Jenesii̱s 46 - Xo̱jo̱n eén Néná

Bi̱ tsꞌén jachó Jakoo̱b nangi Ejipto̱

¹ Kó bo̱a̱ tsꞌén na̱ꞌmii̱ Kosiee̱ jatjoni nangi Kanaa̱n nga kijíjo̱ ngayeje ni xi tjiín, kó nga jaꞌa nangi Beersebaa̱ katsꞌénkꞌasꞌiee̱n kjo̱a̱tjó kui Ne xi katsꞌéndikón Isa̱ na̱ꞌmii̱.

² Kó kuí ni̱xtji̱e̱e̱n Néná tsíchji̱a̱jo Jakoo̱b, nga bi̱ katsoó: —¡Jakoo̱b, Jakoo̱b! —¡Mí ni, kꞌi̱e̱ tikòn an kꞌi̱e̱e̱! —Katsó Jakoo̱b.

^3-4 Kósꞌe̱ Néná bi̱ katsoó: «Án boá xi Nee̱ na̱ꞌmíi̱, ngata̱ ndakinjín má ji nga kꞌuin jí nangi Ejipto̱, ngatꞌa̱ án xí kjuínjòo̱. Án boá xi sa̱ꞌin an nga xota̱ tji̱e̱ tse̱ ngo na̱xi̱ńdá xí ꞌniú je ka̱ma. Kó ti̱ án boá xi sa̱ꞌin an nga kꞌi̱e̱ kjoéꞌe̱ nginí ji nangi Kanaa̱n, kó nga ko̱yè jí, ki̱a̱ kꞌuijñátꞌaa̱ Kosiee̱».

^5-7 Kósꞌe̱ jaá Jakoo̱b asíko̱jo nga kisꞌińdoyà kui karro̱ xi katsangiya nda̱ ree̱. Kó bo̱a̱ tsꞌén nga Jakoo̱b jatjoni nangi Beersebaa̱ sꞌe̱ kijí xtji̱e̱e̱n nangi Ejipto̱, kó kijíjo̱ ngayeje xota̱ ndiꞌaa̱, ngayeje cho̱o̱ ko̱jo ngayeje ni xi kisꞌiee̱ ki̱a̱ nangi Kanaa̱n.

Xota̱ tji̱e̱e̱ Jakoo̱b ko̱jo na̱ Liyaa̱

^8-14 Kuí bí xi̱ꞌbi̱ jaꞌeén xota̱ ndiꞌaa̱ Jakoo̱b xi nijan kijíjo̱ Ejipto̱, tjón má kꞌi̱e̱ koaꞌañáa̱ kui xi kamá xota̱ tji̱e̱e̱ Jakoo̱b ko̱jo na̱ Liyaa̱. Rubee̱n, kuí boá xi ndí tjoón Jakoo̱b, kó kuí bí xi̱ꞌbi̱ xi ndií Rubee̱n: Anoo̱k, Faluu̱, Esroo̱n, ko̱jo Karmii̱. Kuí bí xi̱ꞌbi̱ xi ndií Simeoo̱n: Jemuee̱l, Jamii̱n, Oaa̱d, Jakii̱n, Soaa̱r, ko̱jo Sauu̱l kui xi ndií ngo xota̱chjo̱on xi chji̱a̱ni nangi Kanaa̱n. Kuí bí xi̱ꞌbi̱ xi ndií Lebii̱: Ngersoo̱n, Koaa̱t, ko̱jo Merarii̱. Kuí bí xi̱ꞌbi̱ xi ndií Jundáa̱: Ee̱r, Onaa̱n, Selaa̱, Faree̱, ko̱jo Seraa̱. Ta̱nga Ee̱r ko̱jo Onaa̱n ki̱a̱ jesón nangi Kanaa̱n. Kuí bí xi̱ꞌbi̱ xi ndií Faree̱: Esroo̱n, ko̱jo Amuu̱l. Kuí bí xi̱ꞌbi̱ xi ndií Isakaa̱r: Tolaa̱, Pubaa̱, Joo̱b, ko̱jo Simroo̱n. Kuí bí xi̱ꞌbi̱ xi ndií Sabuloo̱n: Seree̱nd, Eloo̱n, ko̱jo Jalee̱l.

¹⁵ Kantié ján kamá ngayeje xota̱ tji̱e̱ xi kisꞌiee̱ Jakoo̱b ko̱jo na̱ Liyaa̱, kui xi katsen ki̱a̱ nangi Pandaa̱n-Araa̱n, ko̱jo ndíndee̱, ko̱jo ndí chjo̱ón Jakoo̱b kui xi ꞌmí na̱ Ndinaa̱.

Xota̱ tji̱e̱e̱ Jakoo̱b ko̱jo na̱ Silpaa̱

^16-18 Kuí bí xi̱ꞌbi̱ xi xota̱ tji̱e̱e̱ Jakoo̱b ko̱jo na̱ Silpaa̱, kui na̱ xi chji̱ni̱e̱ꞌboo̱ Labaa̱nmára kamá, ta̱nga na̱ Liyaa̱ katsjaá kjiꞌanga ixán: Kuí bí xi̱ꞌbi̱ xi ndií Ngaa̱nd: Sefoo̱n, Angii̱, Sunii̱, Esboo̱n, Erii̱, Arodii̱, ko̱jo Arelii̱. Kuí bí xi̱ꞌbi̱ xi ndií Asee̱r: Imnaa̱, Isbaa̱, Isbii̱, Beriaá, Ko̱jo na̱ Seraa̱ ndichja kui jaá. Kuí bí xi̱ꞌbi̱ xi ndií Beriaá: Ebee̱r, ko̱jo Malkiee̱l. Tjiꞌún ngo kamá ngayeje xota̱ tji̱e̱e̱ Jakoo̱b ko̱jo na̱ Silpaa̱.

Xota̱ tji̱e̱e̱ Jakoo̱b ko̱jo na̱ Rakee̱l

^19-22 Kuí bí xi̱ꞌbi̱ xi xota̱ tji̱e̱e̱ Jakoo̱b ko̱jo na̱ Rakee̱l. Kuí bí xi̱ꞌbi̱ xi ndií Kosiee̱: Manasee̱, ko̱jo Efraii̱n. Kuí bí xi̱ꞌbi̱ ndí xí kisꞌiee̱ Kosiee̱ ko̱jo na̱ Asenaa̱t, tsa̱kji̱ín Potiferaa̱ chináꞌmii̱ nangi Oo̱n kui xi katsen nangi Ejipto̱. Kuí bí xi̱ꞌbi̱ xi ndií Benjaa̱: Belaa̱, Bekee̱r, Asbee̱l, Ngeraa̱, Naamaa̱n, Eii̱, Roo̱, Mupii̱n, Upii̱n, ko̱jo Aa̱rd. Tienijón kamá ngayeje xota̱ tji̱e̱e̱ Jakoo̱b ko̱jo na̱ Rakee̱l.

Xota̱ tji̱e̱e̱ Jakoo̱b ko̱jo na̱ Bilaa̱

^23-24 Kuí bí xi̱ꞌbi̱ xi xota̱ tji̱e̱e̱ Jakoo̱b ko̱jo na̱ Bilaa̱, kui na̱ xi chji̱ni̱e̱ꞌboo̱ Labaa̱nmára kamá, ta̱nga na̱ Rakee̱l katsjaá kjiꞌanga ixán: Ndaa̱n ko̱jo ndií kui xi kiꞌmí Usii̱n. Kuí bí xi̱ꞌbi̱ xi ndií Neftalii̱: Jasee̱l, Ngunii̱, Jesee̱r, ko̱jo Silee̱n.

²⁵ Yito kamá ngayeje xota̱ tji̱e̱e̱ Jakoo̱b ko̱jo na̱ Bilaa̱.

²⁶ Ichítié ko̱jo tjiꞌún ngo kamá ngayeje xota̱ tji̱e̱e̱ Jakoo̱b xi jachójo̱ nangi Ejipto̱, ta̱nga kjiyaxki̱jín kꞌi̱e̱e̱ ínchjín kja̱ndaa̱.

²⁷ Ichítié ko̱jo kan kamá ngayeje xota̱ xi jachó nangi Ejipto̱ xi chji̱a̱ni xota̱ tji̱e̱e̱ Jakoo̱b, ta̱nga kjiyaxki̱ kꞌi̱e̱e̱ nga jó ndí xí kisꞌiee̱ Kosiee̱ ki̱a̱ nangi Ejipto̱.

Bi̱ tsꞌén askajin xkjín Jakoo̱b ko̱jo Kosiee̱

²⁸ Ngindiee̱ nga kjo̱tjoni nangi Kanaa̱n, Jakoo̱b katsangiyatjón Jundáa̱, tsi̱ꞌe̱ nga ko̱e̱je̱koo̱n Kosiee̱, kó ko̱síyaá kótsꞌèn kjo̱chó nangi Ngosee̱n. Kó nga jachó kui ngindiee̱,

²⁹ Kosiee̱ ikꞌíjñandaa̱ ngo karro̱, kó kijíkjaꞌáyíndi̱yà na̱ꞌmii̱, nga kamábe Kosiee̱ na̱ꞌmii̱, tsanga má jachókoón, janíkjá kó achichí tsie askjandá.

³⁰ Kó Jakoo̱b, bi̱ katsoó Kosiee̱: —Ndyikón án má xi je kamábee̱ ji xi̱ꞌin, jè be an ꞌne̱ nga tindyin ji nga̱sondie. ¡Ngotꞌe̱ ꞌne̱ nga jè ka̱ma xió ko̱yà án!

³¹ Kósꞌe̱ Kosiee̱, bi̱ katsoó ngayeje já ntsꞌi̱e̱ ko̱jo xota̱ xi tjimájo̱ xkjín kuí jaá: —Kjuínkónmáráa̱ nda̱ ree̱, kó xiyàa̱ nga ngayeje xota̱ xingi̱ án xi kisꞌińdo nangi Kanaa̱n jè jeꞌe kꞌi̱e̱e̱, kó nga kꞌi̱e̱ kꞌuíndojo̱na.

³² Kó bo̱a̱ xiáa̱n nga jún cho̱tsa̱nga̱ ꞌbítji̱e̱jnú, kó nga kjindibájo̱ yejejnú cho̱tsa̱nga̱jnú ko̱jo cho̱yojojnú ko̱jo ngayeje ni xi tjínjnú.

³³ Kó kjiꞌanga nda̱ ree̱ ku̱i̱chji̱a̱jnú, kó nga ko̱síyájnú mí xá xí niꞌánjnú,

³⁴ bo̱a̱ tꞌínjnúu̱ nga ndeskande koó ngasꞌe̱ nga cho̱ niꞌánxchájnú xikó katsꞌén xota̱ xi xchájnú, tsi̱ꞌe̱ nga ki̱a̱ ku̱i̱ndyionjnú nangi Ngosee̱n. Kjo̱a̱a̱ nga xota̱ Ejiptoo̱ tsjajiín nga tiña ꞌbíndo nínga síndo xota̱ xi koo̱n cho̱tsa̱nga̱a̱.