Jenesii̱s 45 - Xo̱jo̱n eén Néná

Bi̱ tsꞌén akoó Kosiee̱ yojoo̱ já ntsꞌi̱e̱

^1-3 Kosiee̱ ngiti̱ kichikjo̱a̱jiín kó tsꞌaxié kui ngi̱ndiee̱ ngayeje já xí bosikójo xi síndotꞌaa̱. Kó kjiꞌanga akoó yojoo̱ já ntsꞌi̱e̱, nde ngojín já xí bosikójo Kosiee̱ xi kisꞌińdo ngase ki̱a̱a̱. Kó Kosiee̱ bi̱ katsoó já ntsꞌi̱e̱: —¡Kosiee̱ boá an já! A to̱kó tikón na̱ꞌmina. Kósꞌe̱ achichí ꞌniú askjandá Kosiee̱, kó ngaskande ngayeje xota̱ xi chji̱a̱ni Ejipto̱ ko̱jo xota̱ xi síndo ndiꞌaa̱ nda̱ ree̱ xi tsintꞌié én nga bo̱a̱ kamá. Ta̱nga achichí katsakjónní já ntsꞌi̱e̱, nga ndeskande nde kamájín tsíchji̱a̱ ngindyi̱ko̱n Kosiee̱.

⁴ Kósꞌe̱ Kosiee̱ bi̱ katsoó kui jaá: —Ja̱bíjnúꞌun. Kó kui jaá kijíkóntiñaa̱, kósꞌe̱ Kosiee̱ bi̱ katsoó: —Kosiee̱ boá an, ntsꞌiejnú, kui xi akatíñájnúu̱ xota̱ Ejiptoo̱.

^5-7 Ta̱nga nga ta̱ nda̱jín májnú, kó ngata̱ ndasénjín májnú nga akatíñájnúꞌun. Jè jó nónií nga tjín kjindiá, kó ngi ún nó chaja nga jmí ni ka̱maxchájín tꞌanangii̱, ta̱nga Néná boá xi katsangiyatjónna tsi̱ꞌe̱ nga an kꞌoxiéꞌájnúꞌun jún ko̱jo ndíjnú, kó nga ꞌniú ko̱e̱je̱ndikónná kui ni xi ka̱maa̱.

⁸ »Kó ja̱ jè kamáyàjnú ngotꞌe̱ nga jmí tsi jún xi kanangiyajnúꞌun kꞌi̱e̱e̱, Néná boá xi kꞌi̱e̱ jeꞌejo̱na, kó kuí boá xi katsꞌénna nga an xi ka̱ma an ngo nda̱ xi ko̱tíxoma ngayeje nangi Ejiptoo̱, ko̱jo nga an xi ka̱ma an nda̱ xi ko̱síngáyindi̱yà xá xí tsꞌén nda̱ ree̱ nangi Ejipto̱.

⁹ Kó kuíni nga tsá tangín nginíjnú nínga tikón na̱ꞌminá, kó bo̱a̱ tꞌínjnúu̱ nga án boá xi bi̱ tꞌíxián an, nga Néná boá xi katsꞌénna xtitjoón ngayeje nangi Ejipto̱, kó mejénna nga tsá kji̱ndi̱bákónna kui.

¹⁰ Bo̱a̱ tꞌínjnúu̱ nga ki̱a̱ kꞌuijñá nangi Ngosee̱n, kó ki̱a̱ nijan kꞌuíndo ndií, ndíndee̱, ko̱jo ngayeje cho̱o̱ ko̱jo ni xi tjiín. Kó ki̱a̱ kꞌuijñátꞌa tiñana.

¹¹ Ngi ún nó chaja nga ka̱ma ngase kui kjindiaá, ta̱nga án boá xi tsjàa̱ nichinie. Ngatꞌa̱ tsí jmí, kui ko̱jo ngayeje xota̱ xi nijan síndojo̱, xcha̱ja ngayeje ni xi tjiín, kó ni̱ma̱ tsꞌén kꞌuíndo.

¹² »Jún ko̱jo nda̱ ntsꞌié án Benjaa̱ xí chistiko̱ nga án má bo̱a̱ xi tꞌíxián an kui nii̱.

¹³ Tꞌíyájnúu̱ na̱ꞌmina ngayeje ni xi je kamáyàjnú kꞌi̱e̱e̱ ko̱jo xá xí tjínna kui na̱xi̱ńdaá, kó tsá ndibájo̱jnú kꞌi̱e̱e̱.

¹⁴ Kó ngije bo̱a̱ katsó Kosiee̱, janíkjá Benjaa̱ kó nga joó ítsꞌi̱yanii̱ nga askjandá.

¹⁵ Kósꞌe̱ Kosiee̱ katsjaá ngo ndsó tꞌanijon ngayeje já ntsꞌi̱e̱ sꞌe̱ askjandájo̱, kó kjiꞌá boá nga ngayeje já ntsꞌi̱e̱ kamá tsíchji̱a̱jo Kosiee̱.

¹⁶ Nda̱ ree̱ achichí tsjá kamaá kui ko̱jo já xí ndyi̱tsꞌènxájo̱ nga tsintꞌié nga já ntsꞌi̱e̱ Kosiee̱ ki̱a̱ síndo nangi Ejipto̱,

¹⁷ kó ti̱ kuii̱ nda̱ ree̱, katsangiyaa̱ én Kosiee̱ nga bi̱ katsoó: «Ti̱ꞌankaꞌájnú chꞌià bórroó, kó ngatjí nginí nangi Kanaa̱n,

¹⁸ kó ngatjandibájo̱ na̱ꞌmíi̱ ko̱jo xota̱ ndiꞌaa̱. Án boá xi tsjàa̱ tꞌanangi xi nda ngasee̱ nangi Ejipto̱, kó kꞌi̱e̱ skji̱ni̱e̱ ngayeje ni nda xi maxchá kuí na̱xi̱ńdaá.

¹⁹ Te̱ꞌékjo̱e̱ ji nga kꞌi̱e̱ ko̱e̱je̱joni karro̱ xi kji̱ndi̱báyà jákjíndií ko̱jo ínchjiín ko̱jo na̱ꞌmijnú.

²⁰ Kó ngata̱ nda̱jín maá kjo̱a̱a̱ ni xi ku̱i̱ꞌíndo jàn jàn, ngatꞌa̱ kꞌi̱e̱ nangi Ejipto̱ kꞌuieé ngayeje ni xi nda».

²¹ Kó já ntsꞌi̱e̱ Kosiee̱ katsꞌénjo̱ꞌo ni xi katsoó nda̱ ree̱, kó Kosiee̱ katsjaá karro̱ ko̱jo nichinie tsi̱ꞌe̱ ndi̱yà nínga ko̱e̱je̱.

²² Nga ngo nga ngo kui jaá katsjaá ńjño tja̱tsi̱e̱ xi ko̱a̱ja̱, ta̱nga Benjaa̱ ján úchán to̱ntiboa katsjaá ko̱jo ún ꞌniú ńjño xi chajá xi nda.

²³ Kó na̱ꞌmii̱ katsangiyaa̱ tie bórró xíꞌín xi ndyi̱yaꞌanijín ni xi nda ngase xi tjín nangi Ejipto̱, ko̱jo tie bórró chjo̱on xi ndyi̱yaꞌanijín pan, ko̱jo to ndso̱ko̱a̱n ṉño̱pan ko̱jo nichinie xi skji̱ni̱e̱ na̱ꞌmii̱ ngi̱ya ndi̱ya̱à.

²⁴ Sꞌe̱ jaskan Kosiee̱ katsꞌénkixotꞌa já ntsꞌi̱e̱, kó ngindiee̱ nga ko̱e̱je̱, bo̱a̱ katsoó nga skjánjo̱jín xkjín ngi̱ya ndi̱ya̱à.

^25-26 Kó já ntsꞌi̱e̱ Kosiee̱ jatjoni nangi Ejipto̱, kó nga jachó nangi Kanaa̱n katsóyaà Jakoo̱b nga to̱kó tikón Kosiee̱, kó nga kuí boá xi xtitjoón ngayeje nangi Ejipto̱, Jakoo̱b ngaskande mejeén kꞌienya má nga bo̱a̱ kiꞌmií, ngatꞌa̱ nde sꞌijinjín kjimaa̱ kui ni xi tjíꞌmií.

²⁷ Kó inda inda jaꞌáꞌyaá kjiꞌanga kui jaá katsóyaà Jakoo̱b ngayeje ni xi katsó Kosiee̱, kó nga kamábe karro̱ xi katsangiya Kosiee̱ tsi̱ꞌe̱ nga kongínjo̱ Ejipto̱, achichí tsjá kamaá.

²⁸ Kósꞌe̱ bi̱ katsó Jakoo̱b: «¡Jè ndakjiꞌi ꞌne̱! ¡Ndína Kosiee̱ to̱kó tikón! ¡Ta̱sá kjuínkátsijée̱n, tsi̱ꞌe̱ nga skuie ngase an ngindiee̱ nga ko̱yà án!»