Joo̱b 12 - Xo̱jo̱n eén Néná

Xi ma jaán ndi̱yà nga tsíchji̱a̱ Joo̱b

¹ Kó Joo̱b, bi̱ katsoó Sofaa̱r:

² «¡Nga ja̱koxi̱ jún boá xi mostroo̱ xota̱ na̱xi̱ńdaá! ¡Kó ngije ko̱yàjnú, kju̱i̱e̱ kjo̱a̱kjínkoón!

³ Ta̱nga ti̱ tjín xko̱a̱tokò án nga, kó júnjín xi kjínkón ngasejnú, ta̱bo̱a̱jiín an. ¡Kó ꞌyá xí bejín ni xi ndyi̱ꞌmìjnú jún!

⁴ »Ngasꞌe̱, kjiꞌanga tsíchji̱a̱a̱ Néná, ngatsjéni̱xtjin nga katsꞌénsénna, ta̱nga ngotꞌe̱ ꞌne̱, ngaskande já amingo̱na mojnókiena, ngayeje xotaa̱ mojnókiena ndatsi kixi̱ an.

⁵ ¡Xota̱ xi jmíjiín kjo̱a̱xti, nde niꞌínjín maá nga chji̱a̱taꞌin xota̱ xi ndyi̱foaꞌatio kjo̱a̱ni̱ma̱a̱!

⁶ Xota̱chejeé nda ngase ꞌbíndo, kó ꞌniú ꞌbíndo xota̱ xi chꞌo tsoó Néná, ngatꞌa̱ kuí boá xi katsjaá ngayeje nii̱.

⁷ »Ta̱nga tasíyàjnúu̱ cho̱o̱, kó kuí ko̱kóyájnú, tasíyàjnúu̱ ni̱sie xi tjín nkꞌa jàn, kó kuí ka̱tso̱yàjnú,

⁸ tasíyàjnúu̱ tꞌanangii̱, kó kuí ko̱kóyájnú, tasíyàjnúu̱ tji̱o̱ xi tjín ngi̱jin ndáchíkoón, kó kuí ka̱tso̱yàjnú.

⁹ Ngayejee̱ nga je be nga Néná boá xi katsꞌénda ngayeje nii̱.

¹⁰ ¡Néná boá xi tjiyátsjà kjo̱a̱mindyioo̱n ngayeje xi tjín nga̱sondiee̱!

¹¹ Xikótsꞌèn tji̱bo̱a̱nijoo̱n ntꞌieé ngayeje nii̱, kó najee̱n be kó chinie ngayeje nii̱,

¹² xota̱ xi je kjín nónií nga síndo ma kjínkón, ko̱jo makjiín ngayeje nii̱.

¹³ »Néná tjiín kjo̱a̱kjínkón ko̱jo ngaꞌniú, kó kuí boá xi ꞌbínda ngo ni, kó fotjosón kui nii̱.

¹⁴ Tsi Néná tsꞌénkixóndó ngo ni, jmíjín xi ka̱maa̱ skjinínkꞌá nginí. Tsi Néná xi ku̱i̱ꞌíjñaꞌniú ngo xota̱, nde ngojín xi ka̱maa̱ ku̱i̱ꞌíjñandé.

¹⁵ Tsi mejénjiín sa̱ꞌínkaꞌa stseé, ngayeje kꞌijñaá nga xí, ta̱nga tsi mejeén nga ko̱a̱ꞌa, ngayeje tꞌanangii̱ nga sꞌingandá.

¹⁶ Ngi̱ya tsja tikón ngaꞌniuú, ko̱jo kjo̱a̱kjínkoón, ngi̱ya tsja tikón xi ꞌboṉcha̱a̱, ko̱jo chꞌíi̱ncha̱joo̱.

¹⁷ Néná boá xi tsꞌén nga chaja kjo̱a̱kjínkoón xota̱ xi kjínkoón, kó nga xota̱ xi be tsi nda ko̱jo tsi ndajín ndyi̱tsꞌèn xotaa̱, ma tsobéjii̱n.

¹⁸ Kuí boá xi tsꞌenkjié xaá xota̱ xi ndajín xi botixómaá, kó xikoó tsi ngo ńꞌniú ꞌbítꞌa ndáyaá,

¹⁹ kuí boá xi foaꞌáxiín xaá chináꞌmii̱, kó tsꞌenkjié kjo̱a̱ xota̱ xi tjiín ngaꞌniuú,

²⁰ xota̱ xi tsjá kjo̱a̱botíxomaa̱ bókjo tsꞌoa, kó tsꞌén nga xota̱ xi xchaá chaja kjo̱a̱kjínkoón.

²¹ »Néná tsꞌénkjáꞌa kjo̱a̱soboá xota̱ xi tjiín ngaꞌniú ko̱jo xi yandikoón,

²² Néná boá xi ꞌbijñá tsijen ti̱xa̱na̱nga̱a̱ tꞌanangii̱, kó ꞌbijñá tsijen kjo̱a̱bo̱yaa̱,

²³ kuí boá xi tsꞌénkjín na̱xi̱ńdaá, ko̱jo tsi tsꞌenkjié kjo̱a̱, kuí boá xi tsꞌéntsójó, sꞌe̱ ꞌbitíkó nginí.

²⁴ »Néná boá xi tsꞌén nga xota̱ xi botixómaá chíyaá kjo̱a̱kjíntakoón tsi̱ꞌe̱ nga ngiti̱ sku̱i̱e̱jín mí ni xi sa̱ꞌín.

²⁵ Kó kꞌuitsómá nínga jñoó nga sti̱ngí xikoó tsi xota̱ xi ti̱ka̱ ko̱jo tsi xota̱ xi chꞌi̱.