Jenesii̱s 4 - Xo̱jo̱n eén Néná

Bi̱ katsꞌén Kaii̱n nga katsꞌénkꞌién Abee̱

¹ Kó Andaa̱n kisꞌiejo̱ chjo̱ón, kó na̱ Ebaa̱ tsaꞌa ndí, kó kisꞌiee̱ ngo ndí, sꞌe̱ “Kai̱n” ítꞌajaꞌén, ngatꞌa̱ bi̱ katsó na̱ Ebaa̱: «¡Ndokꞌóchji̱ì Néná nga kisꞌiena ngo ndí xíꞌín!»

² Jaskan kisꞌie nginií ingo ndí, kó “Abe̱” ítꞌajaꞌén. Kaii̱n tꞌanangii̱ katsꞌénxájin kó Abee̱ cho̱tsa̱nga̱ katsꞌénxchá.

³ Kó ngije jaꞌa ni̱xtjin, ngo ndi̱yà Kaii̱n kijítsꞌenkꞌásꞌieén ngo kjo̱a̱tjó Néná nga kijíjoo̱ ngo tjín ni xi kamáxchaá.

⁴ Kó Abee̱ ti̱ kijíjoo̱ Néná ngo kjo̱a̱tjó nga, kó jaꞌájin ndí xí tjoón cho̱tsa̱nga̱ xi kamáxchaá xi ꞌniú yiꞌi ngasee̱. Kó Néná achichí tsjá kamaá kjo̱a̱tjó xi katsꞌénkꞌasꞌien Abee̱,

⁵ ta̱nga tsjajín kamaá kjo̱a̱tjó xi katsꞌénkꞌasꞌien Kaii̱n, kó tsijen kisꞌie kje̱n Kaii̱n nga katsꞌénxchán.

⁶ Kósꞌe̱ Néná bi̱ katsoó Kaii̱n: «Míkjo̱a̱a̱ nga ndasen tindyin ko̱jo nga tiniꞌínxchín kón ji.

⁷ Tsi ndakjiꞌi ni xi tiniꞌín ji, ngatsjéni̱xtjin nga tsja ka̱mana nga sa̱ꞌinjoꞌoo̱, ta̱nga tsi ndajínkjiꞌi ni xi tiniꞌín ji, jeé jè tsꞌénkoya nga sa̱ꞌínꞌoón xikoó ngo cho̱ tamá. ¡Ngata̱ boeꞌéndièjín ji nga sa̱ꞌiín jeé!»

⁸ Ngo ndi̱yà Kaii̱n tjiantsobé ngi̱jin kꞌijñá jàn katsoó Abe̱ ntsꞌi̱e̱, kó ngije jachó ngi̱jin kꞌijñá jàn, Kaii̱n kijítsꞌuieé Abee̱, kó katsꞌénkꞌién.

⁹ Kó ngi̱chí sájín Néná bi̱ katsoó Kaii̱n: —Ñá tikón Abe̱ ntsꞌie ji. Kó bi̱ katsó Kaii̱n: —Bejín an. ¡A án tsꞌénkonda an ntsꞌié án!

¹⁰ Kó bi̱ katsó Néná: —Ánní nga ntsꞌie kiniꞌínkꞌín kon ji Kaii̱n. ¡Jiín ntsꞌie ji xi katjon tꞌanangii̱ tsꞌénchji̱a̱ tsi̱ꞌe̱ nga sa̱ꞌinjeé ji! ¡Chjiéngá kotijeé kjo̱a̱a̱ kui nii̱!

^11-12 Ngotꞌe̱ ꞌne̱ tsobo̱a̱, an sa̱ꞌinjeé kó ndajín ko̱e̱je̱e̱ nga ku̱i̱ndyin ji. Kjiꞌanga si̱ꞌinxéjin ji tꞌanangii̱, ngiti̱ jmí ni ka̱maxchájiín, ngatꞌa̱ ntsꞌie kiniꞌínkꞌín ji, kó tꞌanangii̱ katsꞌe jiín, kuíni nga ngo nda̱ xi ta̱xkiya kjótsoꞌbá són nga̱sondiee̱ ka̱ma ji xi jmíjiín nínga kꞌuijñá.

¹³ Kó Kaii̱n bi̱ katsoó Néná: —Kjo̱chíkjo̱a̱jínna kui jé xí ta̱nisién ꞌniuú.

¹⁴ Ngotꞌe̱ ꞌne̱ tiniꞌínjéní nga xikoó tsi ngo xota̱ xi ta̱xkiya kjótsoꞌbá ka̱ma an nga kotíjña̱ an kui nga̱sondiee̱, kó nga ta̱ xi sa̱kórií an, sa̱ꞌínkꞌiénna.

¹⁵ Ta̱nga Néná bi̱ katsó: —Bo̱a̱jín ka̱ma. Tsi tjín xí sa̱ꞌínkꞌieén ji, yito bo̱a̱ kjiꞌi ngase ka̱majeé kui xi bo̱a̱ sa̱ꞌiín. Kósꞌe̱ Néná ngo chi̱bo̱a̱ katsꞌénkaꞌa Kaii̱n, tsi̱ꞌe̱ nga jmíjín xi ta̱xkiya sa̱ꞌínkꞌién.

¹⁶ Kó jatjo Kaii̱n ngindyi̱ko̱n Néná, kó ki̱a̱ kijíkꞌíjñá nangii̱ xota̱ xi tjimásoón, ki̱a̱ xtji̱e̱e̱n nínga fotjo tsꞌueé ki̱a̱ ngi̱ndie xi ꞌmí Endee̱n.

¹⁷ Jaskan Kaii̱n kisꞌiejo̱ chjo̱ón, kó tsaꞌa ndí, kó katsen ndií kui xota̱chjo̱on, kui xi Enoo̱k kiꞌmí. Kui ni̱xtjin jàn Kaii̱n iskjininkꞌa ngo na̱xi̱ńdáꞌniú xi Enoo̱k ítꞌajaꞌén, xikó kiꞌmí ndií.

¹⁸ Kuí bí xi̱ꞌbi̱ xi xota̱ tji̱e̱e̱ Kaii̱n: Enoo̱k, Iraa̱nd, Meujae̱l, Metusae̱l, ko̱jo Lamee̱k.

¹⁹ Kó Lamee̱k jó kamá chjo̱ón, ngo xi kiꞌmí na̱ Anda̱, kó xi ingoo̱ na̱ Sila̱ kiꞌmí.

²⁰ Na̱ Andaa̱ na̱aa̱n Jabaa̱l kamá, kó xota̱ tji̱e̱e̱ Jabaa̱l, ki̱a̱ kjindibánii̱ xota̱ xi tjíndoꞌyá ndiꞌa xi tji̱xi̱ín cho̱ niꞌándani ko̱jo ki̱a̱ kjindibáni xota̱ xi ꞌbítji̱e̱ cho̱o̱.

²¹ Jabaa̱l kisꞌiee̱ ngo ntsꞌi̱e̱ xi Jubaa̱l kiꞌmí. Jubaa̱l kuí boá xi tjón tjón katsꞌénda arpa̱ ko̱jo yána̱xo̱ xi fonie.

²² Kó na̱ Silaa̱ kisꞌiee̱ ngo ndí xí Tubal-Kaii̱n kiꞌmí, kó kuí boá xi ngo nda̱ chji̱ni̱e̱ki̱cha̱ kamá xi katsꞌénda kjín ni xi mandani bronse̱ ko̱jo ki̱cha̱, kó na̱ xi ꞌmí Naamaa̱ xí kamá ndichja Tubal Kaii̱n.

²³ Ngo ndi̱yà Lamee̱k bi̱ katsoó nga jó chjo̱ón: «Jún xi ínchjínna na̱ Sila̱ ko̱jo na̱ Anda̱: ¡ndaꞌyájnú nda̱na! Tsi tjín xí sa̱ꞌínꞌónna, ko̱jo tsi ngo xi ni xí ndajín sa̱ꞌínjo̱na, tsi kjindí ko̱jo tsi xchá, sa̱ꞌinkꞌién an.

²⁴ Tsi xi sa̱ꞌínꞌoón Kaii̱n yito ndi̱yà ku̱i̱ꞌíchjí ngajo, xi sa̱ꞌínꞌónna an, ja̱koxi̱ boá nga ichítié ko̱jo kan yito bo̱a̱ kjiꞌi ka̱majeé kui».

²⁵ Kó ti̱ kisꞌiejo̱ nginí chjo̱ón Andaa̱n, kó kisꞌiee̱ ingo ndí xíꞌín, kó See̱t ítꞌajaꞌén, kó na̱ Ebaa̱ bi̱ katsó: «Néná katsjána ingo ndí xí tikón ngajoo̱ Abee̱, kui xi katsꞌénkꞌién Kaii̱n.»

²⁶ Kó See̱t ti̱ kisꞌiee̱ ngo ndí, kó Enoo̱ ítꞌajaꞌén. Ndeskande koó kjiꞌa ikꞌítsꞌi̱yanii̱ nga kiniꞌánkaxoma jaꞌeén Néná nga kiniꞌántsjaá.