Joo̱b 13 - Xo̱jo̱n eén Néná

¹ »Ngayeje kui nii̱, ndyikón án má xi je kamábe, kó ti̱ je tsintꞌie an, ko̱jo je kamákjínna nga.

² Ni xi je yàjnú jún, ti̱ je be an nga, bejiínko̱n an nga jún xi ya ngasejnú xikoó an.

³ Ta̱nga ta̱sá Néná xí tsi̱ꞌe̱ ngayeje ngaꞌniuú kuichjiájo an, ngatꞌa̱ mejénna kꞌoxiéꞌá an yojona kjo̱a̱a̱ ni xi kjimana,

⁴ ngatꞌa̱ nga ja̱koxi̱, xota̱ ndiso boá jún, kó bo̱a̱ kónjnú jún xikoó chji̱ni̱e̱ndiki xi jmíjín xi tsꞌéndíkii̱.

⁵ ¡Tsi ta̱sá kjókjojnú ndso̱ꞌbájnú, kuí nii̱ xi ko̱kó nga xota̱ xi kjínkónjnú!

⁶ »Ngotꞌe̱ ꞌne̱ ngo kjo̱a̱nda kuíꞌájnúꞌun, ndaꞌyá májnúꞌun, kó tasiénijónjnúu̱ énna:

⁷ A kꞌuindísójnú nga si̱ꞌankjiénjnú jaꞌeén Néná, kó a kꞌuindísójnú nga kongínjindajo̱jnú kuí.

⁸ A niꞌánkjójnú nga ngo kjo̱a̱nda ndyi̱niꞌánjnúu̱ nga jún xi xota̱ xi fíjindojo̱ Néná kjimajnú.

⁹ Kó tsi Néná xí skótꞌajnú jún, a ka̱má ko̱jno̱chajnú kuí, xikó tsꞌén mojnóchàjnú ngo xota̱.

¹⁰ Ta̱sara̱ Néná sa̱ꞌínxchánjo̱jnú, ngatꞌa̱ tjín xota̱ xi ndyi̱mongínjnúu̱ kjo̱a̱ndaa̱.

¹¹ Nga ja̱koxi̱, ko̱nda̱konrajnú kjo̱a̱jee̱, kó júnra̱ xi kꞌo̱kaniéjnú ndikoón!

¹² »Jún ndyi̱ndokjo̱a̱jnú ngo énkjínkón xi jmí ni chjíjiín, kó ni xi ndyi̱ꞌmìjnú nga ndyi̱ꞌnaxiéꞌájnú yojojnú, xikónií tsi kjibixóndó xikoó ndásee̱.

¹³ »Ta̱sá ndaꞌyájnúꞌun, án mára kuichjiá an, kósꞌe̱ jaskan ta̱ xikó ngatamana ngijee̱.

¹⁴ Ánní nga ti̱ aa̱n xi sa̱ꞌinꞌóo̱n yojona, kó míkjo̱a̱a̱ nga ndajín sa̱ꞌinjo̱ an kjo̱a̱mindyionna.

¹⁵ Néná boá xi kjimaꞌniáko̱n an, ndatsi kui xi mejeén sa̱ꞌínkꞌiénna, ta̱nga kꞌoxiéꞌá án yojona ngindyi̱ko̱n kui.

¹⁶ Kó ti̱kuíní bo̱a̱ xi kꞌo̱xiéꞌána, ngatꞌa̱ nde ngojín xota̱ xi ꞌniú ndajín xi ka̱maa̱ kjo̱chó ngindyi̱ko̱n kui.

¹⁷ »¡Nda má tasiénijónjnúꞌun ni xi je tikónndana nga kuichjiá an!

¹⁸ Ngotꞌe̱ ꞌne̱, kꞌoxiéꞌá an yojona, kó jè be an nga Néná sku̱i̱e̱ nga jmíjéjínna.

¹⁹ Tsi tjín xí mejeén ko̱óngítaꞌinna, ta̱sá xió kotíjña̱ an, kósꞌe̱ ngatꞌien an ngijee̱.

²⁰ »Ji Ne, ta̱ jó tsí kjo̱a̱nda xi míꞌaá, tsi ko̱e̱ꞌéní, nde chjiénjín nga ji kotíjña̱ꞌmaa.

²¹ ¡Ngiti̱ botíjéjín ngasení, ti̱nde ngiti̱ boeꞌéndièjín ji nga stsakjon ngase an!

²² Chji̱e̱ꞌéní nga kꞌoxiéꞌá an yojona, kó an kuichjiájoo, kó tsi ji xi bo̱a̱ tsꞌén mejeén, an tjón kuichjiá an, kósꞌe̱ ji ndokjo̱e̱jení ngijee̱.

²³ ¡Tꞌíyéní kókjiꞌi ni xi ndajín ko̱jo kókjiꞌi jé xí katsꞌen an! ¡Takéní nínga katsꞌenkjatsoón ndso̱ꞌba án!

²⁴ Ánní nga mindyinꞌmíní. Ánní nga kondraa̱ kiniꞌínní.

²⁵ Ánní nga an timiyitji̱nginí, xi ye ji nga án boá xikoó ngo xka̱ kixí xi fíjo̱ tjo̱o̱.

²⁶ Jí boá xi tifongitaꞌínní kjo̱a̱a̱ ni xi ndajín, ¡kó tibotíjéní kjo̱a̱a̱ jé xí katsꞌen an ndeskande koó nga xo̱ngò án!

²⁷ Jè xikoó tsi ńꞌniúki̱cha̱ tjitáꞌniuú an, ta̱jmì chi̱bo̱a̱ní nga tichindéní, ¡ngo ndsa̱ko án kjien an, kó ji ki̱a̱ ꞌmitji̱ngíní!

²⁸ »Yojona je kjife, xikó maá tsi je kjifondo, xikó maá ngo ńjño xi kjinie xobií.