Jonaa̱ 4 - Xo̱jo̱n eén Néná

Jonaa̱ askjotíjo̱ Néná

¹ Ta̱nga Jonaa̱ achichí katsꞌénxchán, ngatꞌa̱ tsjajín kamaá nga Néná katsꞌénjetakoón xota̱ na̱xi̱ńdá Nínibe̱.

² Kó achichí xtií nga bi̱ katsoó Néná: —¡Ja̱ bo̱a̱ jè bo̱a̱ kixian an Ne, ja̱bo̱a̱ jè bo̱a̱ kixian an! Bo̱a̱ má kiniꞌín ji ni xi katsꞌenkjó án nga si̱ꞌin ji nga kisꞌijña an nangina. Kuíni nga kamámejénna nga kjinnii̱ nínga tindyin ji tsanga an. »Jè be an nga achichí nda ji xota̱ Ne, nga ma ni̱ma̱a̱ ngayeje xotaa̱, ko̱jo nga achichí niꞌin kjiꞌi nga si̱ꞌinxchín jí. Achichí tsie kjo̱a̱tjó tjiín, nga kjiꞌanga sa̱ꞌinjée̱ xotaa̱ se ji, jaskan bosíkje nginí ji ni xi kandokjo̱e̱, kó bo̱a̱jín niꞌínje̱ ji ngijee̱.

³ Kuí ni xi̱ꞌba̱ xi tsjajín mána an, ta̱sá mejénna nga ti̱ꞌinkꞌinní ngotꞌe̱, tsi bo̱a̱ si̱ꞌin ji, ta̱sá ti̱ꞌinkꞌinní.

⁴ Kósꞌe̱ Néná bi̱ katsoó Jonaa̱: —Míkjo̱a̱a̱ nga bo̱a̱ tsꞌén tiniꞌínxchín kón ji.

⁵ Kó Jonaa̱ jatjoxieni ki̱a̱ na̱xi̱ńdaá, kó ngo ngi̱ndie nínga yanii̱ ngayejee̱ na̱xi̱ńdaá kijíkꞌíjñá. Sꞌe̱ ki̱a̱ katsꞌénda ngo ndiꞌa tji̱nkꞌi̱én xi xka̱ índoo̱ nkꞌaa̱, kó ki̱a̱ kisꞌijñangi tsi̱ꞌe̱ nga katsꞌénchjánjiín ndoboaá. Kó ki̱a̱ ngindie tji̱nkꞌi̱e̱én kui ndiꞌaa̱ kisꞌijña, sꞌe̱ askoyá míra̱ ni xi ka̱maa̱ kui na̱xi̱ńdaá.

⁶ Kó Néná ngo xka̱ katsꞌéntjó, kó ta̱sasá kamánkꞌá, kó yíꞌmá ndiꞌa tji̱nkꞌi̱én nínga tikónyà Jonaa̱. Kó bo̱a̱ tsꞌén Néná ngo tji̱nkꞌi̱én xí nda ngase katsjaá Jonaa̱ tsi̱ꞌe̱ nga ꞌniújín sibé ka̱maa̱. ¡Jonaa̱ achichí tsjá kamaá kjo̱a̱a̱ kui xka̱a̱!

⁷ Ta̱nga jaskan nga kamángindyiojón, Néná ngo chi̱ndo katsangiya nínga tikón kui xka̱a̱, kó kui chi̱ndoo̱ katsꞌénꞌoón, sꞌe̱ katsꞌénxí tji̱ꞌni̱u̱,

⁸ kó nga jatjo tsꞌueé, Néná katsꞌénkjaꞌa ngo tjo̱ xi achichí sibé kamá, kó Jonaa̱ ngaskande mejeén je kjiꞌmeyà má. Achichí sibé kamá kui ndoboaá nga Jonaa̱ kamámején maá ko̱yà, kuíni nga bi̱ katsó nga askjandáyà: —¡Ta̱sá ngatꞌien an ꞌne̱, ta̱bo̱a̱jiín tsi kotíjña̱ ngase an!

⁹ Kósꞌe̱ Néná bi̱ katsó nga asíyaá Jonaa̱: —A kixi̱ kjíꞌí nga tiniꞌínxchín ji kjo̱a̱a̱ nga kixí kui xka̱a̱. Sꞌe̱ bi̱ katsó Jonaa̱: —Jo̱o̱n ꞌniú xti mána. Tsi ngiti̱ jmíjín kui xka̱a̱, ta̱sá ngatꞌien an.

¹⁰ Kó Néná bi̱ katsoó Jonaa̱: —Nda̱ kjimaa kjo̱a̱a̱ kui xka̱ xi nde jijín ikꞌítji̱e̱ ji, ti̱nde jijín kiniꞌínxché. Kui xka̱ xi ngo ni̱xtji̱e̱n kamánkꞌá, kó xi ingo ni̱xtji̱e̱e̱n kixí.

¹¹ A kó niꞌínkjéjín ji nga an chjiéngá nda̱ ka̱mana ko̱jo nga ni̱ma̱ ka̱mana na̱xi̱ńdáꞌniú Nínibe̱. Kui na̱xi̱ńdáꞌniuú, úchán ko̱jo kan mi̱ ma xota̱ xi síndo, xi nde bejín mí ni xi sa̱ꞌín tsi̱ꞌe̱ nga kjo̱tjoꞌa, kó achichí cho̱ tjín kuí ngi̱ndiee̱ nga.