Jonaa̱ 3 - Xo̱jo̱n eén Néná

Bi̱ tsꞌén tsintꞌiéꞌeén Néná Jonaa̱

¹ Kó Néná ti̱ tsíchji̱a̱jo nginí Jonaa̱, nga bi̱ katsoó:

² «¡Ti̱sítji̱n, kó tꞌen ji na̱xi̱ńdáꞌniú Nínibee̱! Tꞌíyée̱ xota̱ xi síndo ki̱a̱a̱ kui én xí xiyaá nga ko̱ndókjo̱e̱».

³ Kó ngotꞌe̱ ꞌné nga Jonaa̱ tsintꞌiéꞌeén Néná, kó jastjíe̱n sꞌe̱ kijí Na̱xi̱ńdáꞌniú Nínibe̱. Achichí je kamá kui na̱xi̱ńdaá, nga ngaskande ján ni̱xtjin kamáná nga tsangín ndsa̱kó ngayejee̱.

⁴ Kó tsꞌasꞌien Jonaa̱ na̱xi̱ńdáꞌniuú, kó nga ngo ni̱xtjii̱n nga askjandáyaá xotaa̱ nga bi̱ katsoó: «¡Ngotꞌe̱ yichán ni̱xtjii̱n, Néná sa̱ꞌínkjié kui na̱xi̱ńdáꞌniuú!»

⁵ Kósꞌe̱ ngayeje xota̱ xi síndo na̱xi̱ńdáꞌniú Nínibee̱ índomasien ni xi ndajín xi katsꞌén, kó katsjaá kon nga ta̱ Néná tsí xi ku̱i̱ntꞌiéꞌeén. Kó akó nga kamámejeén nga je ko̱síkjo xikótsꞌèn síndo, kuíni nga ńjño tokjuie tsajá, kó katsꞌénkjaꞌa kjindiá yojoo̱. Ngayejee̱ nga bo̱a̱ katsꞌén, ndeskande xi ꞌniú cho̱o̱n, ngaskande xi ꞌniú ni̱ma̱a̱, ngiti̱ jmí ni iskjiniejín kui ni̱xtjii̱n.

⁶ Kó kjiꞌanga tsintꞌié kuí nii̱ nda̱ re xi botixómaá na̱xi̱ńdáꞌniú Nínibee̱, jastjíe̱n nga̱són yáxíríee̱, sꞌe̱ jaꞌáxín ńjño nda xi yajá, kósꞌe̱ ńjño tokjuie tsajá nga, sꞌe̱ kisꞌijña tꞌanangii̱. Ngayeje kui nii̱ xi katsꞌén ngatꞌa̱ ni̱ma̱kjo̱a̱ íjñá yojoo̱ ngindyi̱ko̱n Néná.

⁷ Kósꞌe̱ kui nda̱ ree̱, tji̱e̱nmá katsangiyaa̱ ngo kjo̱a̱botíxoma ngayeje xota̱ xi chji̱a̱ni na̱xi̱ńdáꞌniú Nínibe̱, nga bi̱ katsoó: «Ngo kjo̱a̱botíxoma tsꞌéntsangiyajnúꞌun an ko̱jo já xí nijan tsꞌénxájo̱na: Nga ngojín xi ni skji̱ni̱e̱. Ngayeje xotaa̱, ko̱jo cho̱yojoo̱, ko̱jo cho̱tsa̱nga̱a̱ nga ngojín xi kjinie nichinie, ti̱nde nga jmí ndáfoa ꞌbijín.

⁸ Ngayejee̱ nga tjiín ngo kjo̱a̱ꞌniú nga ko̱a̱ja̱ ńjño tokjuie, kó cho̱o̱ manda̱ tokjuie ngatásoón. »Kó ti̱ ndyi̱chjiáꞌájne̱ jún, nga ꞌniú ndókjo̱a̱jnúu̱ Néná, kó tꞌíjñámasiénjnú ni xi ndajín xi ndyi̱niꞌánjnú, kó ngiti̱ bixkánjo̱jínjnú xingi̱jnú, ti̱nde ngata̱ ndajín niꞌánjo̱jnú ngo xota̱.

⁹ Tsi kꞌuijñámasien ñá ni xi ndajín xi niꞌán, ka̱mara̱ tsi ta̱ꞌa Néná kjo̱a̱ꞌajinda kjo̱a̱xcha̱án kó sa̱ꞌínkjiéjínná».

¹⁰ Kó Néná nga kamábe nga ngayeje xota̱ xi chji̱a̱ni na̱xi̱ńdáꞌniú Nínibe̱ índomasien ni xi ndajín xi katsꞌén. Néná katsjaá kon, nga katsꞌénkjiéjínni kui xotaa̱.