ka̱ma.

⁷ »A jí xí tjón katsen ji ta̱bo̱a̱jiín Andaa̱n. A jí xí tjón kiniꞌándaa̱ ta̱bo̱a̱jiín na̱xi̱i̱.

⁸ A ki̱a̱ ndókjo̱e̱ni ji mosoo̱ nkꞌajmii̱ xi fochó ngindyi̱ko̱n Néná, tsi̱ꞌe̱ nga kui ku̱i̱ꞌaa̱ ngo kjo̱a̱botíxoma.

⁹ Mí ni xi ye ji xi yàjínjne̱ ji̱n, kó mí ni xi makjiín xi makjínjínjne̱ nga.

¹⁰ Ngi̱jinjne̱ síndo xota̱ xi je kichjí tokó ko̱jo xi je xchá, xota̱ xi xchá ngase ji̱n, ta̱bo̱a̱jiín na̱ꞌmíi̱.

¹¹ A chiboa maá nga ti̱kuíní Néná xi tjítsꞌéndájoón, kó a chiboa maá én xí tsjatsꞌèn tjindókjo̱a̱joo̱.

¹² »Ánní nga je tjítsꞌénkjinkoon ini̱ma̱a̱, kó míkjo̱a̱a̱ nga ꞌbíchjándsékón ndyikin ji.

¹³ Ánní nga Néná tiniꞌínxchínje̱ kon ji, kósꞌe̱ ta̱xkiya tindokjo̱e̱ ji.

¹⁴ ꞌYání bo̱a̱ xota̱ nga̱sondiee̱ tsi̱ꞌe̱ nga tsjie kꞌo̱xié yojoo̱, ko̱jo nga bo̱a̱ ka̱tso̱ nga jmí jéjiín.

¹⁵ Néná ndeskande ndítsjiee̱ ꞌniákónjín, kó ti̱nde nkꞌajmii̱ tsjiejín ngindyi̱ko̱n kui.

¹⁶ Akja̱ꞌmíra̱ xota̱ nga̱sondiee̱ ka̱maꞌniátakón, nga be nga ndajín ko̱jo nga chꞌo, nga xikoó tsi xíndaá nga ni xi ndajín mejeén sa̱ꞌín.

¹⁷ »Ji Joo̱b, tasínijìnní, kó an xiyaá ni xi je kamábe an.

¹⁸ Kuí bí ni xi akóyájne̱ xota̱ xi kjínkoón, ni xi akóyaá xota̱ xi xchaá kui, kó ꞌbíꞌmájín.

¹⁹ Néná ta̱kuítsí xi katsjaá tꞌanangii̱ kó jmí xota̱ xi xín nangi kisꞌiejín ngi̱jii̱n.

²⁰ Xota̱ xi ꞌniú ndajiín, ngayeje ni̱xtjin nga ꞌbíndo nga tsie kjo̱a̱ni̱ma̱a̱ niꞌánkjaꞌatio, kó kui xota̱ xi ndajiín, nde bejín kókjiꞌi ni̱xtjin xi katseꞌeé.

²¹ Ngatsjéni̱xtjin nga ntꞌié ni xi mindyiandíkoón, kó kjiꞌanga sakoó kjo̱a̱xió, fochó xota̱chejeé, kó kjánjo̱.

²² Sꞌijinjiín nga kjo̱tjongii̱ yojoo̱ nínga tikón kjo̱a̱bo̱yaa̱, kó ta̱kuítsí ni xi koyaa̱ nga ki̱cha̱ si̱ꞌankꞌienni,

²³ ríkieé skji̱ni̱e̱ yojoo̱, jè be nga je tsá ko̱yà.

²⁴ Kuíni nga kjo̱a̱ni̱ma̱ foaꞌatio ko̱jo tsakjón má, xikó maá ngo nda̱ re xi je ku̱i̱xkánjo̱,

²⁵ kuíni nga bo̱a̱ kjimaa̱ ngatꞌa̱ iskjininkꞌaa̱ tsja Néná, kó nkꞌakon kamá kondraa̱ kui xi tsi̱ꞌe̱ ngayeje ngaꞌniuú.

²⁶ Achichí nkꞌakon kamá nga kijítsꞌuieé Néná, nga tjiyátsjà ni xi bosikójo nga fí kjo̱a̱xcha̱án.

²⁷ Kje̱n ngaskande bi̱ yiꞌii̱ nga xinié, kó ndáyaá achichí yiꞌi,

²⁸ ki̱a̱ kisꞌijña na̱xi̱ńdáꞌniú xí je kjiꞌitiya, ndiꞌa xi je ngiti̱ jmíjín xi síndoyá ngatꞌa̱ je ixóndó,

²⁹ jè ngiti̱ ndajín ko̱e̱je̱e̱, kó kjo̱a̱cho̱o̱n jè tsá kju̱i̱e̱, kó jè ngiti̱ ka̱matsiejín ngase ni xi tjiín.

³⁰ Ka̱májín kjo̱tjonginii̱ yojoo̱ kjo̱a̱bo̱yaa̱, xikónií ngo yá xí je kití ka̱ma, ¡Néná sa̱ꞌínkjié nga ta̱ ngo ndi̱yà ko̱ótsiérií tjo̱o̱ tsꞌoa!

³¹ »Xota̱ xi ꞌniú ndajiín ngata̱ maꞌniátakónjín kjo̱a̱a̱ ni xi jmí ni chjíjiín, ngatꞌa̱ kuí boá kui nii̱ xi xꞌi̱ṉcha̱joni.

³² Ngindie ni̱xtjin ko̱yà, kó kꞌuiéjiín xota̱ tji̱e̱,

³³ bo̱a̱ ka̱maa̱ xikoó tostsi̱je̱è xí boajájiín to, ko̱jo tsi xikó maá yáꞌolibo̱ xi bixó naxoó.

³⁴ Xota̱ xi ꞌniú ndajiín kju̱i̱e̱, kó jmí xota̱ tji̱e̱ kꞌuiéjiín, kó ndiꞌaa̱ xota̱ xi ma cho̱n nga ꞌboṉcha̱a̱, ndiꞌí boá xi sa̱ꞌínkjiéni.

³⁵ Ni xi ndiso boá xi kjimaxchá ngi̱jin yojoo̱, ngatꞌa̱ xikoó tsi ndí tsaꞌa ko̱jo tsi ndí tsijeén kjo̱a̱a̱ ni xi ndajiín».