Jenesii̱s 47 - Xo̱jo̱n eén Néná

Bi̱ tsꞌén jachó Jakoo̱b ngindyi̱ko̱n nda̱ ree̱ nangi Ejipto̱

^1-2 Kosiee̱ jaꞌájin ún já ntsꞌi̱e̱ xi jachójo̱ ngindyi̱ko̱n nda̱ ree̱, kó bi̱ katsoó nda̱ ree̱: —Na̱ꞌmina ko̱jo já ntsꞌié án ndeskande nangi Kanaa̱n kjindibáni, kó jè síndo nangi Ngosee̱n. Kjindibájo̱ ngayeje cho̱tsa̱nga̱a̱ ko̱jo cho̱yojoo̱ ko̱jo ngayeje ni xi tjiín.

³ Kó nda̱ ree̱, bi̱ katsoó nga asíyaá já ntsꞌi̱e̱ Kosiee̱: —Kó jún, mí xá xí niꞌánjnú. Kó kui jaá bi̱ katsó: —Cho̱tsa̱nga̱ chònjne̱ nda̱ re, kuí xaá xí katsꞌén xota̱ xi xchájne̱ nga.

⁴ Kꞌi̱e̱ jéꞌe̱kindyion ngotjónjne̱ kui ngi̱ndiee̱, ngatꞌa̱ jè ngiti̱ jmí ni chiniejín nangi Kanaa̱n, kó ti̱ jè ngiti̱ jmí ndi̱xcho̱jiín cho̱ xi tjínjne̱ nga. ꞌNiú chjiáꞌájne̱ ji nga ko̱e̱ꞌéndièjne̱ nga ki̱a̱ ku̱i̱ndyionjne̱ nangi Ngosee̱n.

⁵ Kósꞌe̱ nda̱ ree̱, bi̱ katsoó Kosiee̱: —Kó nga na̱ꞌmíi̱ ko̱jo ntsꞌie ji, kꞌi̱e̱ jeꞌekꞌíndojoo̱,

⁶ ka̱machje̱ꞌéjin ji tꞌanangi xi mejeén tsi̱ꞌe̱ nga kꞌi̱e̱ kꞌuíndo kui na̱xi̱ńdaá. Te̱ꞌée̱ tꞌanangi xi nda ngasee̱, ki̱a̱ ngatꞌíndo nangi Ngosee̱n. Kó tsi tjín kuí jaá xi ꞌniú maá xá xí tsꞌén, te̱ꞌéxée̱ kó kuí nga koo̱n cho̱ xi tsa̱ꞌa̱n.

⁷ Kósꞌe̱ Kosiee̱ ti̱ kijíjo̱ na̱ꞌmii̱ ngindyi̱ko̱n nda̱ ree̱ nga, kó Jakoo̱b achichí ndikóntsꞌèn katsꞌéntinde nda̱ ree̱,

⁸ kó nda̱ ree̱, asíyaá kótjín noó Jakoo̱b.

⁹ Kó Jakoo̱b, bi̱ katsoó nda̱ ree̱: —Úchán ko̱jo kantié nó tjínna nda̱ re nga ja̱kꞌi̱e̱ ja̱ngaján tsꞌénfí an. Ndatsi tsie kjo̱a̱ni̱ma̱ tsꞌénfoaꞌatio an, ta̱nga kji̱e̱ fochójín an xikó kjiꞌi nó kisꞌińdo xota̱ xi xchána.

¹⁰ Nga jetꞌa, Jakoo̱b ndikóntsꞌèn katsꞌénkixotꞌa nda̱ ree̱, sꞌe̱ kijí ngijee̱.

¹¹ Kó Kosiee̱ katsꞌénkjatjosón ni xi katsó nda̱ ree̱, kó ki̱a̱ katsꞌénkꞌíndo na̱ꞌmii̱ ko̱jo já ntsꞌi̱e̱ tꞌanangi xi nda ngasee̱ nangi Ejipto̱. Ki̱a̱ kisꞌińdo kui xotaa̱ nangi Ngosee̱n, kui xi jaskan nangi Ramsee̱ kiꞌmí ngijee̱.

¹² Kó Kosiee̱ katsjaá ngayeje kui xotaa̱ nichinie, ta̱ xikó kjiꞌi kamá ndí xí kisꞌiee̱ nga ngo nga ngo.

Bi̱ tsꞌén kamá kjindiá ki̱a̱ nangi Ejiptoo̱

¹³ Ta̱nga kui kjindiaá jè tjítsꞌénkjié ngayeje xota̱ xi chji̱a̱ni nangi Kanaa̱n ko̱jo nangi Ejipto̱. Ngiti̱ ingojín ngi̱ndie nínga kisꞌie ngase nichinie.

¹⁴ Ta̱nga Kosiee̱ to̱kó tsꞌénbotiñára to ndso̱ko̱a̱n ṉño̱pan, kó tjítsꞌéntsiéra ngase to̱o̱n nda̱ ree̱. Ngayeje to̱n xi kisꞌie kui na̱xi̱ńdaá, Kosiee̱ jaꞌátikó nga atíñá to ndso̱ko̱a̱n ṉño̱pan xi tsꞌatsie kui xotaa̱.

¹⁵ Ngije je ngayeje to̱n xi kisꞌiee̱ xota̱ Ejiptoo̱, ngayejee̱ kui xotaa̱ kijíkoón Kosiee̱, kó bi̱ katsoó: —Jè ngiti̱ jmí to̱njínjne̱. Te̱ꞌéjne̱ ji ni xi xi̱ni̱e̱ji̱n, tsájmi̱ tsá ko̱yà yejejne̱.

¹⁶ Kó Kosiee̱, bi̱ katsoó kui xotaa̱: —Tsi ngiti̱ jmíjínjnú to̱n, ndibájo̱jnú cho̱ xi tjínjnú, kó to ndso̱ko̱a̱n ṉño̱pan kositꞌajo̱jnúꞌun.

¹⁷ Kó xota̱ Ejiptoo̱ jachójoo̱ Kosiee̱ ndi̱je̱e̱, cho̱tsa̱nga̱a̱, tindsoo̱, cho̱yojoo̱ ko̱jo bórroó, kó nichinie asítꞌani ngayeje kui noó.

¹⁸ Ta̱nga nó xí ingoo̱, ti̱ ingo ndi̱yà jachókón nginií Kosiee̱ kui xotaa̱, kó bi̱ katsoó: —Ji nda̱ xtitjón, ka̱májín kꞌuiꞌmájne̱ ji nga jè ngiti̱ jmíjínjne̱ to̱n, kó nga ngayeje cho̱ xi tjínjne̱ jè tse̱ ji. Jè ngiti̱ jmíjínjne̱ ni xi ka̱ma ko̱e̱ꞌéjne̱ ji xi ko̱si̱tꞌajne̱ nichinie, ta̱ ngototo tꞌanangijne̱ ko̱jo yojojne̱.

¹⁹ ¡Tsꞌi̱tsiejne̱ tꞌanangijne̱, kó mosoo̱ nda̱ ree̱ ngatamajne̱, ta̱nga te̱ꞌéjne̱ nichinie! Te̱ꞌéjne̱ xojmá xí kꞌuítji̱e̱jne̱ tꞌanangii̱. Kó bo̱a̱ tsí tsꞌén nga ko̱yàjínjne̱. ¡Mejénjínjne̱ nga ji xchi̱e̱jne̱ nga ko̱yà ji̱n, kó nga tꞌanangijne̱ kꞌuíndo kjiꞌitiya xikoó nangi kixií!

²⁰ Nga ja̱koxi̱ achichí ꞌniú kamá kui kjindiaá nga ngayeje xota̱ Ejiptoo̱ atíñaá Kosiee̱ ngayeje tꞌanangii̱, kó Kosiee̱ tsꞌatsie kui tꞌanangii̱ tsi̱ꞌe̱ nda̱ ree̱ nangi Ejipto̱. Kó bo̱a̱ tsꞌén nga ngayeje tꞌanangi xi kisꞌie nangi Ejipto̱ nga tsi̱ꞌe̱ nda̱ ree̱ kamá,

²¹ kó ngayeje xota̱ xi chji̱a̱ni nangi Ejipto̱ xi mosoo̱ nda̱ ree̱ kamá nga. Kosiee̱ boá xi katsꞌén ngayeje kui nii̱.

²² Ta̱nga Kosiee̱ tsꞌatsiejín tꞌanangi xi tsi̱ꞌe̱ chináꞌmii̱, ngatꞌa̱ já chináꞌmii̱ atíñájín, kjo̱a̱a̱ nga nda̱ ree̱ ngatsjéni̱xtjin katsangiyaa̱ ngo tjín to ndso̱ko̱a̱n ṉño̱pan, kó ngaskande tsꞌangii̱ nichinie kui jaá.

²³ Kósꞌe̱ Kosiee̱, bi̱ katsoó xota̱ Ejiptoo̱: —Kꞌi̱e̱ tikónjnú xojmá tsi̱ꞌe̱ nga kꞌuítji̱e̱jnú tꞌanangijnú. Ta̱nga ngatjaꞌátsjienjnú nga ngotꞌe̱ jè tsꞌatsiejnúꞌun jún ko̱jo tꞌanangijnú, kó ngotꞌe̱ ꞌne̱ jè nda̱ ree̱ ndokjo̱a̱nijnú.

²⁴ Kó kuíni nga ngije ka̱maxchá ni xi kꞌuítji̱e̱jnú, ngo nga ún tjiín kui nii̱ xi nda̱ ree̱ si̱ꞌankꞌasꞌienjnúu̱, kó xi ngi nijón nga ún tjiín, tsa̱jún ka̱ma. Ki̱a̱ chjábénijnú xojmá xí ka̱ma kꞌuítji̱e̱jnú, kó ko̱jo kui xi̱ꞌba̱ xi ka̱ma xi̱ni̱e̱jnú jún ko̱jo ndíjnú.

²⁵ Kó xota̱ Ejiptoo̱, bi̱ katsoó: —Ji nda̱ xtitjón: ¡jí boá xi kaꞌnaxiéꞌéjne̱! ¡Kó kuíni nga ngotꞌe̱ ꞌne̱ te̱ꞌéndièjne̱ nga mosoo̱ nda̱ ree̱ ka̱majne̱!

²⁶ Kó kuíni nga Kosiee̱ ngo kjo̱a̱kiti katsꞌénda nangi Ejipto̱, nga ngo nga ún bo̱a̱ kjiꞌi ni xi maxchaá xi si̱ꞌankꞌasꞌiee̱n nda̱ ree̱. Kó ndeskande ni̱xtjin nga kamánda kui kjo̱a̱kitii̱, kó ngaskande ngotꞌe̱ nga tjíniꞌánkjatjosón. Ta̱ kuí tsi tꞌanangi xi tsi̱ꞌe̱ chináꞌmii̱ xi tsi̱ꞌe̱ nda̱ ree̱jín kamá.

²⁷ Kó bo̱a̱ tsꞌén nga xota̱ Israee̱l, ki̱a̱ kisꞌińdo Ejipto̱ ki̱a̱ nangi Ngosee̱n. Kó ki̱a̱ tsꞌatsie tꞌanangi, kó achichí kamá ndií.

Kosiee̱ bi̱ tsꞌén índajo̱ ngo ni na̱ꞌmii̱

²⁸ Kó Jakoo̱b tjiꞌúnjó nó kamaá nga kisꞌijña nangi Ejipto̱, kó úchán ko̱jo yichán yito nó kamaá nga kisꞌijña nga̱sondie.

²⁹ Ngije makjachó ni̱xtjin nga ko̱yà, tsíchji̱a̱a̱ Kosiee̱ kui xi ndií, kó bi̱ katsoó: —Ngo kjo̱a̱nda kuíꞌaá xi̱ꞌin, kó ngiboanéná tꞌín ji nga si̱ꞌinkjatjosén ji. Tsi ja̱koxi̱ nga tjoó an, ngiboanéná tꞌín ji nga ngije ko̱yà an, nga kꞌi̱e̱jín kjónijínní nangi Ejipto̱.

³⁰ Ngije ko̱yà an, ꞌna̱xié ji ńdana kꞌi̱e̱e̱, kó ki̱a̱ tjanijínní nínga kjiyojonijín xota̱ xi xchána. Kó Kosiee̱ ngiboanéná nga sa̱ꞌinkjatjosón an kui nii̱ katsoó na̱ꞌmii̱,

³¹ ta̱nga Jakoo̱b, bi̱ katsó ngasee̱: —¡Ngiboanéná tꞌín ji! Kó Kosiee̱, ngiboanéná katsó. Kósꞌe̱ Jakoo̱b kisꞌijñaxtien nga̱són ṉchaa̱n, kó tsíchji̱a̱a̱ Néná.