Jenesii̱s 49 - Xo̱jo̱n eén Néná

Bi̱ tsꞌén katsꞌénchikonñé Jakoo̱b ndií

¹ Kó Jakoo̱b tsíchji̱a̱a̱ ngayeje ndií tsi̱ꞌe̱ nga ka̱matikó, ngatꞌa̱ kamámejeén ka̱tso̱yaa̱ ni xi sꞌe̱ ka̱ma nga kjo̱chó ni̱xtjin, kó bi̱ katsoó:

² «Jún xi ndína jún, ja̱bíchonjnúꞌun, ndibá ndaꞌyájnúꞌun ni xi xiyàjnúꞌun.

³ »Ji Rubee̱n, jí boá xi ndína xi xchá, jí boá xi ndí tjónna, jí boá xi akake nga kamá an na̱ꞌmi, jí boá xi tjón yandikoón, jí boá xi ꞌniú tjiín ngaꞌniú.

⁴ Ta̱nga ji ꞌniú ndajínkjiꞌi ni xi kiniꞌínje̱ní, ngatꞌa̱ katsjajnije̱ ji ngo chjo̱onna. Kuíni nga ngiti̱ jijín xi tjón ka̱ma ji, ngatꞌa̱ ji xikónií ndáchíkoón, nga májín foxioó.

⁵ »Simeoo̱n ko̱jo Lebii̱, jún xí xikónií cho̱ tamá xi ꞌbé ngindie kꞌijñá jàn, nga ngatsjéni̱xtjin kjánjo̱xchánná.

⁶ Mejénjínna ki̱a̱ kotíjña̱jojnúꞌun ko̱jo tsi ki̱a̱ kjótsoꞌbájo̱jnúꞌun, ngatꞌa̱ kjiꞌanga katsꞌénxchán, katsꞌénkꞌién xota̱ ko̱jo katsꞌénxi̱ nga katsꞌénkꞌién cho̱yojo toro̱.

⁷ ¡Ngatꞌíko̱jonii̱ kjo̱a̱tamaá! ¡Ngatꞌíko̱jonii̱ kjo̱a̱xcha̱án! Án boá xi sa̱ꞌin an nga xota̱ tji̱e̱e̱ stso̱joboa ngayeje na̱xi̱ńdá Israee̱l.

⁸ »Kó jí Jundáa̱, jí boá xi si̱ꞌìi̱n kondra̱ tse̱, kó ntsꞌie ji sku̱i̱e̱ ndikoón, kó ngaskande ku̱i̱ndyiańña má ngindyikin ji.

⁹ Jí boá xi xikoó ngo xandi̱je̱ tamá, xi ngije katsꞌeén nga iskjinie cho̱ xi kasakoo̱ kósꞌe̱ fojña tꞌanangii̱, kó ꞌyá xí ka̱maa̱ sa̱ꞌínxtií ji.

¹⁰ Ngatsjéni̱xtjin kꞌuijñá ngi̱ya ndse̱ ji yánísié xi ko̱ti̱xomeni ji, ngaskande tsí nga kjo̱e̱ꞌe kui re xi ja̱koxi̱i̱, kui xi ko̱tíxoma ngayeje nga̱sondiee̱.

^11-12 Kui xi ꞌniú iní ngase ndyi̱ko̱n xikoó binoo̱, kó ṉꞌni̱u̱ tiboa ngase xikoó ntsjeén. Kui xi ku̱i̱ꞌítaꞌniú ndí bórró xíꞌiín ńꞌniú xí nda ngasee̱ ńꞌniuú tostsi̱je̱è, kó nde kjo̱a̱ꞌáxínjín ńjñoo̱ nga tsie jín sa̱ꞌíndándíní xikó maá tsi ndejèꞌ xi bino̱.

¹³ »Kó jí Sabuloo̱n tꞌa ndáchíkoón ku̱i̱ndyin ji, kó ki̱a̱ tꞌa ndáchíkoón ka̱ma ngi̱ndie nínga kjo̱chó ngayeje tjotso yiꞌii̱, kó ngaskande nangi Sindoo̱n ka̱ma tsindioó ngi̱ndie xi tse̱.

¹⁴ »Kó jí Isakaa̱r, achichí ꞌniú jí xikoó ngo bórró, xi jó ngi̱ndie nínga kjién cho̱ tsꞌénkjaꞌyá.

¹⁵ Kjiꞌanga xchi̱e̱ ji nga tꞌanangìi̱ nda ko̱jo tsjachon ka̱ma tsi̱ꞌe̱ nga si̱ꞌankjaꞌyá, chjiéngá tsja kꞌuieé nga si̱ꞌinjo̱ꞌo ji, nga si̱ꞌin ji xá xí tsꞌén ngo moso̱.

¹⁶ »Kó jí Ndaa̱n, jí boá xi kixi̱ ko̱ti̱xomée̱ na̱xi̱ńdáa̱, ngatꞌa̱ ki̱a̱ ndokjo̱e̱ ji ngo xtín xota̱ xi chji̱a̱ni Israee̱l.

¹⁷ Jí boá xi xikoó ngo ye̱ xi tsꞌénkoya tꞌa ndi̱ya̱à, kui xi nga kjiniee̱ se ndi̱je̱e̱, ka̱márií kꞌo̱ka nga̱xto̱n nda̱ xi tjísoón ndi̱je̱e̱.

¹⁸ »¡Ji Ne tsa̱ꞌa̱n, to̱kó tsꞌénkoya an kjo̱a̱bosíko̱jóo̱ ki!

¹⁹ »Kó jí Ngaa̱nd, kjín ka̱ma xota̱chejé xí skjánjoo̱ ji, ta̱nga nde sku̱i̱e̱jín kui jaá ñání nga chjábéníi̱ nga si̱ꞌìi̱n.

²⁰ »Kó jí Asee̱r, achichí ni nda chinie xi kꞌuieé ji, kó jí boá xi si̱ꞌinde ji nichinie xi ꞌniú nda ngasee̱, kui xi kjinie ngo nda̱ re.

²¹ »Kó jí Neftalii̱, tsjaári kjo̱a̱ndeé, jí xí xikónií ngo ndi̱kꞌijñá chjo̱on xí tsoꞌbá ndé, ngo cho̱ na̱an xi achichí tsjákón ndií.

²² »Kó jí Kosiee̱, jí xí xikónií ngo ndi̱je̱ xi kjimaxchá nínga tjín ndáfoa xi tjitjó má. ¡Chíkji̱ ji, kó ꞌmikijintꞌe ji ngo xó!

²³ Xota̱ xi ndajín chꞌoo̱ ji, tsꞌénbosieén yáyojó,

²⁴ ta̱nga ji ngatsjéni̱xtjin nga ꞌniú tikón yáchjonyáa̱, kó jmíni̱xtjin mindiyá tjiàa̱. ¡Ndokꞌóchji̱ì kui Ne xi tsi̱ꞌe̱ ngayeje ngaꞌniuú, kui xi tikóntjoón ko̱jo tsꞌénkoón Israee̱l!

²⁵ ¡Ndokꞌóchji̱ì kui Néná xí tsi̱ꞌe̱ na̱ꞌmíi̱, kui xi tsꞌénbosikójoo ji! ¡Ndokꞌóchji̱ì kui Néná xi ngayeje nii̱ xi maa̱, ko̱jo kui xi ngatsjéni̱xtjin tjítsꞌénchíkonñeé ji! ¡Kó tsꞌéntsjaá kjo̱a̱niꞌánchikonñeé ndiꞌakꞌajmi xi tikón nkꞌa jàn! ¡Kó tsꞌéntsjaá kjo̱a̱niꞌánchikonñeé nínga ꞌniú na̱nga̱a̱ ndáchíkoón! ¡Kó tsꞌéntsjaá kjo̱a̱niꞌánchikonñeé na̱an xi tjiín ndí ko̱jo xi ndyi̱tsꞌènkí ndií!

²⁶ Na̱ꞌmíi̱ tsie ngase kjo̱a̱niꞌánchikonñé xi tsꞌéntsjaá ji, ta̱bo̱a̱jiín kjo̱a̱niꞌánchikonñé xi tsjá ngo na̱xi̱ xi tikón ngatsjéni̱xtjin. Tse̱ boá ngayeje kui kjo̱a̱niꞌánchikonñeé, jí boá xi tsoboaá kui nii̱ ji Kosie̱, ngatꞌa̱ ngi̱jii̱n já ntsꞌie ji, jí boá xi ꞌniú yandikón ngasee̱.

²⁷ »Kó jí Benja̱, jí boá xi xikoó ngo cho̱lobo̱ xi tamá, kui xi nga ta̱jño̱ó kjinie cho̱ xi katsꞌénkꞌién, kó nga kamángixoón tsꞌénkábí ni xi ꞌbongii̱.»

²⁸ Bo̱a̱ tsꞌén katsꞌénchikonñé Jakoo̱b nga tiejó ndií. Nga ngo nga ngo kui jaá xi chji̱a̱ni nga tiejó xota̱ tji̱e̱e̱ Israee̱l, katsjaá kui kjo̱a̱niꞌánchikonñé xi tsoboaá.

Bi̱ tsꞌén kꞌien Jakoo̱b

^29-31 Ngije katsꞌénchikonñé ndií Jakoo̱b, bi̱ tsꞌén atíxomaa̱: «Jè ta̱ chiboa tsí chajana nga ko̱yà an, kó mejénna nga ngo kjo̱a̱nda kuíꞌájnúꞌun, ngije ko̱yà án ki̱a̱ tjanijínjnúꞌun nínga kjiyojonijín xota̱ xi xchána. Ki̱a̱ ti̱xa̱na̱xi̱ xi tikón kꞌijñá xi Abraa̱n tsꞌatsiee̱ Efroo̱n nda̱ xi xota̱ itita̱ chji̱a̱ni, tsi̱ꞌe̱ nga ki̱a̱ ko̱ónijín na̱ Sara̱ chjo̱ón. Ki̱a̱ nínga kjiyojonijín Abraa̱n ko̱jo Isaa̱ ko̱jo na̱ Rebekaa̱, kó ti̱ ki̱a̱ yinijín an na̱ Liyaa̱ nga. Kui ti̱xa̱na̱xi̱i̱ ki̱a̱ tikón nangi Kanaa̱n tꞌa kꞌijñá Makpelaa̱, kje̱n kꞌijñá Mamree̱.

³² Kui ngi̱ndiee̱ ko̱jo kui ti̱xa̱na̱xi̱i̱, xota̱ Ee̱t boá xi kitsꞌítsiéjne̱».

³³ Kó ngije kamaá Jakoo̱b nga atíxomaa̱ ndií, ítikó yojoo̱ nga̱són ṉchaa̱n, sꞌe̱ kꞌien ngijee̱.