Jenesii̱s 8 - Xo̱jo̱n eén Néná

¹ Ti̱chaa̱n jachó ni̱xtjin nga Néná katsꞌénkjó ni xi índajo̱ Noee̱, ko̱jo ngayeje cho̱ xi ma ꞌbítji̱e̱e̱, ko̱jo cho̱ kꞌijñá xi nijan síndojo̱ ngi̱ya tjotso xi ta̱nisién ꞌniú jee̱, kuíni nga Néná katsꞌénkjaꞌa ngo tjo̱ꞌniú, kósꞌe̱ jaꞌajen ndáfoaa̱.

² Kó kixixió ndáfoaa̱ ndáchíkoón xi tjitjó ngindie tꞌanangii̱, ko̱jo ti̱ kixixió ndáfoa xi katjonni nkꞌa jàn.

³ Kó ndáfoa xi kisꞌikitsieni tꞌanangii̱ chíchi̱ chíchi̱ jaꞌajen, kó jaskan ngije jaꞌa úchán ichítié ni̱xtjin,

⁴ tjotso xi ta̱nisién ꞌniú jeé jachókꞌíjñá tꞌanangi ki̱a̱ na̱xi̱ Araraa̱t. Kuí má ni̱xtjin tjiꞌún joó sá xí ma yitonii̱ kui xi ꞌmí Etanii̱n.

⁵ Kó ndáfoaa̱ inda inda jaꞌajen, ngaskande nga jachó sá xi ma tiee̱ kui xi ꞌmí Tebee̱t, kó ni̱xtjin tjoón kui saá má nga kamáyà to̱ko̱ na̱xi̱i̱.

⁶ Ngije jaꞌa yichán ni̱xtjin, Noee̱ iskjíxꞌá nga̱ntjo̱a̱masienkjaá tjotso xi ta̱nisién ꞌniú jee̱,

⁷ kó katsangiya ngo ni̱sie kuerbo̱, xi kijítji̱e̱n kó bo̱a̱ fí bo̱a̱ ndibá katsꞌén, ngatꞌa̱ kasakojiín tꞌanangi kixí nínga ko̱siénsón sé.

⁸ Jaskan Noee̱ katsangiya ngo tójo, tsi̱ꞌe̱ nga sku̱i̱e̱ tsi je kjifoaꞌajen ndáfoaa̱.

⁹ Ta̱nga kui tójoo̱ kijíꞌoyá nginí ngi̱ya tjotso xi ta̱nisién ꞌniú jee̱, nga kasakojiín nínga sa̱ꞌínkjaꞌyá, ngatꞌa̱ ndáfoaa̱ to̱kó tjiꞌmaá tꞌanangii̱. Sꞌe̱ Noee̱ iskjíbé tójoo̱ kó katsꞌénkꞌasꞌien nginí ngi̱ya tjotso xi ta̱nisién ꞌniú jee̱.

¹⁰ Ngije jaꞌa ngi yito ni̱xtjin, Noee̱ ti̱ katsangiya nginí tójoo̱.

¹¹ Kó kui tójoo̱ ngije kamángixoón jachókoón Noee̱, kó ngo xka̱a̱ yáꞌolibo̱ tjítokó tsꞌoa, kó kjiꞌá boá nga je kamákjiín Noee̱ nga je tjíxí tꞌanangii̱.

¹² Ta̱nga ngi yito ni̱xtjin askoyá, kó ti̱ katsangiya nginí tójoo̱, kó kui tójoo̱ ngiti̱ jachókónꞌoyájiín Noee̱.

Bi̱ tsꞌén katsjájón nginí tꞌanangi Noee̱

¹³ Kuí má nó nga tsꞌasꞌien jun úchán ko̱jo ngo nó Noee̱, ni̱xtjin ngoo̱ sá xi tjoón kui xi ꞌmí Abii̱b nga kixíyà ndáfoaa̱ nga̱són tꞌanangii̱, kó nga kamábe kui nii̱ Noee̱ jaꞌáxín nkꞌaa̱ tjotso xi ta̱nisién ꞌniú jee̱, kó kamábe nga je tikón kixí nga̱són tꞌanangii̱.

¹⁴ Jaskan ngije jaꞌa jó sá, kixí kjin nga̱són tꞌanangii̱.

¹⁵ Kósꞌe̱ Néná tsíchji̱a̱jo Noee̱ nga bi̱ katsoó:

¹⁶ «Mejénna nga ku̱i̱tjaxi̱e̱jnú ngi̱yaa̱ tjotso jee̱, ji ko̱jo chjóo̱n, ko̱jo ndíi̱, ko̱jo ínchjín kja̱ndàa̱.

¹⁷ Ti̱ꞌinkjataxie ji ngayeje cho̱o̱ nga, ko̱jo cho̱ xi tjiín tsja̱nga̱, ko̱jo cho̱ xi ꞌbifé yojoo̱ kui xi síndojoo̱, tsi̱ꞌe̱ nga ka̱makjín ko̱jo ngasꞌikitsieni tꞌanangii̱».

¹⁸ Kó bo̱a̱ tsꞌén jataxie Noee̱, ko̱jo chjo̱ón, ko̱jo ndií, ko̱jo ínchjín kja̱ndàa̱.

¹⁹ Jataxie ngayeje cho̱o̱ nga, ko̱jo cho̱ xi tjiín tsja̱nga̱, ko̱jo cho̱ xi ꞌbifé yojoo̱ nga.

²⁰ Jaskan Noee̱ katsꞌénda ngo ṉchandikón nínga katsꞌéndikón Néná, kó iskjíbé jó cho̱ ko̱jo cho̱ xi tjiín tsja̱nga̱ xi tsꞌénjóꞌo Néná nga niꞌánkꞌasꞌiee̱n kjo̱a̱tjó, kó ítí kui cho̱o̱ nganda tsi̱ꞌe̱ Néná.

²¹ Kó Néná ngije jaꞌándá sije̱n sije̱e̱n kui nii̱, bi̱ katsó ngi̱jin ini̱ma̱a̱: «Ndatsi xota̱ nga̱sondiee̱ ndajín ni xi tsꞌénkjó ngi̱jin ini̱ma̱a̱ ndeskande koó nga kjindí, nginijánjín kotijée̱ nga sa̱ꞌinkjié an tꞌanangii̱ ta̱ngatꞌanii̱ xota̱ nga̱sondiee̱, xikó je katsꞌen an.

²² »Tji̱e̱nga kꞌuijñá tꞌanangii̱, ngatsjéni̱xtjin kꞌuié ni tjié ko̱jo cha̱n, ngatsjéni̱xtjin kꞌuié sibé ko̱jo nchꞌàn, ngatsjéni̱xtjin kꞌuié cho̱ndoboá ko̱jo cho̱nchꞌàn, kó ngatsjéni̱xtjin kꞌuié ni̱xtjin ko̱jo ni̱xtji̱e̱n».