Jenesii̱s 42 - Xo̱jo̱n eén Néná

Bi̱ tsꞌén jachókꞌatsie nichinie já ntsꞌi̱e̱ Kosiee̱ nangi Ejipto̱

^1-2 Kó nga tsintꞌié Jakoo̱b nga nangi Ejipto̱ tjín to ndso̱ko̱a̱n ṉño̱pan, bi̱ katsoó ndií: «Mí xí ndyi̱niꞌánjnú kꞌi̱e̱e̱, ánní nga ta̱ ndyi̱chaꞌá xingi̱ konjnú. Jè kiꞌmíyàna nga tjín xò to ndso̱ko̱a̱n ṉño̱pan nangi Ejipto̱, tangínjnú ki̱a̱, kó tsꞌi̱tsiéjnú to ndso̱ko̱a̱n ṉño̱pan tsi mejénjnú nga ku̱i̱ndyionra ngase nga̱sondie, tsájmi̱ ko̱yà ñá».

^3-5 Kó kui kjindiaá kamáꞌniú ngase nangi Kanaa̱n, kó achichí kamá xota̱ xi kijíkꞌatsie to ndso̱ko̱a̱n ṉño̱pan nangi Ejipto̱, kó ti̱ kijí nga tie já ntsꞌi̱e̱ Kosiee̱ nga. Ta̱nga Jakoo̱b katsꞌénkjíjín Benjaa̱, kui xi ntsꞌi̱e̱ ma Kosiee̱ nga ngo na̱ꞌmi ngo na̱an, ngatꞌa̱ kamámejénjiín nga tjín ni xi ndajín ka̱maa̱.

⁶ Nga jachó já ntsꞌi̱e̱ Kosiee̱ ki̱a̱ nangi Ejipto̱, kixindyiańña ngaskande nga kisitꞌaa̱ kje̱n tꞌanangii̱ nga kamábendikón Kosiee̱, ngatꞌa̱ kuí boá xi xtitjoón kui na̱xi̱ńdaá, kó kuí boá xi atíñaá to ndso̱ko̱a̱n ṉño̱pan ngayeje na̱xi̱ńdá xí tjín nga̱sondiee̱.

^7-8 Kó Kosiee̱ tji̱e̱nmá kamábe já ntsꞌi̱e̱, ta̱nga kui jaá kamábejín nga Kosiee̱ xi̱ꞌba̱. Kó jmí ni katsójiín tsi̱ꞌe̱ nga sꞌi̱jinraa̱ nga nda̱ Ejipto̱ boá Kosiee̱, sꞌe̱ ꞌniú tsíchji̱a̱jo já ntsꞌi̱e̱ nga bi̱ katsoó: —Kó jún, ñá kjindibánijnú. Kó kui jaá bi̱ katsó: —Nangi Kanaa̱n kjindibánijne̱, kó to ndso̱ko̱a̱n ṉño̱pan kjindibá tsꞌítsiéjne̱.

⁹ Kósꞌe̱ Kosiee̱ jaꞌátsjiee̱n ni xi katsoó chi̱ni kjo̱a̱a̱ kui jaá, kó bi̱ katsoó já ntsꞌi̱e̱: —Bee̱ko̱n an nga jún ta̱ ndyi̱foéꞌe̱tsitsienjenꞌmá tsíjnú kótsꞌèn nga ka̱ma ku̱i̱xkánjo̱jnú kui na̱xi̱ńdaá.

¹⁰ Ta̱nga kui jaá bi̱ katsoó: —¡Jmí ndi̱a̱! Moso̱ tse̱ boá ji̱n, kó ta̱ to ndso̱ko̱a̱n ṉño̱pan tsí boá xi ndyi̱foéꞌe̱tsꞌítsiéjne̱.

¹¹ Ngayeje ji̱n xota̱ nda boá ji̱n, ta̱ ngo na̱ꞌmi má ji̱n. ¡Jmí tsi xota̱ xi ndyi̱foeꞌekatsienjenꞌmá!

¹² Ta̱nga Kosiee̱ bi̱ katsó ngasee̱: —¡Sꞌijinjín mána kui nii̱! Jún ta̱ ndyi̱foéꞌe̱tsitsienjenꞌmá tsíjnú kótsꞌèn nga ka̱ma ku̱i̱xkánjo̱jnú xotaa̱ kui na̱xi̱ńdaá.

¹³ Kó bi̱ katsó ngase kui jaá: —Ji̱n, tiejó ntsꞌie majne̱, kó ta̱ ngo na̱ꞌmi májne̱ ngayejejne̱, kó kui nda̱ xi ꞌniú kjindií, na̱ꞌmijne̱ tikónjo̱ ngotꞌe̱ ki̱a̱ nangi Kanaa̱n, kó ngo ntsꞌiejne̱ xi je kꞌien.

¹⁴ Kó Kosiee̱ bi̱ katsó nginií: —¡Kjénní ni xi kixian an! ¡Nga jún xota̱ xi ndyi̱foeꞌekatsienjenꞌmá boájnú,

¹⁵ kó skotꞌa mára an akjénráa̱ ni xi ndyi̱ꞌmìjnú! Kjo̱a̱mindyioo̱n nda ree̱ kꞌuijñángí an nga jún kjo̱tjojínjnú kui ngi̱ndiee̱ ngaskande nga kjoéꞌe̱jo̱jnú kꞌi̱e̱e̱ ntsꞌiejnú xi kjindií.

¹⁶ Akjénráa̱ ni xi ndyi̱ꞌmìjnú: Nangíyájnú ngo ntsꞌiejnú, kó ngatjíkjaꞌá kui ntsꞌiejnú xi kjindií, kó xi ngasee̱ ndo̱bo̱a̱yà kꞌuíndora an kꞌi̱e̱e̱. Tsi kji̱ndi̱bájo̱jín ntsꞌiejnú, ¡kjo̱a̱mindyioo̱n nda ree̱ kꞌuijñángí an nga ja̱ kjénní nga xota̱ xi ndyi̱foeꞌekatsienjenꞌmá boá jún!

¹⁷ Kósꞌe̱ Kosiee̱ ján ni̱xtjin índo kui jaá ndo̱bo̱a̱yà.

^18-20 Kó xi ma ján ni̱xtjin Kosiee̱ bi̱ katsoó: «Tsakjón án Néná. Tsi ja̱koxi̱ nga xota̱ xi ndajnú ko̱jo tsi mejénjnú ku̱i̱ndyionra ngasejnú nga̱sondie, bi̱ ti̱ꞌánjnú: te̱ꞌéndièjnú nga ngo ntsꞌiejnú xi ngatꞌíjñára ndo̱bo̱a̱yà, kó xi ngasee̱ ngatjíjoo̱ to ndso̱ko̱a̱n ṉño̱pan xota̱ xi síndo ndiꞌajnú, ngatꞌa̱ achichíra̱ je bojoó, ta̱nga ndibájo̱jnú ntsꞌiejnú xi kjindií, kó bo̱a̱ tsí tsꞌén skuié an tsi ja̱koxi̱ ni xi ndyi̱ꞌmìjnú.» Kó já ntsꞌi̱e̱ Kosiee̱ jo̱ꞌo katsó ni xi kiꞌmií,

²¹ ta̱nga ja̱kꞌi̱e̱ ja̱ngaján bi̱ katsoó xkjín: «Nga ja̱koxi̱ nda ndyi̱ꞌbíchjí ñá ngotꞌe̱ ni xi kiniꞌánjo̱ ntsꞌié, a foaꞌátsjienjnú nga achichí ꞌniú tsíꞌáná nga si̱ꞌanjetakóo̱n katsaki, kó bo̱a̱jín kiniꞌán, ndatsi kamáyà ñá nga achichí katsakjónní. Ja̱ ngotꞌe̱ ꞌne̱ kꞌi̱e̱ ndyi̱ꞌbíchjí ni xi kiniꞌán».

²² Kósꞌe̱ Rubee̱n bi̱ katsoó: «A mí tsí bo̱a̱ kixianjnúꞌun nga jmí ni si̱ꞌanjo̱jínjnú kui nda̱a̱. ¡Ta̱nga jún kiniꞌánjínjnúꞌun xki̱! ¡Ngotꞌe̱ ꞌne̱ chjiéngá kꞌuíchjí nga ñá kiniꞌánkꞌién!»

²³ Ta̱nga Kosiee̱ nga tsíchji̱a̱jo kui jaá ngo chji̱ni̱e̱ꞌén katsꞌénkjién xi katsꞌénkꞌatioyaa̱, kó kui jaá kamábejín nga Kosiee̱ kamákjiín ni xi ndyi̱tsó.

²⁴ Kósꞌe̱ Kosiee̱ kijíboaꞌá chií kó achichí askjandá, sꞌe̱ jaskan jachókón nginií kó tsíchji̱a̱jo, sꞌe̱ katsjákjo̱a̱ nga ikꞌítꞌaꞌniú Simeoo̱n ngindyi̱ko̱n ngayeje kui jaá.

²⁵ Jaskan katsjákjo̱a̱ Kosiee̱ tsi̱ꞌe̱ nga kꞌuikítsie maá to ndso̱ko̱a̱n ṉño̱pan koxta̱a̱ kui jaá, kó nga kui to̱n xi íchjíní kui to ndso̱ko̱a̱n ṉño̱paa̱n ko̱e̱ꞌéꞌoyá nginií, kó nga ki̱a̱ ko̱na̱ngínjin koxta̱a̱. Kó ti̱ katsjákjo̱a̱ Kosiee̱ nga ko̱e̱ꞌeé nichinie tsi̱ꞌe̱ ndi̱ya̱à nga. Kó ngije kamá kui nii̱,

²⁶ já ntsꞌie Kosiee̱ katsꞌénkaꞌa bórroó kui to ndso̱ko̱a̱n ṉño̱paa̱n, sꞌe̱ jatjoni kui ngi̱ndiee̱.

²⁷ Ta̱nga nga jachó ngo ngi̱ndie nínga sa̱ꞌínkjaꞌyá kui ni̱xtji̱e̱e̱n, ngo kui jaá iskjíxꞌaá ngo koxta̱ xi ndyi̱yaꞌa tsi̱ꞌe̱ nga tsja̱á nichinie bórroó, ¡kó ki̱a̱ kasako nginií to̱n xi íchjíní to ndso̱ko̱a̱n ṉño̱paa̱n! Kó tji̱e̱nmá bi̱ katsoó já ntsꞌi̱e̱:

²⁸ «¡Jéꞌe̱n katseꞌéꞌoyá nginína to̱nna! ¡Kꞌi̱e̱ tjiyá koxta̱na!» Nga kamábe kui nii̱ achichí katsakjónní kó ngaskande jatsié má ngayejee̱, kó ja̱kꞌi̱e̱ ja̱ngaján bi̱ katsoó xkjín: «Mí nii̱ bo̱a̱ xi tjítsꞌénjo̱ná Néná.»

²⁹ Nga jachó nginí nangi Kanaa̱n, katsóyaà Jakoo̱b, na̱ꞌmii̱ kui jaá ngayeje ni xi kamaá nga bi̱ katsoó:

³⁰ «Nda̱ xtitjoón nangii̱ Ejipto̱ achichí ꞌniú tsíchji̱a̱jojne̱, kó bo̱a̱ katsó nga ji̱n, xota̱ xi kijíkatsijenꞌmá xò ji̱n.

³¹ Ta̱nga ji̱n bo̱a̱ kiꞌmíjne̱ nga xota̱ nda boá ji̱n, jmí tsi xota̱ xi kijíkatsijenꞌmá.

³² Kó bo̱a̱ kiꞌmíjne̱ nga ji̱n tiejó ntsꞌie ma ji̱n, kó nga ta̱ ngo na̱ꞌmi ma ji̱n, kó nga ngo ntsꞌie ji̱n xi je kꞌien ko̱jo nga kui xi kjindií nangi Kanaa̱n tikónjo̱ na̱ꞌmijne̱ ngotꞌe̱.

³³ »Kósꞌe̱ kui nda̱ xtitjoón bi̱ katsójne̱: “Ngotꞌe̱ ꞌne̱ skuie an tsi kjeén nga xota̱ ndajnú. Kꞌi̱e̱ tꞌíjñájnú ngo ntsꞌiejnú, kó xi ngasee̱ ngatjíjoo̱ nichinie xota̱ ndiꞌajnú, ngatꞌa̱ jera̱ kjifesón kjindiá.

³⁴ Ta̱nga chjiéngá kji̱ndi̱bájo̱jnú ntsꞌiejnú xi kjindí ngasee̱, ki̱a̱ ka̱maa̱ nga skuie an nga jún jmí tsi xota̱ xi jeꞌekatsienjenꞌmá jún, nga xota̱ nda jún, kó tsja nginíjnúꞌun ntsꞌiejnú. Kó bo̱a̱ tsí tsꞌén nga ka̱ma ko̱ti̱ñájnú ko̱jo ka̱ma si̱ꞌantsiéjnú ni kui na̱xi̱ńdaá”».

³⁵ Kó kui jaá nga ítiya koxta̱a̱, ki̱a̱ kasakoo̱ to̱n xi íchjí nga ngo nga ngo, kó achichí katsakjónní kui jaá ko̱jo na̱ꞌmii̱.

³⁶ Kósꞌe̱ Jakoo̱b na̱ꞌmii̱ kui jaá bi̱ katsoó: —¡Jún ndyi̱chjeꞌéxín yejejnúꞌun ndína! Kosiee̱ ko̱jo Simeoo̱n jè ngiti̱ kꞌi̱e̱jín tikónjo̱ná, ¡kó ngotꞌe̱ ꞌne̱ mejénjnú kongínjo̱jnú Benjaa̱ nga! ¡Ti̱chánní sa̱ꞌínkꞌiénna kui nii̱!

³⁷ Ta̱nga Rubee̱n bi̱ katsoó na̱ꞌmii̱: —Na̱ꞌmi, te̱ꞌéndiè ji nga Benjaa̱ ngi̱ya ndsa̱ an kꞌuijñá, kó kjoéꞌe̱jo ngiñaá, ta̱nga tsi ngiti̱ kjoéꞌe̱jojaán, ¡ka̱ma si̱ꞌinkꞌin ji nga jó ndína!

³⁸ Kósꞌe̱ Jakoo̱b bi̱ katsó: —Kongínjo̱jínjnú ndína, ngatꞌa̱ jè kꞌien Kosiee̱, kó ta̱ Benjaa̱ xí tikón ngasena, tsi tjín ni xi ka̱maa̱ ngi̱ya ndi̱yà xí kongínjnú, achichí ndasen kotíjña̱ an ngaskande nga ko̱yà an.