Joo̱b 14 - Xo̱jo̱n eén Néná

¹ »Xota̱ nga̱sondiee̱, ta̱chiboa tsí ni̱xtjin ꞌbíndo, kó tsie kjo̱a̱ni̱ma̱ foaꞌatio.

² Bo̱a̱ kón xikoó naxoó: fotjo, kó nga bichá achichí tsá xíꞌniú, bo̱a̱ kón xikoó tji̱nkꞌi̱e̱én nga achichí tsá foaꞌa.

³ Kó nga nde bo̱a̱ tsꞌén an titsitsijínní, kó mejeén xchi̱e̱ ji tsi nda ko̱jo tsi ndajín tjítsꞌen an.

⁴ ꞌYá xí ka̱maa̱ sa̱ꞌíntsjie ni xi ndándií. Ta̱ꞌyajínni.

⁵ Ni̱xtjin tjiín nga ku̱i̱ndyionjne̱ nga̱sondie, kó jí jè bo̱a̱ kase ji kókjiꞌi sá ka̱majne̱ nga ku̱i̱ndyionjne̱. Jí boá xi ikꞌíjñí ji ngo tsindió xi jmíjín xi ma foaꞌatjoón.

⁶ ¡Ngiti̱ tsitsijíi̱n! Xióchíi̱n ꞌne̱. ¡Te̱ꞌéndiè ji nga tsjatsꞌèn sa̱ꞌínkjién to̱n xi je katsꞌén nga ngo ni̱xtjii̱n!

⁷ »Ngatꞌa̱ yá xí je ikichaá, síndo ngase ja̱ma̱a̱, kó ka̱márií nga xtjóntsꞌién nginí.

⁸ Ka̱maxchárá ja̱ma̱a̱ ki̱a̱ tꞌanangii̱, kó kjo̱ndora̱ tjatsꞌen kui yaá ki̱a̱ ngi̱jin ńdie kixií,

⁹ ta̱nga ngije sa̱ko̱ó ndáfoa, xtjóntsꞌién nginí, ko̱a̱ja̱ nginií naxó, kó kꞌuié nginií tjia, xikó maá ngo yá xí sꞌe̱ kisitji̱e̱ má.

¹⁰ Ta̱nga tsi xota̱ nga̱sondiee̱, xi ko̱yà, kó tsi ta̱ ki̱a̱ tsí tji̱e̱n fe kjo̱a̱mindyioo̱n, ñání fochó ngijee̱.

¹¹ Xikó tsꞌén chaja ndáfoaa̱ ndáchíkoón, ti̱ bo̱a̱ ti̱ tsꞌén fe, ko̱jo xíyà ndejeèꞌ nga.

¹² Bo̱a̱ tsꞌén nga xota̱ nga̱sondiee̱ ꞌme, kó ngiti̱ foaꞌáꞌyájiín. Tji̱e̱nga tikón nkꞌajmii̱, kꞌuiéjín ngo xota̱ xi kjo̱a̱ꞌáꞌyaá ngije kjiꞌiféjo̱ kjo̱a̱bo̱yaa̱.

¹³ »Achichíra̱ ndakjiꞌi tsi kꞌuijñíꞌmí ngotjónní ki̱a̱ nga̱tsjo̱ó, ngaskande nga xi̱xió kjo̱a̱xcháa̱n, tsi kꞌuijñí ji ngo ni̱xtjin nga kjo̱a̱ꞌátsjien nginií án.

¹⁴ Tsi ko̱yà xota̱ nga̱sondiee̱, a kꞌuijñá nginí. Ngayeje ni̱xtjin nga kotíjña̱ an, skoya an, ngaskande nga sꞌi̱jñandé án kjo̱a̱a̱ kjo̱a̱bo̱yaa̱.

¹⁵ Kósꞌe̱ nga ko̱ndókjo̱e̱ni, an sa̱ꞌinseén, kó ka̱mamejeén tsitsíjinní, ngatꞌa̱ jí boá xi kiniꞌíndení.

¹⁶ Ta̱nga ngotꞌe̱ ꞌne̱ tiꞌbíxki̱ ji chi̱bo̱a̱ ndsa̱ko án, kó nde xꞌe̱xki̱jínra̱ ji jéna.

¹⁷ Ngora̱ koxta̱ ku̱i̱ndyie ji ngayeje kjo̱a̱tsobéna, kó si̱ꞌinjetakínraní ngayeje jéna.

¹⁸ »Kjénní nga na̱xi̱ xi bixóndoó, ngiti̱ tjoninkꞌajín nginí, kó ndi̱jo̱o̱ sasíkjo ngi̱ndie nínga síndo.

¹⁹ ¡Ngaꞌniuú ndáfoaa̱ tsꞌenkjié ndi̱jo̱ yiꞌii̱, kó stsé ꞌniuú fíjo̱ xa̱a̱ tꞌanangii̱, kó jí ti̱ boá ti̱ tsꞌén niꞌínkjié ji kjo̱a̱chiyájne̱ nga.

²⁰ Ngatsjéni̱xtjin nga jí boá xi ꞌniú ngase ji, kó niꞌíncheje ji xota̱ nga̱sondiee̱, niꞌínkjatsén jí kje̱n, sꞌe̱ jaskan nangíyé ji ki̱a̱ ngi̱ya nga̱tsjo̱ó.

²¹ Tsi jaskan si̱ꞌandikón ndií, jè ngiti̱ sku̱i̱e̱jín kuí kui nii̱, ko̱jo tsi ni̱ma̱kjo̱a̱ si̱ꞌan, ngiti̱ ka̱makjínjiín kui nii̱.

²² Ta̱kuítsí xi so xi ndakjaa̱n xi sku̱i̱e̱ yojoo̱, kó achichí ndasen ka̱maa̱ ini̱ma̱a̱».