Jonaa̱ 2 - Xo̱jo̱n eén Néná

Bi̱ tsꞌén tsíchji̱a̱a̱ Néná Jonaa̱

¹ Kósꞌe̱ Jonaa̱ nga tikónyà nga̱tsꞌo̱a̱ kui tji̱o̱ jee̱, tsíchji̱a̱a̱ Néná, kó bi̱ katsoó:

² «Kjiꞌanga jaꞌatio an kjo̱a̱ni̱ma̱, ji Ne, jí xí akasíke̱jení. Kjiꞌanga je mejeén ma kꞌien an, tsíꞌaá nga ko̱si̱ke̱jení, kó akasíke̱jení.

³ »Nínga ꞌniú na̱nga̱a̱ ndáchíkoón ikichijmijínní. Kó ki̱a̱ ta̱ ndáfoa tsí xi kamábe an ta̱jñàní, a xi̱xi̱ yiꞌi ngaꞌniuú ndáchíkoón xi jaꞌaniéna.

⁴ »Ngaskande katsꞌenkjó án nga je ngiti̱ mejénjiín an, kó nga je ngiti̱ kꞌosꞌi̱e̱njín an ngi̱yaa̱ na̱ngo̱xi̱i̱.

⁵ »Jè kijíngandá ndo̱jò ndójo̱ án. Ndáfoaa̱ ndáchíkoón yíꞌmána, kó tsiꞌee̱ ndáfoaa̱ kisitsakjájón tokó án.

⁶ »Katsꞌenkjó án nga je ngiti̱ nginijánjín kjo̱tjokjaní an ki̱a̱ ngindiee̱ ndáchíkoón. Ta̱nga ji, Ne tsa̱ꞌa̱n, jí boá xi kaꞌnaxiéꞌéní.

⁷ »Kjiꞌanga je ngiti̱ jmí ngaꞌniú kisꞌiejínna, jaꞌátsjienna ji, kó tsíchji̱a̱a̱. Kó kui kjo̱a̱ndokjo̱a̱na jachó ngaskande nínga tikón ndiꞌandikóo̱n.

⁸ »Xota̱ xi ndyi̱tsꞌèntsjaà kje̱ꞌe ne, kui ne xi jmíjiín kjo̱a̱mindyioo̱n, ka̱májín bo̱a̱ ka̱tso̱ nga ji xi Nee̱ ji.

⁹ »Ta̱nga an boá xi sa̱ꞌintsjaá kó an boá xi tsja kꞌuiéna nga si̱eé ji. Sa̱ꞌinkjatjosón an ni xi kixiaan nga sa̱ꞌin an. ¡Ngatꞌa̱ ta̱ jí tsí xi maa ꞌnaxiéꞌé ji xotaa̱!»

¹⁰ Kósꞌe̱ ti̱chaa̱n Néná, bi̱ katsoó tji̱o̱ xi ta̱nisién ꞌniú jee̱: «¡Tꞌenni̱ꞌinkjasé ji Jonaa̱ ki̱a̱ tꞌa chji̱ndi̱e̱e̱ ndáchíkoón!»