Jenesii̱s 40 - Xo̱jo̱n eén Néná

Bi̱ tsꞌén katsóyà Kosiee̱ ni xi tsó jó chi̱nii̱

^1-2 Ngije jaꞌa ni̱xtjin, nda̱ ngito̱ko̱o̱ já xí tjón kotꞌa bino̱ xi ꞌbi nda̱ ree̱ ko̱jo nda̱ xi tsꞌéndaa̱ pan, kui jaá ndajín katsꞌén kondraa̱ nda̱ ree̱ nangi Ejipto̱, kó achichí katsꞌénxchánjo̱ nga jó kui jaá.

³ Kósꞌe̱ katsangisꞌien ndo̱bo̱a̱yà kuí jaá ki̱a̱ ndo̱bo̱a̱yà nínga tjiꞌyá Kosiee̱.

⁴ Kó kui nda̱ ngito̱ko̱o̱ já xí koón já xí síndo ndo̱bo̱a̱ya̱à, katsjáxaá Kosiee̱ nga kui skondá kui jaá. Kó ngije jaꞌa ni̱xtjin,

⁵ ngo ni̱xtji̱e̱n nda̱ xi ngito̱ko̱o̱ já xí tjón kotꞌa bino̱ xi ꞌbi nda̱ ree̱ ko̱jo nda̱ xi tsꞌéndaa̱ pan, ngo chi̱ni katseꞌeé nga ngo nga ngo ti̱ kuii̱ ni̱xtji̱e̱n, kó nga ngo nga ngo kui chi̱nii̱, tjiín ngo ni xi tsó.

⁶ Kó nga kamángindyiojón Kosiee̱ jachókatsijee̱n kui jaá, kó kamábe nga achichí ndasen síndo,

⁷ kó Kosiee̱ bi̱ katsoó: —Míkjo̱a̱a̱ nga ndasen tindyion konjnú.

⁸ Kó kui jaá bi̱ katsó: —Kjo̱a̱a̱ nga ngo chi̱ni tseꞌéjne̱, ta̱nga jmíjín xi tsáyàjne̱ mí ni xi mejeén tsó kui chi̱nii̱. Kósꞌe̱ Kosiee̱ bi̱ katsó: —Tꞌíyájnúꞌun chi̱nijnú, kó Néná ka̱tso̱yàná mí ni xi mejeén tsó.

⁹ Kósꞌe̱ kuí má tjón kui nda̱ xi ngito̱ko̱o̱ já xí tjón kotꞌa bino̱ xi ꞌbi nda̱ ree̱, xi bi̱ katsó nga katsóyaà Kosiee̱ chi̱nii̱: —Ngi̱jin chi̱nina kamábe an ngo ꞌniuú tostsi̱jè,

¹⁰ xi ján tjia kisꞌiee̱, kó kamábe an nga ti̱ kjiꞌa tjitjó ńtsꞌieén kui tjiaa̱, ko̱jo naxoó, ko̱jo tjíchjì kui tostsi̱je̱è.

¹¹ Kó ti̱ kamábe an nga ngo chi̱tsen xi ꞌbiyá ni nda̱ ree̱ tsꞌényaꞌa an ngi̱ya ndsa̱ an, kó iskjíbé an kui tostsi̱je̱è kó iskjítjíi̱ ngi̱ya chi̱tse̱én, kósꞌe̱ an katsjáa̱ nda̱ ree̱.

¹² Kósꞌe̱ Kosiee̱ bi̱ katsoó: —Nga ján kui tjiaa̱ kui ńꞌniuú, ján ni̱xtjin boá, kó kui nii̱ xi mejeén tsó nga

¹³ ngotꞌe̱ ján ni̱xtjii̱n nda̱ ree̱ sa̱ꞌínjetakoón, kó tsja̱á nginií xá xi kisꞌiee̱ ngasꞌe̱, tsi̱ꞌe̱ nga ji ka̱ma nginí ji ngito̱ko̱o̱ já xí tjón kotꞌa bino̱ xi ꞌbi nda̱ ree̱.

¹⁴ Ngo kjo̱a̱nda míꞌaá, ngatjaꞌátsjien chií an ngije ka̱ma kui nii̱. Nga ka̱ma xi si̱ꞌin ji ndókjo̱e̱je ji nda̱ ree̱ kjo̱a̱a̱ an, kó ꞌna̱xiéní kuí ndo̱bo̱a̱ya̱à.

¹⁵ Nda̱ Ebreo̱ an, kó ta̱ kjo̱a̱ꞌniú nga kjindibájo̱na kui ngi̱ndiee̱, jmí ni xi ndajín katsꞌénjín an nga ndo̱bo̱a̱yà tikòn an.

¹⁶ Nga kamábe kui nda̱ ngito̱ko̱o̱ já xí tsꞌéndaa̱ pan nda̱ ree̱ nga Kosiee̱ nda tsꞌén katsóyaà chi̱nii̱ kui nda̱a̱, bi̱ katsoó Kosiee̱: —Ti̱ ngo chi̱ni tseꞌéna an nga: Ngi̱jin ńjñána kamábe an ján ni̱se̱nyá pan nga̱són tokó án.

¹⁷ Ngi̱yaa̱ kui ni̱se̱nyá xí tikón nkꞌaá ndyi̱a̱ ngayeje to̱ko̱ya pan ixi xi nda chinie xi tsi̱ꞌe̱ nda̱ ree̱, ta̱nga ni̱siee̱ kjindibá kjinie kui paa̱n.

¹⁸ Kósꞌe̱ Kosiee̱ bi̱ katsoó: —Nga ján ni̱se̱nya̱á, ján ni̱xtjin boá. Kó kuí nii̱ xi mejeén tsó nga

¹⁹ ngotꞌe̱ ján ni̱xtjii̱n nda̱ ree̱ tsja̱akjo̱a̱ nga si̱ꞌankꞌiee̱n kó ngo yá kjuiénboáꞌaá, kó cho̱ xi fítji̱e̱e̱n skji̱ni̱e̱ yojòo̱.

²⁰ Xi ma ján ni̱xtjin, kjiꞌá má nga jachónó nda̱ ree̱ nangi Ejipto̱ ngo sꞌué ꞌniú katsꞌeén ngayeje chji̱ni̱e̱ꞌboo̱ ko̱jo mosoo̱, kó ki̱a̱ ngindyi̱ko̱n ngayeje xota̱ xi jachó kui sꞌueé katsjákjo̱a̱ nga ko̱ꞌna̱xié ndo̱bo̱a̱yà ngito̱ko̱o̱ já xí tjón kotꞌa bino̱ xi ꞌbi nda̱ ree̱ ko̱jo ngito̱ko̱o̱ já xí tsꞌéndaa̱ pan.

²¹ Nda̱ ngito̱ko̱o̱ já xí tjón kotꞌa bino̱ xi ꞌbi nda̱ ree̱ katsjá nginií xaá,

²² ta̱nga nda̱ ngito̱ko̱o̱ já xí tsꞌéndaa̱ pan nda̱ ree̱, katsjákjo̱a̱ nga ikjienboaꞌa nga kiniꞌánkꞌién, kó jatjosón xikó má katsó Kosiee̱.

²³ Ta̱nga kui nda̱ ngito̱ko̱o̱ já xí tjón kotꞌa bino̱ xi ꞌbi nda̱ ree̱ ngiti̱ jaꞌátsjienjiín Kosiee̱, ta̱sá katsꞌénchíyà kjin.