Jenesii̱s 48 - Xo̱jo̱n eén Néná

Bi̱ tsꞌén katsꞌénchikonñé Jakoo̱b Manasee̱ ko̱jo Efraii̱n

¹ Ngije jaꞌa ni̱xtjin kiꞌmíyaà Kosiee̱ nga je ꞌniú oón na̱ꞌmii̱, kó iskjíbé Manasee̱ ko̱jo Efraii̱n nga jó ndií, kó kijíkoón na̱ꞌmii̱.

² Nga kiꞌmíyaà Jakoo̱b nga Kosiee̱ jachókatsijee̱n, Jakoo̱b katsꞌén ngo kjo̱a̱ꞌniú nga kisꞌijñandoni ṉchan xi kjiꞌijñasón,

³ kó bi̱ katsoó Kosiee̱: —Kui Néná xi tjiín ngayeje ngaꞌniuú, ki̱a̱ jatjokjàna ki̱a̱ na̱xi̱ńdá Betee̱l ki̱a̱ nangi Kanaa̱n, kó ki̱a̱ katsꞌénchikonñéna,

⁴ kó bi̱ katsóna: “Án boá xi sa̱ꞌin an nga kjín ka̱ma ndíi̱ ko̱jo xota̱ tji̱e̱ tse̱, kó xota̱ tji̱e̱e̱ boá xi kjín na̱xi̱ńdá ka̱ma. Kó kuí boá xi tsjàa̱ kui tꞌanangii̱, kó kui tsi̱ꞌe̱ ka̱ma ngatsjéni̱xtjin”.

⁵ »Kó ngotꞌe̱ ꞌne̱ Efraii̱n ko̱jo Manasee̱, nga jó kui ndí xí kisꞌiee̱ nangi Ejipto̱ ngindiee̱ nga kꞌi̱e̱ kjoéꞌe̱ an kui na̱xi̱ńdaá, xikónií tsi ndína ka̱ma, xikótsꞌèn ndína má Rubee̱n ko̱jo Simeoo̱n.

⁶ Ndí xí jaskan kꞌuieé jí, kuí bo̱a̱ xi̱ꞌba̱ xi tse̱ ka̱ma, kó ta̱ngatꞌanii̱ nga ntsꞌie ji ma Efraii̱n ko̱jo Manasee̱ ngotꞌe̱ ꞌne̱, kuíni nga sa̱kónii̱ kui ni xi kꞌuijñaá ji.

⁷ »Ngatꞌa̱ achichí ndasen kamána nga kjiꞌanga je kjindibá ngiñá an nangi Pandaa̱n-Araa̱n nga ngi̱ya ndi̱ya̱à kꞌientaꞌinna na̱áa̱n na̱ Rakee̱l ki̱a̱ nangi Kanaa̱n, kó ki̱a̱ yinijín an mejeén ngije makjachó Efrata̱, kui ngi̱ndie xi Belee̱n ꞌmí ngotꞌe̱.

⁸ Kó nga kamábe Jakoo̱b ndií Kosiee̱, bi̱ katsó nga asíyaá: —Kó kui ndií, ꞌyání bo̱a̱.

^9-10 Kó Kosiee̱ bi̱ katsoó na̱ꞌmii̱: —Ndína boá, kui ndí xí katsjána Néná kꞌi̱e̱ nangi Ejipto̱. Kó nga Jakoo̱b ngiti̱ ndajín tsijen kamaá, ngatꞌa̱ jè ꞌniú xchá kamá, bi̱ katsoó Kosiee̱: —Ndibéje̱boeꞌéní, sa̱ꞌinchikonñémára an. Kó Kosiee̱ kijíjo̱ boaꞌaá ndií na̱ꞌmii̱, kó Jakoo̱b janíkjá ko̱jo atíndsoꞌá.

¹¹ Kósꞌe̱ Jakoo̱b, bi̱ katsoó Kosiee̱: —Jè ngiti̱ katsꞌenkjójín an tsi skuie ngase an kje̱n ji, kó ngotꞌe̱ ꞌne̱ Néná ngaskande ndíi̱ je akóna.

¹² Kósꞌe̱ Kosiee̱ jaꞌáxín boaꞌá ndií nínga tikón tikoó na̱ꞌmii̱, sꞌe̱ asiéntikoó Kosiee̱ kje̱n na̱ꞌmii̱ ngaskande nga kisitꞌaa̱ kje̱n tꞌanangii̱.

¹³ Kó Kosiee̱ iskjíbé nga jó ndií, Efraii̱n íjñá nga kixi̱i̱, kó Manasee̱ íjñá nga skoón Jakoo̱b, kó ki̱a̱ índo nínga tikón na̱ꞌmii̱, kó bo̱a̱ tsꞌén Efraii̱n nga skoón Jakoo̱b kisꞌijña kó Manasee̱ nga kixi̱i̱ Jakoo̱b kisꞌijña.

¹⁴ Ta̱nga Jakoo̱b yejéntie tsja xi kixi̱i̱ kó to̱ko̱ Efraii̱n íjñasoón kui ndí xi kjindií Kosiee̱, kó tsja xi skoón to̱ko̱ Manasee̱ íjñasoón, ta̱ xá bo̱a̱ katsꞌénní ndatsi be nga Manasee̱ boá xi ndí xí tjoón Kosiee̱.

¹⁵ Kósꞌe̱ katsꞌénchikonñé Kosiee̱ nga bi̱ katsó: «Kui Néná xi Nee̱ na̱ꞌmindyiboana Abraa̱n, ko̱jo Nee̱ na̱ꞌmina Isaa̱, kui Néná xi tsꞌénbokóna ndi̱yà ngayeje ni̱xtjin nga tikòn an nga̱sondie.

¹⁶ Kuí boá xi katsangiya ndítsjiee̱, tsi̱ꞌe̱ nga xín katsꞌénkjaꞌána ngayeje ni xi ndajiín. Kui tsꞌénmíꞌáa̱ nga sa̱ꞌínchikonñé kui já xo̱ngo̱ò, kó nga ta̱ngatꞌanii̱ kui nga ngatjaꞌátsjien jaꞌénna, ko̱jo jaꞌeén na̱ꞌmindyiboana Abraa̱n, ko̱jo na̱ꞌmina Isaa̱. ¡Kjín ngatama ndí xí nga sꞌiee̱!»

¹⁷ Tsjajín kamaá Kosiee̱ nga kamábe nga na̱ꞌmii̱ tsja xi kixi̱i̱ íjñasoón to̱ko̱ Efraii̱n, kó jaꞌáxín tsja na̱ꞌmii̱ tsi̱ꞌe̱ nga ko̱síkjo, kó nga tsja xi kixi̱i̱ ku̱i̱ꞌíjñasoón to̱ko̱ Manasee̱,

¹⁸ kó bi̱ katsoó Na̱ꞌmii̱: —¡Bo̱a̱jín tsꞌén na̱ꞌmi! ¡Manasee̱ boá xi ndí tjónna! ¡Kó kuí boá xi chjiéngá kꞌuíjñisée̱n, ndse̱ xi kixi̱i̱!

¹⁹ Ta̱nga Jakoo̱b kamámejénjiín bo̱a̱ katsꞌén, kó bi̱ katsó kui: —Jè be an xi̱ꞌin, jè be an. Manasee̱ ti̱ bo̱a̱ ti̱ tsꞌén ngo na̱xi̱ńdá xi je ka̱ma ndií nga, ta̱nga ndíi̱ xi kjindí ngasee̱ ꞌniú ngase xcha̱ndikón kuí, ta̱bo̱a̱jiín xi ingoo̱, kó xota̱ tji̱e̱e̱ kui, ngo xtín na̱xi̱ńdá ka̱ma.

²⁰ Kó bo̱a̱ tsꞌén kui ni̱xtjii̱n Jakoo̱b, Efraii̱n katsjaá ngi̱ndie xi tsoboaá Manasee̱, kósꞌe̱ bi̱ katsó: —Kjiꞌanga xota̱ tji̱e̱na tjín xí sa̱ꞌínchikonñé, bi̱ nga tsoó: “¡Néná ngatsꞌénchíkonñeé xikótsꞌèn katsꞌénchikonñé Efraii̱n ko̱jo Manasee̱!”

²¹ Jaskan Jakoo̱b, bi̱ katsoó Kosiee̱: —Jè ta̱ chiboa tsí ni̱xtjin chajana nga ko̱yà án, ta̱nga Néná kꞌuijñájo̱jnú, kó kuí boá xi kjo̱jo nginií nangii̱ na̱ꞌmindyiboáa.

²² Kó nga jí boá xi tindyintjée̱n já ntsꞌie ji, ji tsꞌéntsjaa na̱xi̱ Sikee̱n, kui tꞌanangi xi jaꞌaxíi̱n xota̱ Amoo̱r kjiꞌanga askjanjo̱ an kui.