Jenesii̱s 50 - Xo̱jo̱n eén Néná

¹ Kósꞌe̱ Kosiee̱ askjandá kó janíkjá yojoo̱ na̱ꞌmii̱, kó katsjaá ngo ndsó xtjien.

² Ngi̱chí sájín Kosiee̱ katsangiya chji̱ni̱e̱ndiki xi mosoo̱, kui xi tsꞌéndíkii̱ xotaa̱ tsi̱ꞌe̱ nga tsájín fotson yojoo̱, kó kiniꞌándikii̱ yojoo̱ na̱ꞌmii̱.

³ Kó yichán ni̱xtjin tsꞌandíyaá nga kiniꞌándikii̱ yojoo̱ Jakoo̱b, ngatꞌa̱ bo̱a̱ kjiꞌi ni̱xtjin ꞌbondíyaá nga niꞌándikii̱ yojoo̱ ngo xota̱ xi je kꞌien, kó xota̱ Ejiptoo̱ ichítié ko̱jo kan ni̱xtjin askjandátjé Jakoo̱b.

⁴ Ngije jaꞌa ni̱xtjin xa̱ꞌya̱a̱, Kosiee̱ bi̱ katsoó xota̱ xi síndo ndiꞌaa̱ nda̱ ree̱ nangi Ejipto̱: —Tsi ka̱ma ngo kjo̱a̱nda kuíꞌájnúꞌun, bo̱a̱ tꞌínchiíjnúu̱ nda̱ ree̱,

⁵ nga na̱ꞌmina ngije mejeén ma kꞌien, nga ngiboanéná tꞌín ji katsóna, nga ki̱a̱ konijín an kui nga̱tsjo̱ó xí je íjñanda kui, kui xi tikón nangi Kanaa̱n. Kó kuíni nga ꞌniú míꞌáa̱ nda̱ ree̱ nga tsja̱ndièna nga kjuínkánijín an na̱ꞌmina, kó ngije kamá, kji̱ndi̱bá ngiñá an kꞌi̱e̱e̱.

⁶ Kó nda̱ ree̱ bi̱ tsó én xí katsangiyaa̱: —Tꞌen ji, kó tjanijín ji na̱ꞌmíi̱, xikótsꞌèn tsíꞌaá kui.

^7-9 Kósꞌe̱ Kosiee̱ kijíkanijín na̱ꞌmii̱, kó kijíjo̱ ngayeje já ntsꞌi̱e̱ ko̱jo xota̱ ndiꞌaa̱, ko̱jo ngayeje mosoo̱ nda̱ ree̱, kui xota̱ xi nkꞌa xaá ki̱a̱ ngi̱ndie nínga botixómá nda̱ ree̱ ko̱jo ki̱a̱ na̱xi̱ńdaá. Ti̱ kijíjo̱ Kosiee̱ xota̱ xi ndyi̱a̱ karro̱ ko̱jo xi síndosoón ndi̱je̱ nga. Kó ki̱a̱ nangi Ngosee̱n ta̱ jákjíndií ko̱jo cho̱tsa̱nga̱a̱ ko̱jo cho̱yojoo̱ tsí xi kisꞌińdo.

¹⁰ Kó nga jachó ki̱a̱ kꞌijñá xi ꞌmí Ataa̱nd xi tikón tiñaa̱ ndejèꞌ Jorndaa̱n, Kosiee̱ ngi yito ni̱xtjin kisꞌijñaxa̱ꞌya̱ kjo̱a̱a̱ nga kꞌien na̱ꞌmii̱, kó ngayeje xota̱ xi jachó ki̱a̱a̱ achichí askjandá.

¹¹ Kó kjiꞌanga xota̱ Kanaa̱n kamábe nga xota̱ Ejiptoo̱ achichí askjandá, bi̱ katsó: «Ta̱nisién ꞌniúrá ndikón xota̱ xi kꞌiee̱n xota̱ Ejiptoo̱». Kuíni nga kꞌijñá Ataa̱nd «Kꞌijñaá ndándyíko̱n xota̱ Ejiptoo̱» ítꞌajaꞌén kuí ngi̱ndiee̱.

^12-13 Kó jaá Jakoo̱b kijíjo̱ yojoo̱ na̱ꞌmii̱ ki̱a̱ nangi Kanaa̱n, kó ki̱a̱ ínijín ti̱xa̱na̱xi̱ xi tikón kꞌijñá Makpelaa̱, kui xi tsꞌatsiee̱ Abraa̱n nda̱ itita̱ xi ꞌmí Efroo̱n, tsi̱ꞌe̱ nga ki̱a̱ kjónijín xkjín. Kui ti̱xa̱na̱xi̱i̱ ki̱a̱ tikóntꞌa kꞌijñá Mamree̱. Kó bo̱a̱ tsꞌén jatjosón ni xi tsíꞌá na̱ꞌmii̱ ngindiee̱ nga ko̱yà.

¹⁴ Ngije akjanijín Jakoo̱b, Kosiee̱ ko̱jo já ntsꞌi̱e̱ ko̱jo xota̱ xi nijan kijíkanijínjo̱ na̱ꞌmii̱, kijí nginí nangi Ejipto̱.

Bi̱ tsꞌén Kosiee̱ yíxioó já ntsꞌi̱e̱

¹⁵ Kó já ntsꞌi̱e̱ Kosiee̱ ngije jaꞌa nga kꞌien na̱ꞌmii̱, bi̱ tsꞌén katsꞌénkjó: «Mí xí si̱ꞌán tsi Kosiee̱ ta̱kó tjítsꞌénxchánjo̱ná kó tsi ka̱mamejeén sa̱ꞌíngojo kjo̱a̱a̱ ni xi kiniꞌánjo̱.»

^16-17 Kósꞌe̱ bi̱ tsó én xí katsangiyaa̱ Kosiee̱: «Ji Kosie̱, ngindiee̱ nga ko̱yà na̱ꞌminá, bi̱ tsó én xí íjñá, nga chjién xò nga si̱ꞌinjetakínjne̱ kjo̱a̱a̱ ni xi ndajínkjiꞌi xi kiniꞌánjo̱jne̱ ji. Kjénní nga ta̱nisién ndajínkjiꞌi ni xi kiniꞌánjo̱jne̱ ji, ta̱nga ꞌniú chjiáꞌájne̱ ji nga si̱ꞌinjetakínjne̱». Nga tsintꞌié kuí eén Kosiee̱ achichí askjandá.

¹⁸ Kósꞌe̱ já ntsꞌi̱e̱ Kosiee̱ kijíkoón, kó nga kamábe Kosiee̱ asiéntikoó ngaskande nga kisitꞌaa̱ kje̱n tꞌanangii̱ nga kamábendikón, kó bi̱ katsó: —Kꞌi̱e̱ tindyionjne̱, kó moso̱ tse̱ boá ji̱n.

^19-21 Ta̱nga Kosiee̱ yíxioó ntsꞌi̱e̱, kó ngayeje ini̱ma̱a̱ nga bi̱ katsoó: —Ngata̱ ndakonjínmájnú, ngatꞌa̱ jmí tsi ngajoo̱ Néná tikòn an. Jún ngo ni xi ndajínkjiꞌi kamámejénjnú kiniꞌánjo̱jnúꞌun, ta̱nga Néná ni xi nda katsꞌén kui nii̱, jún jè kamáyàjnú ni xi je kamaá: Néná achichí má xota̱ xi katsꞌénkjiesónjín. Kó kuíni nga ngotꞌe̱ ꞌne̱, ngata̱ ndakonjínmájnú, an skonjnúꞌun jún ko̱jo ndíjnú.

Bi̱ tsꞌén kꞌien Kosiee̱

²² Kó Kosiee̱ ki̱a̱ kisꞌijña nangi Ejipto̱ ko̱jo xota̱ tji̱e̱e̱ na̱ꞌmii̱. Kó jachó xi úchán ko̱jo tie noó,

²³ kó kamábe ngase ngaskande xi ma ján tji̱e̱e̱ ndíndee̱ Efraii̱n. Kó ti̱ kamábe ngase ndií Makii̱r kui xi ndií Manasee̱, kó ti̱ kui Kosiee̱ katsꞌénxchá kuí ndií nga.

^24-25 Jaskan ngije jaꞌa ni̱xtjin, Kosiee̱ bi̱ katsoó já ntsꞌi̱e̱: «Jè ta̱ chiboa tsí ni̱xtjin chajaa̱ nga ko̱yà an. Ta̱nga nga sꞌijinjnú nga Néná boá xi kji̱ndi̱bákasikójojnú, kó kuí boá xi ko̱e̱je̱jo nginíjnú nínga tikón kui tꞌanangi xi katsóyàtjón nga tsja̱á Abraa̱n, Isaa̱ ko̱jo Jakoo̱b. Kó jún chjiéngá ngiboanéná tꞌínjnú nga kjiꞌanga kjo̱chó ni̱xtjin kongínjo̱jnú ńdana kꞌi̱e̱e̱ ngije ko̱yà an».

²⁶ Kó úchán ko̱jo tie noó Kosiee̱ nga kꞌien, kó kiniꞌándikii̱ yojoo̱ tsi̱ꞌe̱ nga tsájín jatson, kósꞌe̱ akjaya koxa̱ ki̱a̱ nangi Ejipto̱.