Joo̱b 10 - Xo̱jo̱n eén Néná

¹ »Jè tsꞌajonna nga tikón an kui nga̱sondiee̱, kuichji̱a̱mára an kjo̱a̱a̱ kjo̱a̱ndasenna, ko̱jo kjo̱a̱a̱ kui ni xi on tjíjii̱n ini̱ma̱na

² Kuíni nga je bi̱ kixiáa̱n Néná: “Ji Ne, ngata̱ niꞌínjéjínní, ¡kó tꞌíyéní míkjo̱a̱a̱ nga an tibixkénje̱ní!

³ A ndakjíꞌí nga tiniꞌínꞌínní, ko̱jo nga tiniꞌínchꞌí ji ni xi ndse̱ ji katsꞌénda, ko̱jo nga tsja maa̱ ni xi tsꞌén xota̱ xi ꞌniú ndajiín.

⁴ A bo̱a̱ tsꞌén yé ji nii̱, xikótsꞌèn yàjne̱ ji̱n xi xota̱ nga̱sondie ji̱n.

⁵ A bo̱a̱ kjiꞌi chiboa nó mindyin ji xikoó xi mindyionjne̱ ji̱n xi xota̱ nga̱sondie ji̱n.

⁶ Tsi̱ꞌe̱ nga ku̱i̱ndyi̱séyé ji ni xi ndajín xi katsꞌen an, ko̱jo nga ku̱i̱ndyi̱sé ji mí jé xí katsꞌen an.

⁷ ¡Ndatsi jè yé ji nga jmíjéjínna, kó ti̱ jè be an nga jmíjín xi ka̱maa̱ kꞌo̱xiéna ngi̱ya ndse̱!

⁸ ”Ji Ne, ndse̱ boá xi kiniꞌínkjìn jí nga kiniꞌíndení, kó ngotꞌe̱ ꞌne̱ akasíkje ji ni xi niꞌínkjé, kó mejeén nga si̱ꞌinkjiení.

⁹ Ngatjaꞌátsjiee̱n nga xikó má tsꞌén niꞌánda ngo ti̱jì bo̱a̱ má tsꞌén kiniꞌíndení, kó ngotꞌe̱ ꞌne̱ ńdie mejeén si̱ꞌin nginí.

¹⁰ Xikoó tsi kiniꞌínkꞌájìnní xikó tsꞌén niꞌánkꞌájin ntsjeén, kó kiniꞌíndení xikó tsꞌén manda kjixoo̱.

¹¹ Jí boá xi yojo ko̱jo tji̱xin akjaꞌmeni ji yojona, kó ikꞌíkje ji ńdana, ko̱jo naxána.

¹² Jí boá xi katseꞌéní kjo̱a̱mindyion, ko̱jo kjo̱a̱ni̱ma̱takón, ¡kó achichí nda kichíi̱n a̱si̱énni̱xtjinna!

¹³ Ngi̱jin ini̱ma̱a̱ boá nga tikónjin kui nii̱, kó jè be an nga kui nii̱ xi tjíjin takín,

¹⁴ ¡jí boá xi tichindéní tsi̱ꞌe̱ nga xchi̱e̱ ji tsi katsꞌenjé án, ngatꞌa̱ si̱ꞌinjetakínjín ji jéna!

¹⁵ ¡Xi̱xꞌi̱a̱n xò án tsi katsꞌenjé án! Kó tsi jmíjéjínna, nde májín ko̱n an nga ji skoꞌaa̱. ¡Jè tsꞌajonna nga kixi̱jín ko̱jo nga ndasen tikón an!

¹⁶ Tsi nkꞌakon ka̱ma an, tichindéní xikó maá ngo xandi̱je̱ xi tsꞌénkonda ni xi skji̱ni̱e̱, sꞌe̱ tsí sa̱ꞌintíyá chií an katsaki, kó tji̱e̱nmá tibokení ngaꞌniúu̱ nga tiniꞌínkjiéní.

¹⁷ Sakó ngasee̱ ni xi bokó nga an xi konna, kó ꞌniú ngase tiniꞌínxchínje̱ní, xikó maá jájún xi xixiójín nga ndyi̱kjánjo̱na.

¹⁸ “Míkjo̱a̱a̱ nga katseꞌéndiè ji nga katsen an. ¡Ta̱sara̱ ndatsi kꞌien an katsaki, ko̱jo tsi nde ta̱ꞌyajín xi kamábena!

¹⁹ ¡Ndara̱ ngase kamána tsi to̱bo̱a̱a̱ katsenjín an, tsi ta̱ síkijí ngi̱ya nga̱tsjo̱ó jàn kijí an!

²⁰ A chiboajín má ni̱xtjin xi tikón an. ¡Ngo kjo̱a̱nda kuíꞌaá, te̱ꞌéní kjo̱a̱xió! ¡Mejénna nga kꞌuiéchiína kjo̱a̱niꞌándajon.

²¹ Ngindiee̱ nga koaꞌañáa̱ nga kjuín án nínga ngiti̱ kjoéꞌe̱ꞌoyájín an, ki̱a̱ ngi̱ndie nínga jñoó, ko̱jo nínga tikón kjo̱a̱bo̱yaa̱,

²² ki̱a̱ na̱xi̱ńdá nínga ꞌniú jñoó, nínga ta̱xkiya síndo ngayeje nii̱, ko̱jo nínga ndiꞌií xikó tsi jñó!”»