Jenesii̱s 43 - Xo̱jo̱n eén Néná

Bi̱ tsꞌén jachó Benjaa̱ nangi Ejipto̱

¹ Kó kamáꞌniú ngase kjindiaá ngayeje nangi Kanaa̱n,

² kó ngije je to ndso̱ko̱a̱n ṉño̱pan xi tsꞌatsie kui jaá nangi Ejipto̱, na̱ꞌmii̱ bi̱ katsoó: —Tangín nginíjnú nangi Ejipto̱, kó tsꞌi̱tsie ngasejnú nichinie.

^3-5 Ta̱nga Jundáa̱ bi̱ katsó: —Nda̱ xtitjoón nangi Ejipto̱ jè bo̱a̱ katsójne̱ nga tsi kongínjo̱jínxójne̱ ntsꞌie ji̱n xi kjindií, ka̱májín xò konginkíndyiájne̱ kje̱n. Kó kuíni nga ka̱ma kongíntsꞌítsiéjne̱ ngase to ndso̱ko̱a̱n ṉño̱pan, tsi ko̱e̱ꞌéndiè ji nga kongínjo̱jne̱ ntsꞌie ji̱n xi kjindií.

⁶ Kósꞌe̱ bi̱ katsó na̱ꞌmii̱ kui jaá: —Kó, ánní nga kiꞌmíyàjnúu̱ nga tikónjnú ingo ntsꞌiejnú. Míkjo̱a̱a̱ nga bo̱a̱ kjiꞌi kjo̱a̱xti xi ndyi̱boeꞌékonjnúꞌun.

⁷ Kó kui jaá bi̱ katsó: —Kjo̱a̱a̱ nga kui nda̱a̱, achichí ni xi asíyájne̱ kjo̱a̱a̱ ji̱n ko̱jo kjo̱a̱a̱ xota̱ ndiꞌaná, nga bo̱a̱ katsó tsi to̱kó tindyin ji, ko̱jo tsi tikónjne̱ ingo ntsꞌie. Kó ji̱n ta̱ kiꞌmíyàtsíjne̱ ngayeje ni xi asíyájne̱, kó jmíni̱xtjin kiniꞌánkjójne̱ tsi ku̱i̱ꞌa nga kongínjo̱jne̱ ntsꞌiejne̱ xi ingoo̱.

⁸ Kó Jundáa̱ bi̱ katsoó na̱ꞌmii̱: —Tsi mejénná nga ku̱i̱ndyionra nga̱sondie, chjiéngá kongínjo̱jne̱ Benjaa̱. Te̱ꞌéndiè ji nga ko̱e̱je̱jojne̱ kó kongín tji̱ꞌni̱u̱jne̱.

⁹ Án boá xi skóo̱n kui, kó tsi kjoéꞌe̱jojín ngiñaá kꞌi̱e̱e̱, an nga sꞌiniéna ngatsjéni̱xtjin ni xi ka̱maa̱ kui.

¹⁰ Jè tsie tsꞌandíyáná kꞌi̱e̱e̱, tsi bo̱a̱jín kamá, ¡jera̱ jó ndi̱yà kamáná nga tsangín ko̱jo nga kjindibá tsobo̱a̱!

^11-13 Kósꞌe̱ na̱ꞌmii̱ kui jaá ja̱chon nga katsꞌénjo̱ꞌo kui nii̱, nga bi̱ katsó: —Ja̱ tsi jmíjín ngase ingo ni xi ka̱ma si̱ꞌán, ja̱ tangínjo̱jnú ntsꞌiejnú tsobo̱a̱ nínga tikón kui nda̱a̱, ta̱nga ingo ni ti̱ꞌánjnú. Tꞌíkitsiejnú koxta̱jnú ni nda xi tjínná kꞌi̱e̱e̱, kó chꞌi̱a̱jnúu̱ kui nda̱a̱, xikoó balsamo̱, chií ntsjién, ndásíje̱n, nisije̱n, to pistacho̱ ko̱jo to almendra̱. Kó ti̱ chꞌi̱a̱jnúu̱ jó bo̱a̱ kjiꞌi to̱n xikó kjiꞌi kichꞌiájnú tsie ꞌne̱, ngatꞌa̱ chjiéngá si̱ꞌankꞌasꞌienjnú kui to̱n xi kichꞌiáꞌoyá nginíjnú, ngatꞌa̱ tsi ta̱ kamátsobéjii̱n nga ki̱a̱ íyá koxta̱jnú.

¹⁴ Tangínjnú tsobo̱a̱ kó kui Néná xí tjiín ngaꞌniuú ngatsjaá kjo̱a̱ni̱ma̱takón kui nda̱a̱, kó ngatꞌijñándé Benjaa̱ ntsꞌiejnú xi ingoo̱ tsi̱ꞌe̱ nga nijan kji̱ndi̱bájo̱ nginíjnú. Kó an, ja̱ tsi ngiti̱ jmí ndí kꞌuiéjínna, ja̱ nga bo̱a̱ ngatama.

¹⁵ Kósꞌe̱ kui jaá iskjíbé ni xi ko̱a̱ꞌa̱ ko̱jo jó bo̱a̱ kjiꞌi to̱n xikó kjiꞌi xi tjón tsaꞌa, ko̱jo Benjaa̱, kó xi tsá xi boaꞌa kijí xtji̱e̱e̱n Ejipto̱. Kó jachó nínga tikón Kosiee̱,

¹⁶ kó Kosiee̱ nga kamábe kui jaá ko̱jo Benjaa̱, bi̱ katsoó nda̱ xi tikóntjoón ndiꞌaa̱: «Tꞌenje̱ ji kui jaá ndiꞌana, kó ngo cho̱yojo ti̱ꞌinkꞌin ji, sꞌe̱ ti̱ꞌinde ji nichinie, ngatꞌa̱ kui jaá án skjíni̱e̱jo an ṉño̱ sꞌe̱ nga ndisꞌueé».

¹⁷ Kó kui nda̱a̱ bo̱a̱ katsꞌén xikó kiꞌmií, kó kijíjo̱ kui jaá ndiꞌaa̱ Kosiee̱,

¹⁸ ta̱nga kui jaá achichí katsakjónní, kó bi̱ tsꞌén katsꞌénkjó: «Ta̱ngatꞌanii̱ kui to̱n xi katseꞌéꞌoyáná tsie ꞌne̱ nga tjón jéꞌe̱chjaꞌá ni, kuíni nga kꞌi̱e̱ kjindibájo̱ná kui nda̱a̱ kꞌi̱e̱e̱. Mejénrií nga chja̱ya̱ kꞌuijñáná, kó ku̱i̱xkánjo̱ná, sꞌe̱ moso̱ tsi̱ꞌe̱ sa̱ꞌínná ñá kósꞌe̱ kui skjíbé bórróná».

¹⁹ Kó nga jachó ndiꞌaa̱ Kosiee̱, kui jaá tsíchji̱a̱a̱ kui nda̱ xi tikóntjoón ndiꞌaa̱, kó bi̱ katsoó:

²⁰ —Ti̱ꞌinjetakín ji xingá, ja̱koxi̱ boá nga to ndso̱ko̱a̱n ṉño̱pan boá xí jéꞌe̱tsꞌítsiéjne̱ tsie ꞌne̱ kꞌi̱e̱e̱.

^21-22 Kó nga jáchójne̱ ngo ngi̱ndie nínga si̱ꞌankjaꞌyájne̱, kachjáxꞌájne̱ koxta̱jne̱, kó nga ngo nga ngo ji̱n ki̱a̱ kasako nginíjne̱ to̱njne̱, ¡tikón ndo̱jò ndójo̱! Ta̱nga yàjín ji̱n ꞌyá xí ki̱a̱ íyá, kó ngotꞌe̱ ꞌne̱ kichꞌiá nginí ji̱n kui to̱o̱n, kó ti̱ kichꞌiá ngasejne̱ to̱n tsi̱ꞌe̱ nga si̱ꞌantsié ngasejne̱ to ndso̱ko̱a̱n ṉño̱pan.

²³ Kó bi̱ katsó kui nda̱ xi tikóntjoón ndiꞌaa̱ Kosiee̱: —Ngasꞌiejnú kjo̱a̱xió, ngata̱ ndakonjínmájnú, án boá xi kiniꞌánkꞌasꞌienjnúꞌun to̱n xi ikꞌíchjíjnú. Ta̱nga kuírá Néná xí tsi̱ꞌe̱ na̱ꞌmijnú xi ta̱ katsjájnú kui nii̱. Kósꞌe̱ kui nda̱a̱ tsꞌaxié Simeoo̱n nínga tikónyà ndo̱bo̱a̱yà.

²⁴ Kó ngayejee̱ nga kiniꞌánkjaꞌa ngi̱ya ndiꞌaa̱ Kosiee̱, kó katseꞌeé ndáfoa tsi̱ꞌe̱ nga ko̱niéjón se ko̱jo katsjaá nichinie bórroó nga.

²⁵ Kó nga je be kui jaá nga ki̱a̱ kjo̱chó Kosiee̱ nga nijan skji̱ni̱e̱jo ṉño̱ nga ka̱mandisꞌué, índonda ni xi ndyi̱yaꞌa xi sa̱ꞌinkꞌasꞌiee̱n.

^26-28 Nga jachó Kosiee̱ ndiꞌaa̱, kui jaá kixindyiańña ngaskande nga kisitꞌaa̱ xtjien tꞌanangii̱ nga kamábendikón kuí nda̱a̱, kó katsꞌénkꞌasꞌiee̱n ni xi ndyi̱yaꞌaa̱, jaskan ngije katsꞌéntinde Kosiee̱, Kosiee̱ asíyaá tsi ta̱kó tikón na̱ꞌmii̱. Kó kui jaá bi̱ katsó: —Jo̱o̱n to̱kó tikón na̱ꞌmijne̱, nda tikón, kó jè tikónnda nga kui xi moso̱ tse̱ ka̱ma nga.

²⁹ Kó nga askotsijen Kosiee̱ nga ngo foaꞌatjiyajoo̱n, kamábe nga ki̱a̱ tikón Benjaa̱ kui nda̱ xi ntsꞌi̱e̱ ma nga ngo na̱ꞌmi ngo na̱an, kó bi̱ katsó: —A kuí bí ntsꞌiejnú xi kjindí ngase xi kiꞌmíjnúꞌun tsie ꞌne̱. ¡Néná ngatsꞌénchíkonñeé xi̱ꞌin!

³⁰ Kósꞌe̱ Kosiee̱ achichí ni xi kamaá nga kamábe ntsꞌi̱e̱ nga ngaskande tsanga má kijí nínga tikón ngi̱yaꞌmaa̱, kósꞌe̱ ítsꞌi̱yani nga askjandá ndasen.

³¹ Sꞌe̱ jaskan aniéjón kje̱n, katsꞌénchíkjo̱a̱, kó bi̱ katsó: —¡Tꞌíyájnú nichiniee̱ ꞌne̱!

³² Kósꞌe̱ xín tji̱e̱n ikꞌíjñá ti̱bo̱a̱ nichiniee̱ Kosiee̱, ngatꞌa̱ já Ejiptoo̱ májín kjiniejo̱ ṉño̱ xota̱ ebreoo̱, ngatꞌa̱ ni chꞌokjiꞌi boá nga bo̱a̱ sa̱ꞌín.

³³ Kó já ntsꞌi̱e̱ Kosiee̱ kje̱n nínga tsꞌénkjinie ṉño̱ Kosiee̱ kisꞌińdo, kó ta̱ xikótsꞌèn xchá nga ngo nga ngo, bo̱a̱ tsꞌén kisꞌińdo, tjón xi ꞌniú xchaá, sꞌe̱ jetꞌanii̱ xi ꞌniú kjindií, kó ta̱ askoꞌá xkjín nga ngo nga ngo.

³⁴ Kó ti̱ kuii̱ nichinie xi iskjinie Kosiee̱ xi katseꞌeé ngayeje kui jaá nga, ta̱nga Benjaa̱ ún bo̱a̱ kjiꞌi ngase ikꞌíyaá kui. Kó iskjinie kó katsꞌe, kó achichí tsjá kisꞌiee̱ ngayeje kui jaá.