Jonaa̱ 1 - Xo̱jo̱n eén Néná

Jonaa̱ tsintꞌiéꞌénjiín Néná

¹ Ngo ndi̱yà Néná tsíchji̱a̱jo ngo nda̱ xi ꞌmí Jonaa̱ ndií Amitai̱, kó bi̱ katsoó:

² «¡Ti̱sítji̱n, kó tꞌen ji ki̱a̱ na̱xi̱ńdáꞌniú Nínibe̱, kui na̱xi̱ńdáꞌniú xí jee̱, kó bo̱a̱ tꞌíi̱n kui xotaa̱ nga kui ni xi ndajín xí ndyi̱tsꞌèn, ngaskande ngindyikón án je jeꞌe!»

³ Ta̱nga Jonaa̱, ngindiee̱ nga ki̱a̱ ko̱e̱je̱ na̱xi̱ńdáꞌniú Nínibe̱, ta̱sá na̱xi̱ńdá Tarsii̱ kamámejeén kijí, ngo ngi̱ndie nínga ꞌniú kjin ngase, nínga kamákjiín kui, nga Néná sa̱kójiín. Kó jachó tꞌa ndáchíkoón ki̱a̱ na̱xi̱ńdáꞌniú xi ꞌmí Jope̱, kó ki̱a̱ kasakoo̱ ngo tjotso je xi je makjí má. Íchjí tsi̱ꞌe̱ nga ko̱e̱je̱ya kui tjotsoo̱, sꞌe̱ tsꞌasꞌien, kó achichí tsjátjiín, ngatꞌa̱ katsꞌénkjó nga achichí kjinnii̱ Néná nínga je tsꞌénmonga.

⁴ Ngije tjimájin ngi̱jin ndáchíkoón, Néná katsꞌénkjaꞌa ngo tjo̱ xi ta̱sasá kamáꞌniú, kó kui tjotso jee̱, jè má mejeén ma kakjan.

⁵ Nga ngo nga ngo kui já xí tjimájo̱ kui tjotso jee̱ achichí katsakjónní, kó ndyi̱kjandayà má nga tsíchji̱a̱a̱ ne xi tsꞌéndíkón. Ngije ꞌniú ngase nda̱ kamaá ni xi kjimaa̱, tsꞌajmijin ngi̱jin ndáchíkoón ngayeje chꞌià xí ndyi̱yaꞌa tsi̱ꞌe̱ nga ka̱ma xtja̱ tjotso jee̱. Tji̱e̱nga bo̱a̱ kjima, Jonaa̱ ki̱a̱ xió kjiꞌifé nínga mindyia chꞌià xí boaꞌa kui tjotso jee̱.

⁶ Kó nda̱ ngito̱ko̱o̱ kui tjotso jee̱ kijíkóntiñaa̱ Jonaa̱, kó bi̱ katsoó: —¡Mí xí tiniꞌín ji kꞌi̱e̱e̱! ¡Míkjo̱a̱a̱ nga kꞌi̱e̱ titsjafé kon ji! ¡Ti̱sítji̱n ji kó ndokjoée̱ Ne tse̱ tsi̱ꞌe̱ nga ko̱síko̱joná, tsi ta̱ꞌa ni̱ma̱ ka̱maa̱ ñá, kó kꞌo̱xiéꞌáná!

⁷ Kó ti̱ kjiꞌa kui já xí tjimáyà kui tjotso jee̱, bi̱ katsoó xkjín: —Ja̱bíjnúꞌun kó ngo kjo̱a̱chꞌáṉcha̱ końtón, tsi̱ꞌe̱ nga xcha̱ ꞌyára̱ni xi konnii̱ kjo̱a̱a̱ ni xi ndajín xi kjimáná. Kó ngije askotꞌasón, kamábe nga Jonaa̱ boá xi konnii̱.

⁸ Kósꞌe̱ kui jaá bi̱ tsꞌén asíyaá Jonaa̱: —¡Tꞌíyéjne̱ ngotꞌe̱ má, míkjo̱a̱a̱ nga bi̱ kjiꞌi kjo̱a̱ni̱ma̱ xi ndyi̱bitjatiójne̱! Mí xá xí niꞌín ji. Ñá kjindibéni. Ñání nangìi̱. Ñá na̱xi̱ńdá ndókjo̱e̱ni ji.

⁹ Kó Jonaa̱ bi̱ katsoó kui jaá: —Nda̱ ebreo̱ án, kó Néná boá xi tsꞌéntsjàa̱, kui Néná xí botixómaá, ko̱jo kui xi katsꞌénda ngayeje ni xi tjiín. Án xí konna ni xi kjimaa̱, ngatꞌa̱ Néná boá xi tsꞌénmongaa̱.

^10-11 Kui jaá achichí katsakjónní, kó bi̱ katsoó Jonaa̱: —Míkjo̱a̱a̱ nga bo̱a̱ kjiꞌi ni xi kiniꞌín ji. Kó mí xí si̱ꞌanjo̱jne̱ ji. ¡Ngatꞌa̱ ndáfoaa̱ tsꞌéndibániéjne̱, kó ta̱sá ma saꞌniú sáꞌniú kjimá ngase tjo̱o̱ ndáchíkoón!

¹² Sꞌe̱ bi̱ katsó Jonaa̱: —Chjábéjnúꞌun, kó tjajmijinjnúꞌun ngi̱jin ndáchíkoón tsi̱ꞌe̱ nga xi̱xió, ngatꞌa̱ ta̱ngatꞌanií an nga bi̱ kjiꞌi tjo̱ꞌniú xí kjindibániéjnú.

¹³ Kó kui jaá ꞌniú iskjindaá tsi̱ꞌe̱ nga ko̱e̱je̱jo tjotso jee̱ tꞌa chji̱ndi̱e̱e̱, ta̱nga kamájiín. Kó ngaꞌniuú ndáfoaa̱ achichí yiꞌi kamá ngase, kó kui tjo̱ꞌniuú je mejeén ma tsꞌenkjié.

¹⁴ Ngije achichí nda̱ kamaá, kui já xí tjimáyà tjotso jee̱, ꞌniú tsíchji̱a̱a̱ nee̱ tsi̱ꞌe̱ nga bi̱ katsoó: «¡ꞌNiú ndyi̱chjiáꞌájne̱ ji ne! ¡Nga ko̱yàjínjne̱ ta̱ngatꞌanii̱ nga ngo nda̱ xi jmíjiín jeé kiniꞌánkꞌiénjne̱! Ta̱nga nga ji̱njín sꞌi̱niéjne̱ kjo̱a̱a̱ tsi ko̱yà, ngatꞌa̱ jí boá xi nejne̱, kó jí xí kamámejeén kiniꞌín ji ngayeje kui nii̱».

¹⁵ Kósꞌe̱ kui já xí tjimáyà tjotso jee̱, iskjíbé Jonaa̱, kó tsꞌajmijin ngi̱jin ndáchíkoón. Kó tji̱e̱nmá kixixió tjo̱ꞌniuú.

¹⁶ Kó kui jaá nga kamábe ni xi kamaá, kui Néná xí tsi̱ꞌe̱ xota̱ Israee̱l xi Nejne̱ katsoó nga, kó katsꞌénkꞌasꞌiee̱n kjo̱a̱tjó ko̱jo índajo̱ Néná nga kui xi to̱kó sa̱ꞌíndikón.

¹⁷ Kósꞌe̱ Néná katsangiya ngo tji̱o̱ xi ta̱nisién ꞌniú je xi katjéjén ndo̱jò Jonaa̱. Kó Jonaa̱ ki̱a̱ kisꞌijña ngi̱ya nga̱tsꞌo̱a̱ kui tji̱o̱o̱ ján ni̱xtjin ko̱jo ján ni̱xtji̱e̱n.